Zoologiya İnstitutunun əməkdaşı leşyeyən quşların ekoloji qiymətləndirmə sistemini hazırlayıb

Bakı, 12 noyabr, AZƏRTAC

Azərbaycan Milli Elmlər Akademiyasının Zoologiya İnstitutunun Onurğalılar zoologiyası laboratoriyasının aparıcı elmi işçisi aqrar elmlər üzrə fəlsəfə doktoru Tahir Kərimovun zoologiya ixtisası üzrə doktorluq dissertasiyasının müdafiəsi keçirilib.

Bu barədə AZƏRTAC-a Zoologiya İnstitutundan məlumat verilib. “Azərbaycanda leşyeyən quşların (Aegypius monachus, Gyps fulvus, Neophron percnopterus, Gypaetus barbatus) yayılması, biologiyası və mühafizəsi” mövzusunu əhatə edən tədqiqat işində Azərbaycan ərazisində sistemli şəkildə etoloji parametrlərin kompleks şəkildə öyrənilməsi əsasında leşyeyən quşların ekoloji qiymətləndirmə sistemi hazırlanıb. Növlərin zoocoğrafi yayılma yerlərinə, landşaft-biotop uyğunlaşmasına, yemlənmə şəraitinə, say dinamikasına, nəsilvermə xüsusiyyətinə, limit amillərinə aid yeni orijinal məlumatlar toplanılıb. Onların populyasiyalarının inkişaf istiqamətləri müəyyən edilib.

İddiaçı dissertasiya şurası üzvlərinin suallarını cavablandırıb və mövzu ətrafında geniş fikir mübadiləsi aparılıb.

Sonda şura üzvləri irad və təkliflərini bildirməklə yanaşı, mövzunun aktual olduğunu, işin Azərbaycan Respublikasının Prezidenti yanında Ali Attestasiya Komissiyasının dissertasiyalar qarşısında qoyduğu tələblərə cavab verdiyini qeyd ediblər.