REGİONLAR
“Turan Tovuz” futbol klubu yenidən Azərbaycan Premyer liqasinda iştirak edəcək – FOTO VİDEO
Tovuz, 4 iyun, Ruslan Novruzoğlu, AZƏRTAC
Tovuzda futbol ənənəsi artıq 100 illik tarixə malikdir. Almanların 1912-ci ildən etibarən bu rayonda məşhurlaşdırdığı futbol tovuzluların sevimli məşğuliyyətinə çevrilib. Təsadüfi deyil ki, sovet dönəmində tovuzlular SSRİ yüksək liqasında “Neftçi” və “Dinamo”nun heyətində çıxış ediblər. “Məhsul” komandası 1957-ci ildə ilk dəfə olaraq ölkə kubokunu Bakıdan qırağa, yəni Tovuza gətirmişdi.
9 il bundan əvvəl maliyyə çətinlikləri səbəbindən Premyer Liqada mübarizəsini dayandıran “Turan Tovuz” klubu bu mövsümdən yenidən Azərbaycan Premyer Liqasinda iştirak edəcək.
AZƏRTAC xəbər verir ki, müstəqil Azərbaycanı ilk dəfə avro kuboklarda təmsil etmək şərəfi də məhz Turan Tovuz” futbol klubuna qismət olub. Komanda yüksək dəstədə 1 dəfə çempion adını qazanıb, 2 dəfə isə bürünc medala sahib olub. Klub Azərbaycan futboluna Nizami Sadıqov, Sakit Alıyev, Nadir Nəbiyev, Nizami Ocaqverdiyev və onlarla futbolçu qazandırıb. Elə bu komandanın adı ilə bağlı olan bəzi ilk və rekordlar necə böyük və əzəmətli olduğunun nümunəsidir. "Yeniliklərə gəldikdə, biz axtarışdayıq. Biz əsasən də gənc, yerli futbolçulara üstünlük verəcəyik. Sübut edəcəyik ki, bizdə yerli futbolçular var. Premyer Liqada yaxşı çıxış edib bunu sübut edəcəyik. Bu akademiya tikiləndə bizə AFFA rəhbərliyi dedi ki, Tovuzda futbolçu çoxdur və biz onları üzə çıxarmalıyıq. Bizim əsas məqsədimiz Tovuz və ətraf rayonlarda olan gənc futbolçuları inkişaf etdirib, onları yığma komandaya yetişdirməkdir”, - deyə “Turan Tovuz” futbol klubunun müşahidə şurasının sədri Oktay Abdullayev bildirib.
“Turan Tovuz” klubu futbolumuza bir sıra yeniliklər gətirməsi ilə tarixə düşüb. Elə 2002-ci ildə türk mütəxəssis Naci Şensoyu komandaya dəvət etməsi ilə ilk əcnəbi çalışdırıcısı olan klub oldu. Bu gün komanda heyəti daha həvəslə, daha əzmlə qarşıdakı oyunlara hazırlaşır. Artıq onlar divizionda deyil, Premyer Liqada mübarizə aparacaqlar.
Ötən il klubun nəzdində FİFA və UEFA-nın maliyyə dəstəyi ilə AFFA tərəfindən inşa olunmuş Futbol Akademiyasının açılışı olub. Akademiyada hazırda 200-dən çox futbolçunun inkişafı üçün 20-yə yaxın peşəkar məşqçi, texniki və tibbi personal çalışır.