Gəncə, 25 fevral, Rauf Hacıyev, AZƏRTAC

Tərkibi qiymətli maddələrlə zəngin olan meyvə və giləmeyvə məhsulları insan qidasının mühüm hissəsini təşkil etməklə yanaşı, həm də bir çox xəstəliklərin müalicəsində əvəzsiz vasitədir. Meyvələrlə müalicə təbii olmaqla yanaşı, həm də çox faydalıdır.

Bu barədə AZƏRTAC-a danışan Azərbaycan Dövlət Aqrar Universitetinin professoru Zaur Həsənov deyib ki, meyvələrdən hələ qədim zamanlardan xalq təbabətində bir çox xəstəliklərin müalicəsində istifadə edilib. Bu işlə keçmişdə əsasən bilikli insanlar və loğmanlar məşğul olublar.

Meyvə və giləmeyvələrlə düzgün qidalanmaq insanın

psixi sağlamlığını sabitləşdirir, ovqatı isə yüksəldir

Alim qeyd edib ki, meyvələrlə müalicə insanın sağlam və uzun ömür yaşaması üçün təbii üsuldur. Hər bir meyvə və giləmeyvə tərkibindəki karbohidratların, yağların, zülalların, üzvi turşuların, fermentlərin, bioloji fəal maddələrin, xüsusən də vitaminlərin olması ilə qiymətlidir. Məhz meyvələrin tərkibinin bu cür zəngin olması orqanizmdə maddələr mübadiləsini, əsəb və qan-damar sistemini tənzimləyir, həzm prosesini gücləndirir, tonusu və immun qabiliyyətini artırır. Həmçinin meyvə və giləmeyvələrlə düzgün qidalanmaq insanın psixi sağlamlığını sabitləşdirir, dərini təravətləndirir, diqqəti artırır, hafizəni gücləndirir, ovqatı isə yüksəldir.

Alim bildirib ki, bəzi meyvələr ət, balıq və çörəkdən çox, kərə yağında olduğu qədər kalori verir. Meyvələrlə qidalandıqda tərkibindəki vitaminlər orqanizmdə qısa müddətdə mənimsənilir, maddələr mübadiləsi nizamlanır. Həmçinin orqanizmdə iştah əmələ gətirir, orqanların funksional fəaliyyətini gücləndirir, bədənin ağırlığını və baş verə biləcək xəstəliklərin qarşısını alır, orqanizmin xarici təsirlərə davamlılığını yüksəldir, qocalmanı ləngidir.

Çiyələk və moruq uşaqların sağlam böyüməsi üçün olduqca faydalıdır

Bir çox meyvə və giləmeyvənin faydasından danışan alim qeyd edib ki, moruğun giləsi və ondan emal olunan məmulatdan tərçıxaran vasitə kimi, nar şirəsindən mədə və qanlı ishal xəstəliklərinə, kök, gövdə, budaq, meyvə qabığından bağırsaq qurdlarına, heyvanın selikli toxumalarından isə öskürəyə qarşı istifadə edilməsi məsləhətdir.

Çiyələk və moruğun gilələri uşaqların sağlam böyüməsi üçün olduqca faydalıdır. Çiyələyin gilələrində olan mineral birləşmələr orqanizmdə möhkəmlik yaradır, körpələrin sümük toxumalarının normal inkişafını təmin edir, uşaqların xəstəliklərə müqavimətini yüksəldir. Bu bitkinin gilələri sinqa və mədə iltihabı xəstəliklərində, qara qarağatın gilələri qan-damar, qansızma, yara, xora, şiş xəstəliklərində, firəng üzümünün gilələri maddələr mübadiləsinin pozulmasında, piylənmədə, zeytun yağı qara ciyər, skleroz xəstəliklərində qiymətli tibbi vasitə hesab olunur. Çaytikanı yağı xüsusilə ağır cərrahi əməliyyatdan sonra yaraların sağalması, habelə şüalanmadan əmələ gəlmiş zədələrin, mədə yarasının, onikibarmaq bağırsağın, ginekoloji xəstəliklərin, hipertoniya, ekzema, anemiya, katarakt və başqa xəstəliklərin müalicəsində geniş istifadə edilir.

Şəkərli diabet xəstəliyinə tutulmuş insanlara qoz və fındıq ləpəsi xeyirlidir

Sitrus meyvələrinin tərkibində pozulmuş sinir sistemini normallaşdıran, qanı saflaşdıran və qanaxmanın qarşısını alan maddənin olduğunu deyən alim bildirib ki, xurma şirəsindən alınan preparatla zobdan orta və yüngül dərəcədə zəhərlənmələrə qarşı tibdə geniş istifadə olunur. Zoğalın çəyirdəyini qurudub üyüdərək, onun tozunu yaranın üzərinə səpməklə qısa vaxtda sağalmasına nail olmaq mümkündür. Həmçinin şəkərli diabet xəstəliyinə düçar olmuş xəstələrə qoz, fındıq ləpəsinin yeyilməsi tövsiyə olunur.

Fındıq unundan hazırlanmış peçenye körpələrdə

sümük toxumalarının möhkəmlənməsinə kömək edir

Fındıq unundan hazırlanmış peçenye isə körpələrdə sümük toxumalarının möhkəmlənməsinə kömək edir. Sistemli şəkildə meyvə-giləmeyvə qəbul edən orqanizm ateroskleroz, hipertoniya, mədə-bağırsaq, dizenteriya, müxtəlif yoluxucu, ürək-damar, daxili sekresiya vəzilərinin fəaliyyəti nəticəsində baş vermiş böyrək, qara ciyər, diabet, duz mübadiləsinin pozulması, piylənmə, qanazlığı, şüalanma və digər xəstəliklərdən azad olur.

Uzun illər apardığı ciddi elmi araşdırmaların nəticəsi olaraq nəşr olunan “Meyvələrlə müalicə (pomoterapiya)” kitabında bitki cinsləri arasında qruplaşdırılan bütün meyvə və giləmeyvələrin tərkibi, onların faydası, eləcə də müəyyən xəstəliklərə qarşı təsiri haqqında geniş məlumat verdiyini deyən Z.Həsənov bildirib ki, bu əsər sağlam və uzun ömür yaşamaq arzusunda olan hər bir oxucu üçün faydalı kitab ola bilər.