Mingəçevir, 26 fevral, AZƏRTAC

Bərdə Regional Mədəniyyət İdarəsi Mingəçevir şəhər Üzeyir Hacıbəyli adına 11 illik musiqi məktəbinin və Türkiyənin Araz Doğa Sporları və Kültür Klubu Dərnəyinin təşkilatçılığı ilə Xocalı faciəsinin 29-cu ildönümünə həsr olunmuş onlayn görüş keçirilib.

Regional İdarədən AZƏRTAC-ın bölgə müxbirinə bildirilib ki, tədbirdə Üzeyir Hacıbəyli adına 11 illik musiqi məktəbinin direktoru Vüsal Məmmədov erməni millətçilərinin keçmiş SSRİ-nin 366-cı motoatıcı alayının köməyi ilə 1992-ci il fevralın 25-dən 26-na keçən gecə Xocalıda törətdikləri qırğının acı nəticələrindən danışıb. Ermənilərin 29 il əvvəl Xocalıda törətdikləri bu qətliamı, amansızlıq və vəhşiliyi bütün bəşəriyyətə qarşı yönəlmiş ən dəhşətli vandalizm aktı adlandırıb.

Bərdə Regional Mədəniyyət İdarəsinin məsləhətçisi Orxan İbrahimov çıxışında bildirib ki, Хоcalı soyqırımı özünün siyasi-hüquqi qiymətini yalnız ümummilli lider Heydər Əliyev hakimiyyətə qayıtdıqdan sonra alıb və bundan sonra Azərbaycan reallıqlarının beynəlxalq ictimaiyyətə çatdırılması üzrə məqsədyönlü tədbirlər görülməyə başlanılıb. 1994-cü ildə Azərbaycan Milli Məclisi fevralın 26-nı Xocalı Soyqırımı Günü elan edib. Bu gün dünya ictimaiyyətinin Xocalı həqiqətləri barədə məlumatlandırılması istiqamətində işlər davam etdirilir. Prezident İlham Əliyevin apardığı ardıcıl və məqsədyönlü siyasətin nəticəsidir ki, artıq beynəlxalq təşkilatlar, aparıcı dövlətlər münaqişənin kökləri, səbəbləri və nəticələri barədə daha geniş məlumatlandırılır.

Tədbirdə Araz Doğa Sporları və Kültür Klubu Dərnəyinin rəhbəri Serpil Önal vurğulayıb ki, Xocalıda törədilən cinayətlər sıradan və təsadüfi deyil, Ermənistanın sistemli zorakılıq siyasətinin tərkib hissəsidir. Xocalıda mülki insanlar məhz azərbaycanlı olduqları üçün kütləvi qırğına məruz qalıblar.

Araz Doğa Sporları və Kültür Klubu Dərnəyinin yazarı Yurdsevən Şən Azərbaycanla Türkiyə arasında dostluq və qardaşlıq əlaqələrindən bəhs edib. İki qardaş ölkə arasında olan münasibətlərin uğurla inkişaf etdiyini və gözəl nəticələrinin olduğunu bildirib.

Tədbirdə 2020-ci il sentyabrın 27-də başlanan 44 günlük müharibədə Prezident, Ali Baş Komandan İlham Əliyevin rəhbərliyi ilə Azərbaycan Ordusunun qazandığı şanlı qələbədən də bəhs edilib. Bildirilib ki, Vətən müharibəsində Prezident Rəcəb Tayyib Ərdoğanın liderliyi ilə Türkiyənin Azərbaycanın haqq işinə dəstək verməsi dövlətlərimiz və xalqlarımızın ən çətin sınaq məqamlarında ürəkdən gələn birlik və həmrəyliyinin canlı təcəssümüdür.

Sonda musiqi məktəbinin müəllimləri “Qarabağ şikəstəsi" və "Ay Laçın” mahnısını ifa ediblər.