Bakı, 18 sentyabr, AZƏRTAC

Azərbaycan vəkilliyinin 100 illiyi münasibətilə keçirilən silsilə tədbirlər çərçivəsində sentyabrın 18-də Vəkillər Kollegiyasının sayca ikinci regional qurumunun – Şirvan regional vəkil bürosunun inzibati binası istifadəyə verilib.

Vəkillər Kollegiyasından AZƏRTAC-a bildiriblər ki, Azərbaycan Respublikası Prezidentinin ötən il fevralın 22-də imzaladığı Sərəncamın icrası çərçivəsində istifadəyə verilən büronun açılışında əvvəlcə iştirakçılar ümummilli lider Heydər Əliyevin Şirvan şəhərindəki abidəsi önünə gül dəstələri qoyub, dahi şəxsiyyətin əziz xatirəsini dərin ehtiramla yad ediblər.

Vəkillər Kollegiyasının sədri Anar Bağırov tədbirdə çıxış edərək bildirib ki, “Azərbaycan Respublikasında vəkilliyin inkişafı ilə bağlı əlavə tədbirlər haqqında” Azərbaycan Respublikası Prezidentinin 2018-ci il fevralın 22-də imzaladığı Sərəncamın icrası çərçivəsində bu il mayın 21-də Sumqayıt şəhərində ilk regional vəkil bürosunun açılışı olub və hazırda həmin qurum fəaliyyətini uğurla davam etdirir. Sərəncamın icrası çərçivəsində bu gün Şirvan şəhərində də regional vəkil qurumunun açılışı təmin edilib. Yaxın gələcəkdə Şəkidə və digər regionlarda da müvafiq bürolar fəaliyyətə başlayacaq.

Tədbirdə Şirvan Şəhər İcra Hakimiyyəti başçısının müavini Məharət Mustafayev, Şirvan Apelyasiya Məhkəməsinin sədri Rəşadət Ağayev, Şirvan şəhər prokuroru Natiq Abdullayev, Şirvan Şəhər Polis Şöbəsinin rəisi Hikmət Quliyev və Şirvan regional vəkil bürosunun rəhbəri Ruslan Mirzəyev çıxış edərək büronun fəaliyyətə başlaması münasibətilə təbriklərini çatdırıblar.

Şirvan şəhəri M.Ə.Rəsulzadə küçəsi 12 ünvanında dördmərtəbəli inzibati binanın birinci mərtəbəsində yerləşən büro Azərbaycan Respublikası Prezidentinin məlum Sərəncamının icrası məqsədilə 2018-ci il dekabrın 5-də Vəkillər Kollegiyasının əvəzsiz istifadəsinə verilib.

Vətəndaş məmnunluğunun, vətəndaşların və təşkilati-hüquqi formasından asılı olmayaraq, regionda yerləşən bütün idarə və təşkilatların hüquqi yardıma sürətli çatımlılığının təmin edilməsi, habelə Şirvan regional vəkil bürosunda normal iş şəraitinin yaradılması məqsədilə bina müasir standartlara uyğun təmir olunub, zəruri avadanlıqla təchiz edilib.

Azərbaycan Respublikası Prezidentinin 2018-ci il 22 fevral tarixli Sərəncamına uyğun olaraq, Şirvan Apelyasiya Məhkəməsinin yurisdiksiyasına daxil olan 21 rayon və şəhər üzrə bütün vətəndaşlar, habelə regiondakı bütün idarə və təşkilatlar Şirvan regional vəkil bürosunun hüquqi yardım üzrə xidmətlərindən yararlana biləcəklər.

Sonra regionda fəaliyyət göstərən vəkillərin iştirakı ilə müşavirə keçirilib. Müşavirədə Kollegiya tərəfindən vəkilliyin inkişafı ilə bağlı görülmüş işlər, əldə olunan nəticələr, qarşıda duran vəzifələr və vəkillərin qaldırdıqları məsələlər müzakirə edilib.