Taxıl biçininin itkisiz və mütəşəkkil həyata keçirilməsi qarşıda duran əsas vəzifədir

Bakı, 24 may, AZƏRTAC

“Aqrolizinq” ASC cari ildə taxıl biçininin itkisiz və mütəşəkkil həyata keçirilməsi üçün fermer, mexanizator və kənd sakinlərinin maarifləndirilməsi ilə bağlı regionlarda görüşləri davam etdirir.

Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildiriblər ki, “Aqrolizinq” ASC-nin sədri vəzifəsini icra edən Elmin Rəhmanov Tərtərin təmas xəttində yerləşən Qazyan kəndində taxıl sahələrində fermerlər və kənd sakinləri ilə görüşüb. Görüşün keçirilməsində əsas məqsəd təmas xəttinə yaxın olan sahələrdə taxıl biçininə daha tez başlanılması, cəbhə xəttində yerləşən taxıl sahələrində ermənilərin təxribatı ilə törədilə biləcək yanğın hallarının baş vermə risklərinin minimuma endirilməsi, bu risklərin aradan qaldırılması istiqamətində işlərin görülməsi, taxıl biçininin vaxtında və itkisiz həyata keçirilməsinə nail olmaqdır. Həmçinin fermer və kənd sakinləri ilə daha yaxın ünsiyyətin qurulması, onların problem və şikayətlərinin yerindəcə həlli, eləcə də maarifləndirmə işlərinin aparılması da görüşün əsas məqsədlərindəndir.

Görüş zamanı Elmin Rəhmanov fermer və kənd sakinlərinin səsləndirdikləri problem və şikayətləri dinləyib, onların həlli istiqamətində tədbirlərin görüləcəyini bildirib. Bu taxıl biçini mövsümündə həyata keçiriləcək tədbirlər barədə onlara ətraflı məlumat verilib. Qeyd edib ki, taxıl biçininin itkisiz və mütəşəkkil həyata keçirilməsi qarşıda duran əsas vəzifədir.

Daha sonra Bərdə Dövlət Aqrar İnkişaf Mərkəzində “Aqrolizinq” ASC-nin Bərdə, Şəmkir, Yevlax Regional Nümayəndəliyinə daxil olan rayon bölmələrinin müdirləri və mexanizatorların iştirakı ilə iclas keçirilib. İclas zamanı cari ildə biçinin mütəşəkkil təşkil olunması, kombaynların dislokasiyası, məhsul biçininin itkisiz aparılması və respublikada ərzaq təhlükəsizliyi tədbirlərinin həyata keçirilməsi ilə bağlı vəzifə və öhdəliklərin layiqincə yerinə yetirilməsi üçün müvafiq göstəriş və tapşırıqlar verilib. Tədbirdə mexanizatorların problemləri dinlənilib və problemlərin həlli istiqamətində işlər görülüb, onların sualları cavablandırılıb.

Regionlarda taxıl biçininə hazırlıqla bağlı görüşlər mütəmadi davam etdirilir. Mayın 24-də Şəki və Qobustanda da maarifləndirici görüşlər keçiriləcək.