“TURİZM VƏ SƏYAHƏTLƏR” 3-CÜ AZƏRBAYCAN BEYNƏLXALQ SƏRGİSİ ƏRƏFƏSİNDƏ
“İteca Caspian” şirkətinin direktoru Fərid Məmmədov sərginin hazırlanmasında köməyə görə Gənclər, İdman və Turizm Nazirliyinin nümayəndələrinə təşəkkürünü bildirərək dedi ki, tədbirin təşkilatçıları Britaniyanın “İTE Group Plc” sərgi şirkəti və onun Qafqazdakı xüsusi nümayəndəsi olan “İteca Caspian” şirkətidir. Sərgiyə rəsmi dəstəyi isə Dünya Turizm Təşkilatı, Azərbaycan Turizm Sənayesinin İnkişafı İttifaqı, Ticarət və Sənaye Palatası göstərəcəklər.
F.Məmmədov bildirdi ki, sərgidə 18 ölkənin 70-dən çox şirkəti iştirak edəcəkdir. Burada kommersiya təşkilatları ilə yanaşı, Azərbaycan, Türkiyə, Ukrayna, Dağıstan, Avstriya və Misirin müvafiq nazirlikləri də təmsil olunacaqlar. Ekspozisiyanın ümumi sahəsi yarıbayarı artırılmışdır, ona görə də sərgi Heydər Əliyev adına İdman-Konsert kompleksində keçiriləcəkdir.
Ekspozisiyada Fransa, Misir, İtaliya, Türkiyə, Ukrayna, Qazaxıstan, Malta və İsveçrə şirkətləri daha fəal iştirak edəcəklər. Seyşel adalarının və Tailandın nümayəndələri isə tədbirə ilk dəfə gəlmişlər.
Gənclər, İdman və Turizm Nazirliyi Baş Turizm İdarəsinin nümayəndəsi Xanoğlan Güləliyev çıxışında vurğuladı ki, Azərbaycan rəhbərliyinin apardığı “açıq qapı” siyasəti, habelə uğurlu iqtisadi islahatlar həm xarici, həm də daxili turizmin inkişafına kömək edir. Nəinki beynəlxalq turizmin, eləcə də daxili turizmin təbliğinə mühüm töhfə verəcək indiki sərgi Azərbaycanın gözəl guşələrini xarici qonaqlar üçün açacaq, beynəlxalq turizm sahəsində işgüzar əlaqələrin genişləndirilməsinə imkan yaradacaqdır.
Azərbaycanla, onun tarixi və mədəniyyəti, xalqımızın milli xüsusiyyətləri və ənənələri ilə maraqlanan əcnəbi qonaqların sayı ildən-ilə artır. Yay ərəfəsində təşkil olunan bu sərgi yeni əlaqələri və işgüzar tərəfdaşlığı genişləndirməli, yeni beynəlxalq şirkətləri ölkəyə cəlb etməli və bununla da xarici sərmayələr axınını artırmalı, habelə əhalinin geniş dairəsinə istirahət yerlərini seçməyə imkan verməlidir.