CƏMİYYƏT
Uşaq Hüquqları haqqında Konvensiyanın 31-ci ildönümü münasibətilə beynəlxalq konfrans keçirilib
Bakı, 20 noyabr AZƏRTAC
Noyabrın 20-də Ailə, Qadın və Uşaq Problemləri üzrə Dövlət Komitəsinin dəstəyi və Uşaq Səfirlər Məclisinin təşəbbüsü ilə BMT-nin Uşaq Hüquqları haqqında Konvensiyasının 31-ci ildönümü münasibətilə “Uşaq hüquqları: uşaqlar müzakirəyə qoşulur” mövzusunda onlayn beynəlxalq konfrans keçirilib.
AZƏRTAC xəbər verir ki, 20 noyabr-Uşaq Hüquqlarının Müdafiəsi Günü münasibətlə uşaqları təbrik edən Ailə, Qadın və Uşaq Problemləri üzrə Dövlət Komitəsinin sədri Bahar Muradova hər bir ölkənin gələcəyinin uşaqların düzgün tərbiyə olunmasından, təhsil səviyyəsindən, milli-mənəvi, eləcə də insani keyfiyyətlərinin püxtələşməsindən asılı olduğunu bildirib.
Azərbaycanda uşaq hüquqlarının tam şəkildə reallaşması məqsədilə mükəmməl hüquqi bazanın yaradıldığını qeyd edən komitə sədri bu günün dünyanın əksər ölkələrində olduğu kimi, Azərbaycanda da yüksək səviyyədə qeyd edildiyini, eyni zamanda, Uşaq Hüquqları üzrə Konvensiyanı 1992-ci ildə ratifikasiya edən ilk dövlətlərdən birinin elə məhz ölkəmiz olduğunu diqqətə çatdırıb. B.Muradova Konvensiyanın BMT tərəfindən qəbul edilmiş bir saziş kimi uşaqların yaşaması və inkişafı üçün zəruri olan minimum standartları müəyyən etdiyini və uşaq hüquqlarının təmin edilməsi sahəsində ilk universal kodeks olduğunu vurğulayıb.
Bahar Muradova Komitənin bütün tərəfdaşlarla birgə uşaq siyasətinin həyata keçirilməsi istiqamətində üzərinə düşən öhdəlikləri yerinə yetirməyə çalışdığını və bu işdə uşaqların da yaxından iştirak etdiyini, maraqlı fikir və təkliflərini bölüşərək ümumi işə böyük töhfələr verdiklərini bildirib. Azərbaycan Respublikası Prezidentinin 2020-ci ilin “Könüllülər ili” elan edilməsi ilə əlaqədar Komitə tərəfindən yaradılan Uşaq Səfirlər Məclisinin fəaliyyətinin əhəmiyyətini qeyd edən B.Muradova deyib ki, Məclisin yaradılmasında məqsəd uşaqların öz hüquqlarının müdafiəsində iştirakının təmin olunması, eləcə də onlarda müstəqil özünüifadəetmə bacarığının, idarəetmə mədəniyyətinin formalaşdırılmasıdır.
Müxtəlif ölkələrdən uşaqların iştirakı ilə keçirilən beynəlxalq konfransda Azərbaycanı təmsil edən Yunis Quliyev, Rifah Zeynalov və Rüfət Məmmədov ölkəmizdə uşaq hüquqlarının müdafiəsi, onların hərtərəfli inkişafının təmin olunması istiqamətində həyata keçirilən vacib tədbirləri və atılan mühüm addımları diqqətə çatdırıblar. Bildirilib ki, Azərbaycanda uşaq hüquqlarının müdafiəsi təkcə müvafiq qanunvericilik aktlarının qəbul edilməsi ilə yekunlaşmır, eyni zamanda, bu istiqamətdə konkret tədbirlərin təşkil olunması yolu ilə reallaşdırılır və bu işdə uşaqların iştirakının təmin olunması üçün əlverişli şərait yaradılır.
Konfrans çərçivəsində uzun illər davam edən Ermənistan-Azərbaycan münaqişəsi haqqında məlumat verən çıxışçılar bu münaqişədən xüsusilə uşaqların əziyyət çəkdiyini, sentyabrın 27-dən başlayan və ölkəmizin Qələbəsi ilə bitən Vətən müharibəsi zamanı mülki əhaliyə qarşı yönələn erməni terroru nəticəsində 12 uşağın qətlə yetirilməsinin, 50 uşağın yaralanmasının uşaq hüquqlarının pozulmasının bariz nümunəsi olduğunu diqqətə çatdırıblar.
Konfransda 14 ölkədən, ümumilikdə, 25 uşaq iştirak edib.
Böyük Britaniya, Türkiyə, Latviya, Macarıstan, Qırğızıstan, Özbəkistan, Qazaxıstan, Pakistan, Gürcüstan, Rusiya, Hindistan, İran, Birləşmiş Ərəb Əmirliklərinin təmsilçiləri çıxışlarında bütün uşaqlar üçün bərabər imkanların yaradılması, təhsil, səhiyyə və ictimai xidmətlərə çıxışın təmin edilməsi, uşaqların zorakılıqdan müdafiəsi, erkən nikahların, uşaq əməyinin, uşaq istismarının qarşısının alınması, eyni zamanda, uşaqlar üçün təhlükəsiz dünyanın yaradılması, uşaq hüquqlarını əhatə edən məsələlərlə bağlı qərarların qəbulunda onların iştirakçılığının təmin olunmasının əhəmiyyətini vurğulayıblar.
Pakistan və Böyük Britaniyanı təmsil edən iştirakçılar xüsusilə münaqişə nəticəsində uşaqların zərər çəkməsi, onların doğma evlərindən ayrı düşməsi məsələsinə diqqət çəkib, azyaşlıların hüquqlarının pozulmasının onları təəssüfləndirdiyini vurğulayıblar.
Konfrans“Beynəlxalq uşaq platformasının yaradılması ilə bağlı təkliflərin müzakirəsi ilə davam edib.