Zaqatala, 27 sentyabr, Mustafa Dadaşov, AZƏRTAC

Sentyabrın 28-dən 30-dək Zaqatala rayonunda II Beynəlxalq fındıq, qoz, şabalıd festivalı keçiriləcək.

Zaqatala Rayon İcra Hakimiyyətinin təşkilatçılığı, Mədəniyyət və Kənd Təsərrüfatı nazirliklərinin, Azərbaycan Fındıq İstehsalçıları və İxracatçıları Assosiasiyasının, Kənd Təsərrüfatı Nazirliyinin tabeliyindəki “Aqrar Tədarük və Təchizat” ASC-nin dəstəyi ilə reallaşacaq festivalın keçirilməsində əsas məqsəd ölkəmizin, eləcə də Zaqatala rayonunun iqtisadi, mədəni və turizm potensialını daha geniş nümayiş etdirməkdir.

AZƏRTAC-ın bölgə müxbiri xəbər verir ki, sentyabrın 27-də festivalın təşkilatçı qurumlarının rəsmilərinin iştirakı ilə bölgənin media təmsilçiləri üçün mətbuat konfransı keçirilib.

Zaqatala Rayon İcra Hakimiyyətinin başçısı Mübariz Əhmədzadə, “Aqrar Tədarük və Təchizat” ASC-nin İdarə Heyətinin sədri Leyla Məmmədova və Azərbaycan Fındıq İstehsalçıları və İxracatçıları Assosiasiyasının sədri İsmayil Orucov festivala hazırlıq işləri və nəzərdə tutulan tədbirlər barədə ətraflı məlumat veriblər.

Bildirilib ki, fındıqçılıq qeyri-neft sektoru üzrə ölkəmizə valyuta gətirən əsas sahələrdən biridir. Azərbaycan hazırda fındıq istehsalı üzrə dünya ölkələri arasında üçüncü yerdə qərar tutub. Ölkəmizdə fındıq istehsalının böyük hissəsi Zaqatala rayonunun payına düşür.

Diqqətə çatdırılıb ki, festivalda nazirlik və dövlət qurumlarının rəsmiləri, Milli Məclisin deputatları, ölkəmizdə fəaliyyət göstərən 20-dək xarici ölkə səfirliyinin nümayəndələri, ətraf rayonlardan dəvət olunmuş qonaqlar, fındıq istehsalçıları və ixracatçıları, rayon sakinləri iştirak edəcəklər.

Sonra media təmsilçilərinin sualları cavablandırılıb.

Festivalın təşkilatçı qurumlarının rəsmiləri daha sonra “Dədə Qorqud” meydanına gələrək, hazırlıq işlərinin gedişi ilə maraqlanıblar.

Xatırladaq ki, II Beynəlxalq fındıq, qoz, şabalıd festivalının rəsmi açılış mərasimi sentyabrın 28-də keçiriləcək. Rayon rəhbərliyi və festivala dəvət olunan qonaqlar əvvəlcə Ulu Öndərin abidəsi önünə gül dəstələri düzəcək, Heydər Əliyev Mərkəzi ilə tanış olacaqlar. Sonra Zaqatala Bölgə Təcrübə Stansiyasının “Pərzivan” ərazisindəki fındıq bağına və “Karaca fındıq” MMC-nin fındıq emalı zavoduna baxış keçiriləcək.

Zaqatala şəhərindəki “Dədə Qorqud” meydanında baş tutacaq rəsmi açılış mərasimindən sonra festival iştirakçıları fındıq, qoz və şabalıddan hazırlanmış əl işləri, rəsm və tətbiqi sənət nümunələrindən ibarət sərgilərə baxacaq, fındıq emalı və ixracı ilə məşğul olan müəssisələrin istehsal etdiyi məhsullarla tanış olacaqlar. Meydanda təşkil olunan yarmarkada fındıq, qoz və şabalıdın müxtəlif növləri nümayiş etdiriləcək. Festivalda fındıq, qoz və şabalıdla bağlı müsabiqələr də keçiriləcək, qaliblər mükafatlandırılacaq. Festivalın birinci günü Heydər Parkında təşkil olunacaq konsert proqramı ilə başa çatacaq.

Festivalın ikinci günü, sentyabrın 29-da Heydər Əliyev Mərkəzində fındıq və digər qərzəkli bitkilərin istehsalı, bu sahənin inkişafının perspektivlərinə həsr olunan simpozium keçiriləcək.

Sonuncu - üçüncü gün qərzəkli meyvələrin satış-yarmarkası təşkil olunacaq.