Bakı, 3 oktyabr, AZƏRTAC

Oktyabrın 3-də “Ulu öndər Heydər Əliyev müstəqil Azərbaycanın qurucusudur” mövzusunda dəyirmi masa keçirilib.

AZƏRTAC xəbər verir ki, “Səs" qəzetinin redaksiyasında təşkil edilən tədbir ulu öndər Heydər Əliyevin 1993-cü il oktyabrın 3-də Azərbaycan Respublikasında Prezident seçilməsi və Azərbaycan Respublikasının Prezidenti İlham Əliyevin Sərəncamı ilə 2023-cü ilin “Heydər Əliyev İli” elan olunmasına həsr edilib.

Tədbiri giriş sözü ilə açan “Səs" Media Qrupunun rəhbəri Bəhruz Quliyev Azərbaycanda dövlət quruculuğunun, iqtisadi dirçəlişin, sosial-siyasi həyatda tərəqqinin ümummilli lider Heydər Əliyevin adı ilə bağlı olduğunu bildirib. Qeyd olunub ki, Ulu Öndər Azərbaycanı bir dövlət, xalqımızı isə bir millət kimi tarixin ağır və çətin sınaqlarından uğurla çıxararaq uzaqgörənliyi, fədakarlığı, müdrikliyi ilə müstəqil dövlətimizin təməlini möhkəmləndirib. Ölkəmizin qazandığı bütün uğur və nailiyyətlər, inkişaf və tərəqqi, xalqımızın milli dəyərlərinin qorunması Heydər Əliyev şəxsiyyətinin nəticələridir.

Ulu Öndərin Azərbaycan xalqı və dövlətçiliyi üçün gördüyü misilsiz işlərdən danışan B.Quliyev bildirib ki, Ümummilli Lider öz xalqını çox sevirdi və milli mənsubiyyətinə çox sadiq idi. “Azərbaycan Prezidenti İlham Əliyev Ulu Öndərin layiqli varisi olduğunu sübut etdi və ata vəsiyyətini yerinə yetirdi”, - deyə Bəhruz Quliyev vurğulayıb.

Milli Məclisin İntizam Komissiyasının sədri, iqtisad elmləri doktoru Eldar İbrahimov diqqətə çatdırıb ki, bütün mənalı ömrünü Azərbaycan xalqının tərəqqisinə həsr etmiş ulu öndər Heydər Əliyev özünün əməli fəaliyyəti ilə doğma xalqının əbədi məhəbbətini qazanıb. Ümummilli Liderin Azərbaycan xalqı üçün gördüyü işlərdən danışan E.İbrahimov 2023-cü ilin “Heydər Əliyev İli” elan edilməsindən məmnunluğunu ifadə edərək deyib: “Azərbaycanda “Şuşa İli”ndən sonra “Heydər Əliyev İli”nin qeyd edilməsi əlamətdar hadisədir. Qarabağı, Şuşanı azad görmək ulu öndər Heydər Əliyevin ən böyük arzusu idi”.

Qeyd olunub ki, sentyabrın 3-ü müstəqil Azərbaycanın tarixində ən əsas və önəmli yerlərdən biridir, Heydər Əliyev Naxçıvan Muxtar Respublikası Ali Məclisinə Sədr seçilməsəydi, Naxçıvan və Azərbaycanın gələcək taleyi hələ də müəmmalı idi. 1990-cı il iyul ayının 22-də Heydər Əliyevin Naxçıvana gəlməsi, elə həmin il noyabrın 17-də Naxçıvan Muxtar Respublikası Ali Sovetinin sessiyasında, ilk dəfə 1918-ci ildə Azərbaycan Xalq Cümhuriyyəti tərəfindən qəbul olunmuş Azərbaycan Bayrağının qaldırılması böyük hadisə idi.

Ulu Öndərin müstəqil Azərbaycanın qurucusu olduğunu bildirən Milli Məclisin İntizam Komissiyasının sədri müstəqil və suveren Azərbaycanın Ümummilli Liderin indiki və gələcək nəsillərə əmanəti olduğunu vurğulayıb. Bildirilib ki, Ulu Öndər Azərbaycanın çətin dövründə xalqın xilaskarı və müstəqilliyimiz üçün dayaq olub. Xalq çətin vəziyyətdə nicat yolunu məhz ulu öndər Heydər Əliyevdə gördü. Təsadüfi deyil ki, onun yenidən hakimiyyətə gəldiyi gün Azərbaycan Respublikasının dövlət bayramı – Milli Qurtuluş Günü kimi qeyd olunur.

1993-cü il oktyabrın 3-ü tarixinin Azərbaycanın müstəqillik tarixinin xüsusi günlərindən biri olduğunu diqqətə çatdıran Ailə, Qadın, Uşaq Problemləri üzrə Dövlət Komitəsinin sədri Bahar Muradova məhz Ulu Öndərin xidmətləri və əsasını qoyduğu siyasət sayəsində Azərbaycanın regionda aparıcı aktorlardan birinə çevrildiyini vurğulayaraq deyib. “Biz bu dahi şəxsiyyəti ehtiramla anırıq. Azərbaycan xalqı 1993-cü il oktyabrın 3-də bir nəfər kimi öz xilaskarına səs verdi. Çünki xalq ona inanır və etibar edirdi”.

Bahar Muradova vurğulayıb ki, ümummilli lider Heydər Əliyevin Azərbaycan xalqı qarşısında müstəsna xidmətləri bitib-tükənmir.

Azərbaycanın ilk Konstitusiyasının qəbul olunması və ölkədə köklü islahatların həyata keçirilməsi, demokratik, hüquqi dövlət quruculuğu, nizami ordunun yaradılması məhz Ulu Öndərin adı ilə bağlıdır.

Milli Məclisin deputatı Jalə Əliyeva bildirib ki, Ulu Öndər əməlləri, sözləri ilə örnək olan və arxasınca böyük bir xalqı aparmaq qabiliyyətinə malik bir şəxsiyyət idi. “Bizim hər birimiz ona borcluyuq. Əgər biz bu gün varıqsa, dövlətimiz varsa, dövlətçiliyimiz varsa, bütün bunlara görə Ulu Öndərə borcluyuq. Bu gün onun irsini qoruyaraq olduğu kimi gələcək nəsillərə çatdırmaq bizim borcumuzdur”, - deyə deputat vurğulayıb.

Yeni Azərbaycan Partiyası İdarə heyətinin üzvü professor Amin İsmayılov vurğulayıb ki, biz Ulu Öndərin yüzilliyinə Müzəffər Ali Baş Komandanımız İlham Əliyevin rəhbərliyi ilə Azərbaycanın ərazi bütövlüyünü və Şuşanı hədiyyə etdik. Ulu Öndərin ruhu indi şaddır. “Gənclərimizdə müqəddəs bayrağımıza, dövlət atributlarına sevgi o qədər böyükdür ki, məhz bu amil Vətən müharibəsində önəmli rol oynadı”, - deyə A.İsmayılov qeyd edib.

Digər çıxış edənlər müasir gəncliyin inkişafında Ulu Öndərin misilsiz rolunu vurğulayıb, bu gün ölkəmizdə gənc nəslə göstərilən diqqət və qayğıdan danışıblar.