Sankt-Peterburq, 11 may, AZƏRTAC

Azərbaycanın Sankt-Peterburqdakı Baş Konsulluğunun təşkilatçılığı ilə Rusiyanın şimal paytaxtında ümummilli lider Heydər Əliyevin andan olmasının 96-cı ildönümü qeyd olunub.

AZƏRTAC xəbər verir ki, tədbirdə Sankt-Peterburqun tanınmış ictimai xadimləri, yaradıcı ziyalıları, Azərbaycan diasporunun nümayəndələri, Rusiya Azərbaycanlı Gənclər Birliyinin fəalları iştirak ediblər.

Tədbir iştirakçıları ulu öndər Heydər Əliyevin şəhərin Qoroxovaya küçəsindəki barelyefi qarşısına gül dəstələri düzüb, onunla bağlı xatirələrini bölüşüblər. Azərbaycanın Sankt-Peterburqdakı baş konsulu Sultan Qasımov ümummilli lider Heydər Əliyevin həyat və fəaliyyətinə nəzər salaraq, dahi öndərin ömür yolunu sevdiyi xalqına həsr etdiyini vurğulayıb. Diplomat bildirib ki, Heydər Əliyev daim Azərbaycan dövlətini və xalqını düşünüb, ölkəmizin tərəqqisi naminə taleyüklü qərarlar verib. Baş konsul xüsusilə qeyd edib ki, ümummilli lider Heydər Əliyev müstəqil Azərbaycanın banisidir, məhz onun siyasi müdrikliyi nəticəsində müasir dövlətçiliyimizin möhkəm əsasları qoyulub. Diplomat qeyd edib ki, dahi siyasi xadim Heydər Əliyevi Rusiyada və dünyada yaxşı tanıyırlar. Heydər Əliyev SSRİ dövründə rəhbər vəzifələrdə çalışaraq təkcə Azərbaycanın deyil, bütün SSRİ-nin iqtisadiyyatının və mədəniyyətinin inkişafında mühüm rol oynayıb. Strateji və iqtisadi cəhətdən vacib olan layihələr məhz Heydər Əliyevə həvalə edilib və onun sayəsində uğurla həyata keçirilib.

Baş konsul bildirib ki, müstəqil Azərbaycana rəhbərlik edən ümummilli lider Heydər Əliyevin uzaqgörən siyasəti nəticəsində ölkəmiz beynəlxalq aləmdə mövqelərini möhkəmləndirib, müstəqilliyimiz əbədiləşib. Ümummilli lider Heydər Əliyevin xaricdə yaşayan həmvətənlərimizə, Azərbaycan-Rusiya münasibətlərinin inkişafına xüsusi diqqətlə yanaşdığını deyən Sultan Qasımov vurğulayıb ki, bu gün Ulu Öndərin layiqli davamçısı olan Prezident İlham Əliyev Rusiya ilə ikitərəfli münasibətləri yeni səviyyəyə ucaldıb. Son illər ərzində dövlətlərimiz arasında münasibətlərdə müşahidə olunan yüksəliş və ölkələrimizin başçılarının səmimi görüşləri, həyata keçirilən layihələr, siyasi, strateji və iqtisadi məsələlərdə əldə edilən razılıqlar bunun sübutudur. Diplomat qeyd edib ki, bu əlamətdar gündə həm Azərbaycanda, həm də xaricdə yaşayan həmvətənlərimiz Ümummilli Liderin əziz xatirəsini ehtiramla yad edirlər.

Sankt-Peterburqdakı Azərbaycan Milli-Mədəni Muxtariyyətinin sədri Vaqif Məmişov Azərbaycanın müstəqilliyinin möhkəmlənməsində, dünya miqyasında ölkənin nüfuzunun artmasında ulu öndər Heydər Əliyevin rolundan danışaraq bildirib ki, Azərbaycan diasporunun yaradıcısı məhz Heydər Əliyevdir. Ümummilli Lider daim xaricdə yaşayan həmvətənlərə xüsusi diqqət yetirərək, onları vahid və qüdrətli Azərbaycan ətrafında birləşməyə, harada yaşadıqlarından asılı olmayaraq bölünməz Vətən ideyasına xidmət etməyə çağırıb.

“Naxçıvan” Azərbaycanın dostları” milli-mədəni cəmiyyətinin rəhbəri İdris Qəhrəmanov ümummilli lider Heydər Əliyevin Azərbaycanın müstəqilliyi və inkişafı üçün daim çalışdığını bildirib. Heydər Əliyevin uzaqgörənliyi nəticəsində azərbaycanlı gənclərin SSRİ-nin aparıcı təhsil ocaqlarına göndərildiyini və gələcək müstəqil dövlətimiz üçün yüksəksəviyyəli peşəkar kadrların yetişdirildiyini qeyd edib. O, müasir Azərbaycan dövlətçiliyinin quruculuğunda və möhkəmlənməsində Heydər Əliyevin misilsiz rolundan, xaricdə yaşayan həmvətənlərə böyük qayğı göstərdiyindən danışıb. İ.Qəhrəmanov Heydər Əliyevin azərbaycançılıq ideyasının banisi olduğunu vurğulayıb. Ulu Öndərin layiqli davamçısı olan Prezident İlham Əliyevin düşünülmüş daxili və xarici siyasəti nəticəsində Azərbaycanın öz müstəqilliyini əbədiləşdirdiyini bildirib.

Sonra çıxış edən diasporumuzun ziyalı nümayəndələri Qasıməli Qasımov və Fəqan Kəsəmənli Azərbaycan dövlətçiliyinin quruculuğunda və möhkəmlənməsində Heydər Əliyevin misilsiz rolundan danışıblar.

Fəridə Abdullayeva

AZƏRTAC-ın xüsusi müxbiri

Sankt-Peterburq