İQTİSADİYYAT
Şanxaydakı beynəlxalq forumda Azərbaycan-Çin iqtisadi əlaqələrindən danışılıb
Şanxay, 6 noyabr, AZƏRTAC
Şanxayda keçirilən II Hongqiao Beynəlxalq İqtisadi Forumunda Azərbaycan-Çin iqtisadi əlaqələrindən və perspektivlərdən söhbət açılıb.
AZƏRTAC-ın Çinə ezam olunmuş müxbiri xəbər verir ki, noyabrın 6-da forumun "Çinin 70 illik inkişafı və bəşəriyyət üçün paylaşılan gələcəyi olan cəmiyyətin qurulması" adlı paralel sessiyasının "İqtisadi artım və inklüziv inkişaf" mövzusunda panel iclası keçirilib. İclasda AZƏRTAC da daxil olmaqla bir sıra KİV-lərin nümayəndələrinin və müvafiq sahə üzrə ekspertlərin çıxışları dinlənilib.
AZƏRTAC-ın əməkdaşı Nihad Budaqov çıxışında 70 illik yubileyini qeyd edən Çin Xalq Respublikasının hazırda dünyanın ən böyük iqtisadi güclərindən birinə çevrildiyini deyib. O bildirib ki, bu gün biz iqtisadi artım və inklüziv inkişafı məhz Çinin timsalında görə bilərik. Çin iqtisadiyyatı alıcılıq qabiliyyəti paritetinə görə də dünyanın ən sürətlə artan iqtisadiyyatlarından biridir. Çin Xalq Respublikası 100 illiyində, yəni, 2049-cu ildə tam inkişaf etmiş bir ölkə olmaqla modernləşmə məqsədini reallaşdırmağı qarşısına hədəf qoyub. Çin özünün “Bir kəmər, bir yol” təşəbbüsü ilə qlobal iqtisadi inkişafda yeni və böyük bir addım atır. Yeni İpək Yolu kimi də qəbul edilən bu layihə ilə rəsmi Pekin dünya əhalisinin demək olar ki, yarısını və milli gəlirin beşdəbirini təşkil edən ölkələri birləşdirməyi, dünyada möhkəm ticarət və investisiya əlaqələri qurmağı hədəfləyir. “Bir kəmər, bir yol” layihəsi həm də ölkələr arasında ikitərəfli, üçtərəfli və çoxtərəfli əməkdaşlığı əhatə edir. Azərbaycan da bu təşəbbüsün fəal iştirakçılarındandır. Ölkəmizin əsas hədəfi iqtisadiyyatını şaxələndirmək, insan kapitalına investisiya yatırmaq və inkişaf üçün dayanıqlı imkanlar yaratmaqdır. Azərbaycan müasir infrastrukturun yaradılmasına önəm verir. Nəqliyyat sahəsinə investisiyaların yatırılması da əsas prioritetlərindəndir. Azərbaycan və Çin İpək Yolu İqtisadi Kəmərinin yaradılmasının birgə təşviqinə dair anlaşma memorandumu imzalayıb. Coğrafi mövqeyindən bəhrələnərək Azərbaycan Asiya ilə Avropa arasında körpülərin qurulmasına investisiya yatırır. Ölkəni qonşuları ilə birləşdirən şaxələnmiş dəmir yolu şəbəkəsi yaradılıb. Orta dəhliz adlandırılan və 2017-ci ildə istifadəyə verilən Bakı-Tbilisi-Qars dəmir yolu xətti təkcə 3 ölkəni birləşdirən regional layihə deyil, o, eyni zamanda, qitələri birləşdirir, Asiya və Avropa arasında vacib bağlantıdır. Bu dəmir yolu Şərq-Qərb nəqliyyat dəhlizinin mühüm hissəsidir. Azərbaycanın sərmayə yatırdığı daha bir mühüm nəqliyyat layihəsi Şimal-Cənub dəhlizidir. Şərq-Qərb və Şimal-Cənub nəqliyyat dəhlizlərində yerləşən ölkələr öz mallarını nəql etmək üçün Azərbaycanın ərazisindən istifadə edirlər. Lapis-Lazuli marşrutu isə Bakı-Tbilisi-Qars dəmir yolu xəttinə birləşərək Azərbaycanın tranzit potensialını daha da artırıb. Eyni zamanda, Azərbaycan Şərq-Qərb və Şimal-Cənub dəhlizləri layihələrində iştirak edən ölkələr arasında əməkdaşlığa töhfə verib.
Bildirilib ki, hazırda Azərbaycanın və Çinin dövlət başçılarının siyasi iradəsi və aparılan intensiv dialoq ölkələrimiz arasında əlaqələrin genişlənməsi üçün əlverişli imkan yaradır. Ölkəmizdə 120-dək Çin kapitallı şirkət fəaliyyət göstərir, iki ölkə arasında ticarət dövriyyəsi ilbəil artır. Azərbaycan məhsullarının Çin bazarında təşviqi məqsədilə kompleks addımlar atılır, Çinə ixrac missiyaları təşkil edilir. Azərbaycan Çindəki beynəlxalq sərgilərdə "Made in Azerbaijan" vahid ölkə stendi ilə təmsil olunur. Şanxayda keçirilən builki idxal sərgisində də Azərbaycan öz məhsullarını nümayiş etdirir.
İclasda müxtəlif ölkələrin, Çinin və beynəlxalq düşüncə mərkəzlərinin nümayəndələri və alimlər, beynəlxalq təşkilatların ekspertləri iştirak ediblər.
Qeyd edək ki, noyabrın 5-6-da keçirilən forumu Çin Xalq Respublikası Dövlət Şurasının İnformasiya İdarəsi və Çin Sosial Elmlər Akademiyası təşkil edib.