SİYASƏT
AAKM-DƏ GÖRÜŞ
Berlin, 25 iyun (AZƏRTAC). Almaniyadakı Azərbaycanlıların Koordinasiya Mərkəzində (AAKM) Azərbaycan Respublikasında elan edilmiş Uşaq ili münasibətilə cəmiyyətlərarası görüş keçirilmişdir. Berlin şəhərinin müxtəlif dərnəklərindən olan qadın nümayəndələr və diasporun qadın fəalları tədbirdə iştirak etmişlər.
Görüşdə AAKM-nin icraçı direktoru, AAK-nin vise-prezidenti Samira Patser-İsmayılova “Azərbaycan qadını və onun diaspor fəaliyyətində rolu” mövzusunda məruzə etmişdir. Gənc mütəxəssislər Esranur Ozar (Hacıteppe Universitetinin doktorantı) və Maisə Əliyeva (Potsdam Universitetinin doktorantı) hazırladıqları “Ailə, ailə içi, uşaq və valideyn münasibətləri” mövzusunda sosial tədqiqat işini təqdim etdirmişlər. İştirakçı uşaqların rəsm müsabiqəsinə cəlb edilmələri çox böyük maraqla qarşılanmış və tədbirin sonunda bütün rəsmlər təntənəli sürətdə alqışlanmışdır.
Sonda Azərbaycan xalq və pop musiqisindən nümunələr səsləndirilmiş, qadınlar bir-birini özlərinin hazırladıqları ləzzətli təamlara qonaq edilmişlər.
Tədbirdə Alman-Azərbaycan Həmrəylik Cəmiyyətinin, Azərbaycan Evinin, Azərbaycan Kultur Ocağının, Azərbaycan Mədəniyyətinin Dostları Cəmiyyətinin, Alman-Azərbaycan Forumunun və digər dərnəklərin nümayəndələri, Berlin şəhərindəki fəal qadınlar iştirak etmişlər. Tədbirdə, cəmiyyətlərarası görüşlərin mütəmadi keçirilməsi, həftəsonu məktəblərin təşkil edilməsi qərara alınmışdır.
Vüqar Seyidov
AZƏRTAC-ın xüsusi müxbiri
Berlin