Lerik, 7 sentyabr (AZƏRTAC). “Konstitusiya” Araşdırmalar Fondu və bir sıra qeyri-hökumət təşkilatlarını birləşdirən “Açıq hökumətin təşviqi” Koalisiyası Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə “Açıq hökumətin təşviqi ilə bağlı maarifləndirmə, məlumatlandırma tədbirlərinin həyata keçirilməsi” layihəsi çərçivəsində cənub bölgəsində ictimai dinləmələr təşkil etmişdir.

AZƏRTAC xəbər verir ki, “Açıq Hökumətin təşviqinə dair 2012-2015-ci illər üçün Milli Fəaliyyət Planı” çərçivəsində həyata keçirilən tədbirlər: nəticələr və perspektivlər” mövzusunda Lənkəran, Astara və Lerik rayonlarında keçirilən ictimai dinləmələrdə dövlət orqanlarının, ərazi icra nümayəndələrinin, bələdiyyələrin, yerli qeyri-hökumət təşkilatlarının, kütləvi informasiya vasitələrinin və ictimaiyyətin nümayəndələri iştirak etmişlər.

Lerik Rayon Mədəniyyət Evində keçirilən tədbirdə çıxış edən rayon icra hakimiyyəti başçısının müavini Arzu Vəliməmmədova bildirmişdir ki, son illər ölkəmizdə dövlət orqanlarının fəaliyyətində şəffaflığın artırılması, korrupsiyaya qarşı mübarizə, elektron xidmətlərin təşkili, vətəndaşların dövlət orqanlarının fəaliyyəti ilə bağlı daha operativ və geniş məlumatlandırılması istiqamətində böyük işlər görülmüşdür. Azərbaycan Prezidentinin 2012-ci il 5 sentyabr tarixli Sərəncamı ilə təsdiq edilmiş “Açıq Hökumətin təşviqinə dair 2012-2015-ci illər üçün Milli Fəaliyyət Planı” bu sahədə görülmüş işlərin davamı olaraq şəffaflığın artırılması və açıq hökumətin təşviqi sahəsində bir sıra tədbirlərin həyata keçirilməsini nəzərdə tutur.

Toplantıda “Konstitusiya” Araşdırmalar Fondunun prezidenti, layihə rəhbəri Əliməmməd Nuriyev “Açıq Hökumətin təşviqinə dair 2012-2015-ci illər üçün Milli Fəaliyyət Planı” çərçivəsində həyata keçirilən tədbirlər: nəticələr və perspektivlər” mövzusunda məruzə ilə çıxış etmişdir. Qeyd olunmuşdur ki, əsası ABŞ və Braziliya hökumətləri tərəfindən qoyulan Açıq Hökumət Tərəfdaşlığı Təşəbbüsü hökumətin vətəndaşlara, ümumilikdə, cəmiyyətə açıq olmasını nəzərdə tutur. Bu açıqlıq özünü büdcə və maliyyə vəsaitləri üzərində nəzarətdə, qərarların hazırlanması və icrasında vətəndaşların iştirakının və informasiyanın açıqlığının təmin edilməsində, eləcə də dövlət orqanlarının fəaliyyətində yeni texnologiyaların tətbiqində göstərməlidir.

Diqqətə çatdırılmışdır ki, bu istiqamətdə tədbirlərin həyata keçirilməsi məqsədi ilə Azərbaycan Prezidenti tərəfindən “Açıq Hökumətin təşviqinə dair 2012-2015-ci illər üçün Milli Fəaliyyət Planı” və “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı” təsdiq edilmişdir. Hər iki planın icrası, elektron hökumətin yaradılması, əhaliyə elektron xidmətlərin göstərilməsi, vətəndaşların dövlət orqanlarının fəaliyyətində daha yaxından iştiraka cəlb edilməsi, ictimai nəzarətin genişləndirilməsi, “ASAN xidmət” mərkəzlərinin fəaliyyəti barədə iştirakçılara məlumat verən Ə.Nuriyev bu tədbirlərin daha çox səmərə verməsində vətəndaş təşəbbüskarlığının əhəmiyyətini vurğulamışdır.

Daha sonra tədbir iştirakçılarını maraqlandıran suallara aydınlıq gətirilmişdir.