CƏMİYYƏT


Reabilitasiya vasitələri ilə təminat sistemi gücləndirilərək əhatə dairəsi genişləndirilir

Bakı, 23 sentyabr, AZƏRTAC

Azərbaycanda köməkçi texnologiyalar (reabilitasiya vasitələri, o cümlədən təkərli oturacaqlar, eşitmə cihazları, protezlər, eynəklər və s.) ilə təminat sistemi ildən-ilə gücləndirilir.

Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsindən AZƏRTAC-a verilən məlumata görə, bu fikir Ümumdünya Səhiyyə Təşkilatı (ÜST) nümayəndələri ilə keçirilən görüşdə səsləndirilib.

Əmək və əhalinin sosial müdafiəsi naziri Sahil Babayev Prezident İlham Əliyevin əlilliyi olan şəxslərə xüsusi qayğısını qeyd edərək həmin kateqoriyadan olan şəxslərin sosial müdafiəsinin gücləndirilməsi və reabilitasiya imkanlarının artırılması üçün atılan mühüm addımları diqqətə çatdırıb. O, son iki ildə 12 reabilitasiya və sosial xidmət müəssisəsinin əsaslı təmir və yenidənqurmadan sonra müasir avadanlıqlarla təchiz olunmuş şəkildə istifadəyə verildiyini, bu il uşaqlar üçün bölgələrdə iki reabilitasiya mərkəzinin də açılacağını deyib.

Nazir bu ilin 8 ayında reabilitasiya müəssisələrində əlilliyi olan 4600 şəxsə reabilitasiya xidmətləri göstərildiyini, 7 min şəxsə 30 min reabilitasiya vasitəsi təqdim edildiyini bildirib. Ötən ilin dekabrından yüksək texnologiyalı protezlərlə təminata başlandığını, Vətən müharibəsi əlillərindən artıq 142 hərbçinin son nəsil elektron protezlərlə təmin olunduğunu qeyd edib. Dövlət büdcəsi hesabına verilən reabilitasiya vasitələrinin növlərinin siyahısına ötən il 23 yeni növün də daxil edildiyini bildirən nazir siyahıdakı reabilitasiya vasitələri növlərinin sayının artıq 57-yə çatdığını diqqətə çatdırıb.

S.Babayev əlillik və reabilitasiya sahələrində islahatlarda, o cümlədən əlilliyin qiymətləndirilməsi meyarlarının qabaqcıl beynəlxalq təcrübə əsasında təkmilləşdirilməsində ÜST ilə fəal əməkdaşlığın əhəmiyyətindən bəhs edərək bildirib ki, mövcud əməkdaşlıq gündəliyində ölkəmizdə köməkçi texnologiyalar - reabilitasiya vasitələri ilə təminat sisteminin gücləndirilməsi və əhatəsinin genişləndirilməsi, əlilliyi olan şəxslərlə yanaşı, digər kateqoriyalara aid şəxslərin (o cümlədən yaşlıların, xroniki xəstəlikləri olan insanların, yaralanmış şəxslərin və s.) ehtiyaclarına uyğun həmin vasitələrə əlçatanlığının artırılması da mühüm yer tutur. Bununla bağlı ehtiyaclar səviyyəsi, tələbat və təklif haqqında məlumatlar bazasının formalaşması üçün qiymətləndirmələr, habelə prioritet köməkçi reabilitasiya vasitələrinin milli siyahısının hazırlanması işləri aparılır.

Səhiyyə nazirinin müavini Rəhim Əliyev və ÜST-nin Azərbaycandakı nümayəndəliyinin rəhbəri Hande Harmancı fikirlərini bölüşüblər. Köməkçi texnologiyalar, reabilitasiya vasitələrinə əlçatanlığın müvafiq kateqoriyalardan olan şəxslərin öz funksionallığını, sağlamlığını və rifahını qorumalarında əhəmiyyəti, bu vasitələrə ehtiyacların müəyyən edilməsi üçün aparılan qiymətləndirmənin əhəmiyyəti vurğulanıb.

Görüşdə qeyd edilən qiymətləndirmə üzrə aparılan işlərin nəticələri müzakirə olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.