REGİONLAR
YAP Sumqayıt şəhər təşkilatında “Xalq üçün yaşanan ömür” adlı elmi-praktik konfrans keçirilib
Sumqayıt, 9 may, Ətrabə Rzayeva, AZƏRTAC
YAP Sumqayıt şəhər təşkilatında ümummilli lider Heydər Əliyevin doğum gününün 99-cu ildönümünə həsr olunmuş “Xalq üçün yaşanan ömür” adlı elmi-praktik konfrans keçirilib. Tədbirdə YAP İdarə Heyətinin üzvü, YAP Sumqayıt şəhər təşkilatının sədri Ramiz Hüseynov, YAP İdarə Heyətinin üzvü, Milli Məclisin İqtisadi siyasət, sənaye və sahibkarlıq komitəsinin sədri, deputat Tahir Mirkişili, Sumqayıt Şəhər İcra Hakimiyyəti başçısının birinci müavini Teymur Səmədov, müavini Akif Quliyev, ərazi partiya təşkilatlarının sədrləri və siyasi fəallar iştirak etdilər.
AZƏRTAC xəbər verir ki, konfrans iştirakçıları əvvəlcə bir dəqiqəlik sükutla ümummilli lider Heydər Əliyevin əziz xatirəsini dərin ehtiramla yad etdilər.
YAP Sumqayıt şəhər təşkilatının sədri Ramiz Hüseynov konfransı açaraq tarixə, siyasi proseslərə nəzər salaraq qeyd edib ki, Heydər Əliyev irsi Azərbaycan xalqını parlaq gələcəyə aparan milli sərvətimizdir. Ümummilli Lider böyük tarixi şəxsiyyət, müstəqil Azərbaycanın qurucusu, onun banisidir. XX əsrin ikinci yarısında fenomen şəxsiyyət Heydər Əliyevin yaratdığı milli dövlətçilik tarixin bizə bəxş etdiyi milli sərvətdir və onun dəyəri illər keçdikcə daha dərindən dərk olunur. Bu, ulu öndər Heydər Əliyevin böyük siyasətinin bu günümüzə və uzaq gələcəyə hesablanmasının aydın ifadəsidir.
Qeyd edilib ki, tarixi faktlar bu reallığı da təsdiqləyir ki, siyasi liderliyin mahiyyəti dövlətin, xalqın milli maraqlarına cavab verən inkişaf yolunu müəyyənləşdirmək, ölkəyə uğur gətirən, daim yüksəkləri fəth etməyi şərtləndirən siyasəti təmin etməkdir. Ümummilli Lider cismən aramızda olmasa da, onun siyasi xətti siyasi idarəçiliyin, milli quruculuğun nəzəriyyəsinə, alternativi olmayan dövlətçilik fəlsəfəsinə çevrilib. Son illərin mənzərəsi ulu öndər Heydər Əliyevin arzularının reallığa çevrildiyini göstərir.
“44 günlük Vətən müharibəsinin Azərbaycanın tam qələbəsi ilə başa çatması, Ermənistanın işğalı altında olan torpaqlarımızın azad olunması dünya azərbaycanlıları tərəfindən böyük sevinc və qürur hissi ilə qeyd olunur. Bir sözlə, Ümummilli Liderimizin torpaqlarımızın işğaldan azad olunması istiqamətində əsasını qoyduğu işin onun layiqli davamçısı olan Müzəffər Ali Baş Komandan İlham Əliyev tərəfindən başa çatdırılması zəngin dövlətçilik ənənələrinə malik Azərbaycanın ən böyük Qələbəsidir. Nəticə etibarilə, müstəqil Azərbaycan Heydər Əliyevin əbədiyaşar ideyaları və Prezident İlham Əliyevin uğurlu strateji kursu nəticəsində öz qüdrətini günbəgün artırır, yeni hədəflərə, nailiyyətlərə doğru əmin addımlarla irəliləyir”, - deyə R.Hüseynov bildirib.
Çıxış edən deputat Tahir Mirkişili qeyd edib ki, dahi insan Heydər Əliyev tarixi yazan və yaradan, onu yönəltməyi, həmçinin fövqündə durmağı bacaran, dövlət idarəçiliyi, siyasi təlimlər elmini öz fəaliyyəti ilə diktə edən nadir şəxsiyyətlərdən biri idi. Heydər Əliyevin Azərbaycanın müstəqil dövlət quruculuğuna aparan yolu 1969-cu ildən – məhz Onun birinci dəfə hakimiyyətə gəlişindən sonra başlayıb. XX əsrin sonu Azərbaycan xalqının həyatında taleyüklü bir dövr kimi xarakterizə olunur. Həmin dövrdə baş verən hadisələr ulu öndər Heydər Əliyevin hakimiyyətə qayıdışını şərtləndirib: “1993-cü ildə onun yenidən hakimiyyətə qayıdışı nəticəsində Azərbaycan sabitlik məkanına çevrildi. Ümummilli lider Heydər Əliyev Azərbaycan xalqının yaddaşında qurucu və xilaskar dövlət xadimi, milli lider və xalq məhəbbətini qazanan öndər kimi qalıb. Xalqımızın tarixi taleyində, mənəvi, siyasi və ictimai həyatında, dövlət quruculuğunda Onun qədər misilsiz xidmətlər göstərən ikinci dövlət adamı tapmaq mümkün deyildir. Bu mənada O, xalqımızın milli iftixarı, ürəklərimizdə özünə yer tapan milli liderimiz, güvənc yerimiz, qürur duyduğumuz və arxa bildiyimiz böyük azərbaycanlıdır. Həyatının mənasını xalqa və dövlətə xidmətdə görən Öndərimiz bu müqəddəs amal uğrunda ən çətin maneələrə, problemlərə mərdliklə sinə gərən millət fədaisi kimi daim böyük ehtiramla, rəğbətlə anılır.
Deputat diqqətə çatdırıb ki, həyatını xalqına həsr edən Ulu Öndərin zəngin tarixə malik ictimai-siyasi, dövlətçilik fəaliyyəti xalqa və dövlətə xidmətin ən ali nümunəsi, ən parlaq təzahürüdür.
Digər çıxışçılar Heydər Əliyevin zəngin və mənalı ömür yolundan danışıb, Ümummilli Liderə sonsuz məhəbbətlərini bildiriblər.
Tədbirdə Yeni Azərbaycan Partiyasına yeni qəbul olunan gənclərə üzvlük vəsiqələri təqdim olunub.