Bakı, 29 iyun, AZƏRTAC

Bu gün Azərbaycanda xroniki böyrək çatışmazlığından əziyyət çəkən 2900-dən artıq xəstə hemodializlə təmin olunub.

AZƏRTAC xəbər verir ki, bu rəqəm xroniki böyrək çatışmazlığından əziyyət çəkən insanlara dövlət qayğısı ilə bağlı iyunun 29-da 1 saylı Kliniki Tibbi Mərkəzdə keçirilən “dəyirmi masa”da səslənib.

Tədbirdə qeyd olunub ki, xroniki böyrək çatışmazlığı uzun sürən böyrək xəstəliyi nəticəsində əmələ gəlir. Azərbaycanda hemodializ qəbul edən xəstələrin əksəriyyətində böyrək xəstəliyinə səbəb şəkərli diabetdir. Həmçinin böyrək çatışmazlığı xəstəliyinin müalicəsində mövcud problemlərdən də danışılıb.

Hazırda 171 həkim və 408 orta tibb işçisinin dializ müalicəsi ilə məşğul olduğu diqqətə çatdırılıb. Eyni zamanda, son illərdə regionlarda açılan yeni dializ mərkəzlərinin əhalinin dövlət hesabına müalicə almasına imkan yaratdığı, artıq hemodializ növbəsinin aradan qaldırıldığı vurğulanıb.

“Dəyirmi masa”da çıxış edən akademik M.Cavadzadə adına Respublika Klinik Uroloji Xəstəxanasının hemodializ şöbəsinin müdiri Fariz Babayev bildirib ki, hər kəs üçün bərabər şərait yaradılıb. Bu ilin yanvar ayının 1-dən indiyə qədər 600-ə yaxın xəstə hemodializ müalicəsi alıb. Onun sözlərinə görə, Azərbaycanda bu xəstəliyə daha çox orta yaşlı insanlarda rast gəlinir. Hemodializ alan xəstələrin 57 faizi kişi, 43 faizi isə qadınlardır.

Şöbə müdiri əlavə edib ki, Azərbaycanda ancaq qohumlardan böyrək köçürülmələri həyata keçirilir. Hazırda böyrək köçürülməsi üçün 300-dək xəstə növbə gözləyir.

Kliniki Tibbi Mərkəzin hemodializ şöbəsinin müdiri Mirhəşim Cəlalov isə bildirib ki, hazırda xəstəxanada böyrək çatışmazlığı xəstəliyindən əziyyət çəkən 443 nəfər dializ müalicəsi alır. Onun sözlərinə görə, bu gün ölkədə Səhiyyə Nazirliyinin göstərişinə əsasən hemodializ xəstələri 70 adda dərmanla təmin olunurlar.

Tədbirdə diqqətə çatdırılıb ki, Nazirlər Kabineti tərəfindən 2006-cı və 2010-cu illərdə xroniki böyrək çatışmazlığı üzrə tədbirlər proqramlarının qəbulu ilə əlaqədar bu xəstələrin aşkarlanması və aktiv müalicəyə cəlb olunması, eləcə də xəstələrin dövlət vəsaiti hesabına ixtisaslaşdırılmış müalicə ilə təminatı mümkün olub. Hazırda Nazirlər Kabinetinin 2016-cı il 28 yanvar tarixli qərarı ilə yeni qəbul edilən və 2016-2020-ci illəri əhatə edən “Xroniki böyrək çatışmazlığı üzrə Tədbirlər Proqramı” nefroloji yardımın daha da təkmilləşdirilməsinə, yeni dializ mərkəzlərinin yaradılmasına, xroniki böyrək çatışmazlığı olan xəstələrin ömrünün uzadılmasına, onların həyat keyfiyyətinin yaxşılaşdırılmasına və tibbi-sosial reabilitasiyasına, hemodializ müalicəsi alan və böyrək köçürülmüş xəstələrin davamlı dərman təminatına yönəlib.