Kopenhagen, 5 aprel (AZƏRTAC). Qondarma “erməni soyqırımı”nın Danimarka parlamentində tanınması gündəmdə deyildir.

Bu sözləri AZƏRTAC-ın Danimarkaya ezam olunmuş əməkdaşları ilə görüşdə Kopenhagen Şəhər Bələdiyyəsinin siyasi məsələlər üzrə katibi, hakim Sosial-Demokrat Partiyasının üzvü, ölkə parlamentinin iki dəfə deputatı olmuş Yıldız Akdoğan demişdir.

Qondarma “erməni soyqırımı”nın Danimarka parlamenti tərəfindən tanınması ehtimalından danışarkən Yıldız Akdoğan bunun gündəmdə olmadığını demişdir. O əlavə etmişdir ki, Azərbaycan və Türkiyə öz tarixi reallıqlarını açıq şəkildə parlament nümayəndələri ilə müzakirə etməlidir. “Parlament belə məsələlərə açıqdır və münaqişələrin səbəbləri, onların acı nəticələrini araşdırmağa çalışır. Danimarkadakı Azərbaycan cəmiyyətləri Dağlıq Qarabağ münaqişəsi ilə bağlı məsələni parlamentin Xarici əlaqələr komitəsinin üzvləri ilə müzakirə edə bilərlər. Bu yolla münaqişə haqqında onlara daha çox bilgi vermək olar”, - deyə o qeyd etmişdir.

“Danimarkada yaşayan azərbaycanlılar çox fəaldırlar və onların bu cəmiyyətə inteqrasiyasında heç bir problem yoxdur”, - deyən Yıldız Akdoğan bildirmişdir ki, azərbaycanlıların Danimarkada sayının az olmasına baxmayaraq, onlar yaxşı təşkilatlanmış şəkildə fəaliyyət göstərirlər. Yıldız Akdoğan demişdir ki, burada yaşayan azərbaycanlılar müxtəlif sahələrdə çalışırlar və nümunəvi vətəndaş kimi onların Danimarka cəmiyyətinə inteqrasiyasında hər hansı çətinliklər yaranmır. Bələdiyyə təmsilçisi onu da qeyd etmişdir ki, hazırda Azərbaycan icması və həmçinin digər xalqlar ana dillərini özləri tədris edirlər, lakin artıq ölkə parlamentində bunun Danimarka məktəblərində təşkil olunması məsələsi müzakirə obyektidir. “Artıq hər kəs anlayır ki, uşaq ana dilini nə qədər yaxşı bilərsə, Danimarka dilini də daha tez mənimsəmiş olar. Əvvəlki hökumət bunun əksini tətbiq edirdi. Lakin hazırda ana dilinin öyrədilməsi məsələsinə diqqət ayrılır”, - deyə o qeyd etmişdir.

Azərbaycan-Danimarka münasibətlərinə toxunan Yıldız Akdoğan Azərbaycanın “Eurovision-2012” mahnı müsabiqəsində qələbə qazandıqdan sonra bu ölkədə daha çox tanındığını demişdir: “Bu yarışma sayəsində Danimarka cəmiyyəti Azərbaycanın mədəniyyəti, musiqisi haqqında məlumat aldı. Bundan sonra da təbii ki, ümumən Azərbaycana maraq artdı”.

Görüşdə Danimarka ilə Azərbaycan arasında münasibətlərin inkişaf etdirilməsi yollarından da bəhs olunmuşdur. Yıldız Akdoğan bildirmişdir ki, Danimarkada fəaliyyət göstərən Azərbaycan təşkilatları bu işə öz töhfələrini verə bilərlər. Bunun üçün fəal təşkilatlar Danimarka parlamentinin deputatları ilə sıx əlaqələr qurmalıdırlar. “Yaxşı olardı ki, deputatlarla birbaşa ünsiyyət qurulsun. Buradakı Azərbaycan cəmiyyətləri onları öz tədbirlərinə dəvət edə, öz mədəniyyətini, tarixini və problemlərini onlara izah edə bilərlər. Bu daha səmərəli olardı”.

Görüşdə iştirak edən Danimarkada fəaliyyət göstərən “Vətən” cəmiyyətinin sədri Səfər Sadiqi qeyd etmişdir ki, cəmiyyət Danimarkanın bir neçə şəhərində kitabxanalara Xocalı soyqırımı, Azərbaycan-Ermənistan, Dağlıq Qarabağ münaqişəsi haqqında kitablar paylamışdır. O, həmçinin bir qrup Danimarka deputatının Azərbaycana səfərini təşkil etməklə onları ölkəmizlə daha yaxından tanış etməyin nəzərdə tutulduğunu demişdir.