Ağıllı və əlaçı
Qahirə, 1 may (AZƏRTAC). Məlum olduğu kimi, uşaqlar bizim gələcəyimizdir və əgər söhbət altı yaşlı Cahan İsmayılova kimi uşaqlardan gedirsə, gələcək üçün narahat olmağa dəyməz. Böyüklərin uşaqlardan gözlədiyi başlıca şey onların yaxşı təhsil alması və sözə qulaq asmasıdır.
Ağıllı və əlaçı Cahan Qahirədə “Irish school” elit irland məktəbinin ən yaxşı şagirdlərindən biridir. Balaca həmvətənimiz ingilis dilində əla oxuyur və gözəl nəticələr göstərir. Özü də valideynlərinin tərbiyəsi sayəsində o, öz ana və türk dillərini, habelə vətəninin mədəniyyətini və ənənələrini gözəl bilir. Cahan məktəbdə keçirilən müxtəlif bayram tədbirlərində, Azərbaycan səfirliyinin və diasporunun təşkil etdikləri bayramlarda Azərbaycan xalq mahnılarını və rəqslərini ifa edir.
Cahanın intellektinə, yaradıcılıq potensialına, məqsədyönlülüyünə daim heyran qalan müəllimləri onun biliklərə can atmasından, təhsilə məsuliyyətlə yanaşmasından, çalışqan və nümunəvi davranışa malik olmasından həmişə fərəhlə danışırlar.
Beynəlmiləl məktəbin müəllimi Pxelan Moyra deyir ki, Cahan məktəbin fəxridir, müxtəlif millətlərdən olan bütün uşaqlarla asanlıqla ümumi dil tapan qabiliyyətli və fəal uşaqlardan biridir. P.Moyra qeyd etmişdir ki, elə bu yaxınlarda Cahan bütün fənlər üzrə 90-dan çox bal toplayaraq öz yaşıdları arasında yarışda fəxri birinci yeri tutmuş və məktəbin fəxri fərmanını almışdır. Məktəbin ibtidai sinif müəllimi demişdir: “Cahan nəinki bütün fənləri asanlıqla qavrayır, həm də daim öyrənməyə çalışır. O, hər şeylə maraqlanır, öz üzərində çalışır, əlavə mütaliə etməklə və əqli oyunlarda iştirak etməklə öz dünyagörüşünü genişləndirir. O, coğrafiyanı - ölkələrin adlarını, paytaxtlarını gözəl bilir, onlar haqqında məlumatı yadda saxlayır, dünyanın coğrafi xəritəsindən baş açır”.
Hər bir uşağın intellektual qabiliyyəti fərdidir, amma şübhəsiz, hər bir uşaq unikaldır və məhz ona xas olan istedada malikdir. Cahanda bu qabiliyyət özünü yaradıcılıqda büruzə verir: o, şəkil çəkməyi sevir və yaxşı bacarır, valideynləri isə bu nadir uşağın öz daxili potensialını maksimum realizə etməsinə və həyatda təkrarolunmaz yolunu axtarıb tapmasına kömək göstərirlər. Bu baxımdan Cahanın valideynləri - Elnur və Nərmin tərifəlayiqdirlər. Onlar uşağa çox qüvvə və diqqət sərf edirlər, onun dünyanı dərk etmək səyini dəstəkləyir, yaradıcılıq təfəkkürünü inkişaf etdirir və onu şəxsi nümunələri əsasında tərbiyə edirlər. Onlar həm də Cahanda öz Vətəninə dərin məhəbbət hissi oyatmışlar. Balaca qız bu ölkədə müvəqqəti işləyən valideynləri ilə birlikdə Vətənə qayıtmasını səbirsizliklə gözləyir. Cahan pərəstiş etdiyi “Eurovizion” ulduzları Eldar və Nikki ilə tanış olmaq və uşaq mahnı müsabiqəsində iştirak etmək arzusundadır.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
