CƏMİYYƏT
Tibb xidməti polkovnik-leytenantı Surxay Məmmədov: Azərbaycan ordusunda COVID-19-a görə epidemioloji vəziyyət stabil və qənaətbəxşdir
Bakı, 16 fevral, AZƏRTAC
Müdafiə naziri general-polkovnik Zakir Həsənov Nazirlər Kabinetinin 2021-ci il 16 yanvar tarixli 48s nömrəli Sərəncamı ilə təsdiq edilmiş “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”nın icrasının təmin edilməsi barədə əmr imzalayıb, Azərbaycan ordusunda COVID-19 xəstəliyi əleyhinə könüllülük prinsipi əsasında peyvəndləmə işlərinə başlanılıb. Vaksinasiya Strategiyasına uyğun olaraq, ilk növbədə, risk qruplarına peyvənd vurulur. Vaksinasiyanın həyata keçirilməsi üçün Bakı qarnizonu üzrə Silahlı Qüvvələrin Baş Klinik Hospitalında, işğaldan azad olunmuş ərazilərdə və digər yerlərdə yerləşən müvafiq hospitallarda həkimlər və tibb bacılarından ibarət peyvənd qrupları təşkil olunub, bütün lazımi şərait yaradılıb.
AZƏRTAC xəbər verir ki, bunu Silahlı Qüvvələrin baş sanitar həkimi, tibb üzrə fəlsəfə doktoru, tibb xidməti polkovnik-leytenantı Surxay Məmmədov deyib.
“Məlum olduğu kimi Ümumdünya Səhiyyə Təşkilatı yeni növ koronavirus (COVID-19) infeksiyasının dünyada çox geniş yayılmasını və artan templə davam etməsini nəzərə alaraq ötən ilin martında onu pandemiya elan edib. Xəstəlik hələ pandemiya elan edilməzdən əvvəl Prezident İlham Əliyevin tapşırığı ilə Azərbaycan hökuməti qabaqlayıcı tədbirlər görməyə başlayıb. Müvafiq olaraq Azərbaycan Ordusunun şəxsi heyətinin COVID-19-a yoluxmasının qarşısının alınması üçün müdafiə naziri general-polkovnik Zakir Həsənov əmr imzalayıb və tədbirlər planı təsdiqləyib. Bundan əlavə müdafiə nazirinin qərarı ilə Azərbaycan Ordusunda COVID-19 xəstəliyinə qarşı profilaktik və əks-epidemik tədbirlərin aparılması ilə əlaqədar daxili sanitariya epidemioloji qaydalar təsdiq edilib.
Azərbaycan ordusunda COVID-19 xəstəliyinə qarşı mübarizə tədbirləri Ümumdünya Səhiyyə Təşkilatının tövsiyələrinə müvafiq olaraq Nazirlər Kabineti yanında Operativ Qərargahın qərar və göstərişlərinə uyğun təşkil edilib. Hərbi qulluqçuların COVID-19 infeksiyasından qorunması bu sahədə təbabətin qabaqcıl texnologiyaları əsasında hazırlanmış avadanlıq, cihaz, eləcə də mühafizə vasitələrindən istifadə olunmaqla həyata keçirilir. Xəstəliyin laborator diaqnostikasının həyata keçirilməsi üçün müvafiq standartlara cavab verən laboratoriya təşkil olunub və burada xaricdə təhsil almış və müvafiq treninqlər keçmiş yüksəkixtisaslı mütəxəssislər tərəfindən koronavirus infeksiyasının PZR üsulu ilə diaqnostikası aparılır. Bütün hərbi hissələr dərman preparatları, dezinfeksiyaedici maddələr və vasitələrlə tam təchiz olunub, onların ehtiyatı yaradılıb. Aparılan profilaktik tədbirlərin keyfiyyətinə gündəlik nəzarət olunur və bu barədə rəhbərliyə məruzə edilir.
Məhz Ali Baş Komandan, Prezident İlham Əliyev və Birinci vitse-prezident Mehriban Əliyevanın daimi diqqət və qayğısı, Ordu rəhbərliyinin ciddi tələbkarlığı, eləcə də hərbi həkimlərin fədakarlığı sayəsində Azərbaycan ordusunun epidemiya əleyhinə təminatı yüksək səviyyədə təşkil olunub. Belə ki, nə 44 günlük Vətən müharibəsinin gedişində, nə də ondan sonrakı dövrdə nəinki COVID-19, eləcə də digər yoluxucu xəstəliklərlə kütləvi xəstələnmə halları qeydə alınmayıb. Həyata keçirilmiş epidemiya əleyhinə effektli tədbirlərin nəticəsidir ki, hazırda Azərbaycan ordusunda COVID-19 xəstəliyinə görə epidemioloji vəziyyət stabil və qənaətbəxşdir”, - deyə S.Məmmədov bildirib.