REGİONLAR
Şəkidə III ixtisas qrupu üzrə qəbul imtahanı üç mərkəzdə aparılıb
Şəki, 6 iyul, Mustafa Dadaşov, AZƏRTAC
Dövlət İmtahan Mərkəzinin (DİM) iyulun 6-da Şəki şəhərində keçirdiyi ali təhsil müəssisələrinə III ixtisas qrupu üzrə qəbul imtahanı başa çatıb.
DİM Şəki regional bölməsinin müdiri Səbuhi Hüseynov AZƏRTAC-ın bölgə müxbirinə bildirib ki, imtahanların keçirilməsi üçün Şəkidə 3 mərkəz ayrılıb. Qəbul imtahanları Şəki şəhər 8 nömrəli və Qoxmuq kənd tam orta məktəblərdə, həmçinin fizika-riyaziyyat və humanitar təmayüllü liseydə təşkil olunub. Ümumilikdə, 748 abituriyentin iştirakının nəzərdə tutulduğu imtahanların idarə olunmasına 9 imtahan rəhbəri və 72 nəzarətçi-müəllim cəlb edilib. İmtahanların keçirilməsi üçün 60 zal ayrılıb.
İmtahan zallarında abituriyentlərin rahat şəkildə imtahan verməsi üçün zəruri şərait yaradılıb. İmtahan saat 10:00-da başlanıb və 3 saat davam edib.
Regional bölmədən verilən məlumata görə, bütün imtahan mərkəzlərində III ixtisas qrupu üzrə qəbul imtahanı mövcud təlimata uyğun şəkildə aparılıb və heç bir qanun pozuntusuna yol verilməyib.