REGİONLAR


Şabranda torpaqların elektron kadastr uçotunun nəticələrinin real iş rejimində istifadəsinə başlanılıb

Şabran, 3 oktyabr, Elxan Yusifli, AZƏRTAC

Şabran rayonunda torpaqların elektron kadastr uçotunun nəticələrinin real iş rejimində istifadəsinə başlanılıb. Uçot işləri rayonun bələdiyyə hüdudları daxilində torpaq islahatına cəlb edilmiş 80 min hektara yaxın torpaq sahəsinin mövcudluğunu öyrənməyə imkan verib.

AZƏRTAC-ın bölgə müxbiri xəbər verir ki, Əmlak Məsələləri Dövlət Komitəsi tərəfindən oktyabrın 3-də Şabranda keçirilən ictimai təqdimatda rayonu əhatə edən elektron kadastr uçotu işlərinin ayrı-ayrı sahələrə verəcəyi faydalar, əldə edilən nəticələrin istifadə qaydaları izah edilib, alınan göstəricilər nümayiş olunub.

Tədbirdə aidiyyəti mərkəzi icra hakimiyyəti orqanlarının, rayon icra hakimiyyətinin nümayəndələri, eləcə də bələdiyyələr, müəssisə, idarə, təşkilat və media nümayəndələri iştirak edib.

Bildirilib ki, ölkəmizdə Torpaqların Elektron Kadastr Uçotu İnformasiya Sisteminin nəticələrinin praktiki istifadəsi bütün rayonları sürətlə əhatə etməkdədir. Artıq Şabranda da mülkiyyət mənsubiyyətindən asılı olmayaraq torpaqların sərhədləri müəyyən olunub. Heç bir torpaq sahibi digər ərazini qanunsuz olaraq istifadə edə bilməyəcək. Eyni zamanda, rayonun torpaq fondunda müxtəlif kateqoriyalara aid, o cümlədən kənd təsərrüfatı, sənaye təyinatlı ərazilərin həcmi müəyyən olunub.

Layihənin həyata keçirilməsi bölgədə bələdiyyə, relyef, meyillilik xəritələrinin də tərtib olunmasını mümkün edib. Həmçinin torpaqların müqayisəli qiymətləndirilməsini, bonitirovkasını həyata keçirməyə imkan verən xəritələr də mütəxəssislər tərəfindən hazırlanıb.

Reallaşan uçot işlərindən sonra bəlli olub ki, Şabranda torpaq islahatına cəlb edilmiş sahələrin 35,8 min hektarı bələdiyyə, 22,1 min hektarı dövlət, 20 min hektarı isə özəl torpaqların payına düşür. Bələdiyyə hüdudları daxilindəki torpaq sahələrinin 54 min hektara yaxını (69,3 faizi) kənd təsərrüfatına yararlı torpaqlardır ki, bunun da 23,9 min hektarını əkin sahələri təşkil edir. Torpaq islahatı aparılan zaman rayon üzrə əkin sahələri 21,5 min hektar olduğu halda, elektron uçot aparıldıqda bu ərazilər digər uqodiyaların hesabına artaraq 23,9 min hektar təşkil edib. Uçot işləri zamanı müəyyən edilib ki, torpaq payı almış ailələrdən 8 minə yaxınının torpaq ölçüləri 1 hektara qədərdir. Bu da onu göstərir ki, torpaq sahələrinin konsolidasiyasına, birləşməsinə ehtiyac var.

Layihənin reallaşdığı müddətdə Şabran rayonunda torpaqların kəmiyyət göstəriciləri ilə bərabər, keyfiyyət göstəricilərinin də uçotu aparılıb. Yay otlaqlarının geobotanik, torpaqların isə eroziya xəritələrinin tərtib edilməsi ərazilərin münbitliyini, torpaqların isə şorlaşmaya məruz qaldığını müəyyən etməyə imkan verir. Belə xəritələr kəndliyə torpağı hansı fermer təsərrüfatına cəlb edəcəyi ilə bağlı iqtisadi planlama üçün yardım edir. Eləcə də torpaqda düzgün aqrokimyəvi tədbirlərin görülməsinə imkan verir. Torpaqların iqtisadi qiymətləndirilməsi və bonitirovkası ilə bağlı məlumat bazasının yaradılması da rayon ərazilərindən kənd təsərrüfatı sahəsində istifadəni səmərəli edir.

Beləliklə, Şabran torpaqların elektron kadastr uçotu işlərinin praktiki istifadəsi reallaşan 24-cü rayon olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.