CƏMİYYƏT
Şəkərli diabet xəstələrinə göstərilən qayğı yaxşılaşdırılır
Bakı, 14 noyabr, AZƏRTAC
Azərbaycan MDB ölkələri arasında diabet haqqında qanun qəbul edən ilk ölkədir. Ümumiyyətlə, Milli Məclisdə qadın və uşaq sağlamlığı ilə əlaqədar xeyli qanun qəbul edilib. Məsələn, vərəmlə mübarizə, talassemiya, xroniki böyrək çatışmazlığı ilə əlaqədar və digər xəstəliklərə dair çox mühüm qanun və proqramlar əhalinin sağlamlığına göstərilən qayğının təzahürüdür. Diabet xəstələrinin sağlamlıq vəziyyətlərini yaxşılaşdırmaq üçün də ayrılan vəsaitlərin həcmi ildən–ilə artırılır, onlara göstərilən qayğının yaxşılaşdırılması üçün addımlar atılır.
AZƏRTAC xəbər verir ki, bütün bunlar barədə Ailə, Qadın və Uşaq Problemləri üzrə Dövlət Komitəsi və Azərbaycan Diabet Cəmiyyətinin birgə təşkilatçılığı ilə keçirildiyi “dəyirmi masa”da söhbət açılıb.
Tədbiri giriş sözü ilə açan Diabet Cəmiyyətinin sədri Möminat Ömərova qeyd edib ki, Ümumdünya Şəkərli Diabetə Qarşı Mübarizə Günü münasibəti ilə təşkil edilən “dəyirmi masa” “Qadın və diabet” mövzusuna həsr olunub. O çıxışında bildirib ki, dünyada 10 qadından biri şəkərli diabet xəstəliyinə mübtəladır və onların çoxunun təhsil, müalicə və yardım almaq imkanı yoxdur. Tədbirin bu mövzuya həsr olunması ictimaiyyətin diqqətini onların problemlərinin yüngülləşməsi və həllinə yönəltmək məqsədi daşıyır.
Ailə, Qadın və Uşaq Problemləri Komitəsinin sədr müavini Sədaqət Qəhrəmanova cəmiyyətin əsas aparıcı qüvvəsi olan qadınların şəkərli diabet xəstəliyi ilə mübarizədə hökumət, qeyri-hökumət və ictimai birliklərin səyini birləşdirməyin vacib olduğunu söyləyərək deyib: ”Bu sahədə stiqmanın aradan qaldırılması və xəstəliyin aşkarlanması da çox mühüm məsələdir, çünki həmin səbəblər ucundan qadınlar arasında xəstə olduğunu bilməyənlər də var”.
Milli Məclisin üzvü, Səhiyyə Nazirliyinin baş endokrinoloqu Rafiq Məmmədhəsənov şəkərli diabet xəstələrinin problemlərinin dövlətin diqqət mərkəzində olduğunu, xəstələrin keyfiyyətli insulinlə təmin edildiyi, 18 yaşınadək müavinət aldığını və ildə bir dəfə pulsuz müayinə olunmaq hüququ olduğunu söyləyib. Baş endokrinoloq şəkərli diabet xəstəliyinin əsas səbəbinin genetika və stresslə, xüsusilə xəmir xörəkləri ilə çox qidalanma olduğunu ayrıca qeyd edib.
Milli Məclisin sosial qanunvericilik şöbəsinin müdiri Adilə Abbasova şəkərli diabet xəstələrinin sayının hər il 15 faiz artdığı və xəstələrin əmək hüququ barədə danışıb. O, 2003-cü ildən bəri bu sahədə qəbul edilən proqram və qanunların həmin xəstəliyə düçar olanlara göstərilən dövlət qayğısının təzahürü kimi dəyərləndirib.
“Dəyirmi masa”nın yekununda bu sahədə səyləri birləşdirməklə mövcud problemlərin həllinə nail olmağın mümkünlüyü qeyd edilib.