REGİONLAR
Yeni sortlardan və sertifikatlı toxumlardan istifadə məhsuldarlığı 20-30 faiz artırır
Bakı, 3 iyun, AZƏRTAC
Kənd Təsərrüfatı Nazirliyinin və Əkinçilik Elmi-Tədqiqat İnstitutunun birgə təşkilatçılığı ilə Tərtər Bölgə Təcrübə Stansiyasında “Taxılçılıqda yeni sortlar və innovativ becərmə texnologiyaları” mövzusunda tarla müşavirəsi keçirilib. Tədbirdə kənd təsərrüfatı nazirinin müavini Sarvan Cəfərov, rayon icra başçısı Müstəqim Məmmədov, nazirliyin “Bitkiçiliyin təşkili və monitorinqi” şöbəsinin müdiri İmran Cümşüdov, Aqrar Xidmətlər Agentliyinin sədr müavini Cəfər Məhərrəmov, Azərbaycan Dövlət Aqrar Universitetinin rektoru İbrahim Cəfərov, kənd təsərrüfatı sahəsində fəaliyyət göstərən bir sıra özəl şirkətlərin təmsilçiləri və ətraf kəndlərdə taxılçılıqla məşğul olan fermerlər iştirak ediblər.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, tədbiri açan kənd təsərrüfatı nazirinin müavini Sarvan Cəfərov ölkədə ərzaq təhlükəsizliyinin təmin edilməsində məhsuldar və keyfiyyətli yeni taxıl sortlarının əhəmiyyətini vurğulayıb. Qeyd edib ki, toxumçuluq sahəsi ərzaq təhlükəsizliyinin təmin olunmasının əsas prioritet istiqamətlərindəndir. Bu sahənin inkişafı ilə bağlı son illərdə respublikanın 5 bölgəsində müasir tipli toxum emalı müəssisələri yaradılaraq fermerlərə xidmət göstərməsi təmin edilib, eyni zamanda, toxumçuluq üzrə təcrübə təsərrüfatlarının maddi-texniki bazası ən müasir avadanlıqlarla təchiz olunub. Bu sahədə fəaliyyətin səmərəli təşkili kənd təsərrüfatı bitkilərinin məhsuldarlığının və keyfiyyətinin yüksəldilməsinə əhəmiyyətli dərəcədə müsbət təsir göstərir. Kənd təsərrüfatı bitkilərinin yeni sortlardan və sertifikatlı toxumlardan istifadə məhsuldarlığı 20-30 faiz artırır. Tərtər Bölgə Təcrübə Stansiyasında əsasən dənli-taxıl bitkilərinin seleksiyası və toxumçuluğu ilə yanaşı, toxumçuluq sistemində yeni innovativ texnologiyalar tətbiq edilməklə keyfiyyətli toxum istehsalı, bitkilərin məhsuldarlığı və keyfiyyətinin yüksəldilməsi üçün müasir resursqoruyucu texnologiyalar, o cümlədən tirəli səpin və suvarma suyuna qənaət edən texnologiyaların tətbiqi istiqamətində elmi-tədqiqat işləri aparılır.
Daha sonra “Bitkiçiliyin təşkili və monitorinqi” şöbəsinin müdiri İmran Cümşüdov son illərdə baş verən iqlim dəyişikliyinin taxılçılığa təsiri və fermerlərin taxıl sortlarına olan tələblərinin dəyişilməsi məsələsinə toxunub. Bildirib ki, yüksək məhsuldarlıqla yanaşı, sortun həm də quraqlığa davamlı və tezyetişən olması vacibdir. Həmçinin o, taxılçılıqda resurslara qənaət etmək üçün yeni və innovativ becərmə texnologiyalarına keçidin zəruriliyini vurğulayıb.
Əkinçilik Elmi-Tədqiqat İnstitutunun direktoru Faiq Xudayev seleksiya proqramının əsas istiqamətlərindən danışıb. Qeyd edib ki, arzuolunan əlamətlərin yaradılan yeni taxıl sortlarına daxil edilməsində fermerlərin istəkləri nəzərə alınır.
Tədbirdə çıxış edən Aqrar Xidmətlər Agentliyinin sədr müavini Cəfər Məhərrəmov tədqiqat institutları tərəfindən yeni sortların toxumçuluğundan danışıb. O, çıxışında toxumçuluqda sort təmizliyinin təmin edilməsində ilkin toxumçuluğun düzgün təşkilinin vacibliyini vurğulayıb.
Təlimdə özəl şirkətlərin nümayəndələri yeni sortların sınağının aparılmasında və onların toxumçuluğunun təşkilində Əkinçilik Elmi-Tədqiqat İnstitutu ilə əməkdaşlığa hazır olduqlarını bildiriblər. Daha sonra iştirakçılar stansiyanın əkin sahəsində nümayiş etdirilən sortlara baxış keçiriblər.
Sonda Kənd Təsərrüfatı Nazirliyi tərəfindən pilot layihə olaraq sifon üsulu ilə suvarma texnologiyası nümayiş etdirilib.
Qeyd edək ki, bu texnologiya suvarma suyuna 15-20 faiz qənaət edir, suçunun əmək məsrəfini azaldır, ən vacibi istifadə olunan avadanlıqların qiymətlərinin əlverişli olması fermerlər üçün əlçatanlıq yaradır.