İQTİSADİYYAT
Rəqəmsal və məsafədən bank xidmətlərinin göstərilməsinin sürətləndirilməsi müzakirə edilib
Bakı, 25 iyun, AZƏRTAC
İyunun 25-də Azərbaycan Banklar Assosiasiyası (ABA) nəzdində fəaliyyət göstərən “Hüquqi məsələlər üzrə Ekspert Qrupu”nun növbəti onlayn iclası keçirilib.
ABA-dan AZƏRTAC-a bildirilib ki, iclasda banklar tərəfindən rəqəmsal və məsafədən bank xidmətlərinin göstərilməsinin sürətləndirilməsi məqsədilə müvafiq qanunvericilik aktlarına dair ümumiləşdirilmiş təkliflər və digər cari məsələlər müzakirə edilib, müvafiq təcrübə mübadiləsi aparılıb.
Görüşdə Ekspert Qrupunun sədri Qorxmaz Ağayev və bankların rəhbər şəxslərindən ibarət olan qrupun üzvləri iştirak ediblər.
Qeyd edək ki, Azərbaycan Banklar Assosiasiyası 1990-cı ildə kommersiya bankları tərəfindən təsis edilib. ABA-nın əsas məqsədi üzv-təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə yardım göstərmək və fəaliyyətlərini əlaqələndirməkdən ibarətdir. Hazırda 29 bank və 3 qeyri-bank təşkilatı ABA-nın üzvüdür.