İQTİSADİYYAT
Almaniyanın Federal İqtisadiyyat və Texnologiyalar Nazirliyi ilə Azərbaycanın İqtisadi İnkişaf Nazirliyi arasında əməkdaşlıq haqqında Anlaşma Memorandumu imzalanmışdır
Bakı, 28 fevral (AZƏRTAC). Fevralın 28-də Bakı Biznes Mərkəzində İqtisadi İnkişaf Nazirliyinin dəstəyi, Bakı Biznes Tədris Mərkəzinin təşkilatçılığı ilə “Azərbaycan ilə Almaniya arasında iqtisadi kooperasiya əlaqələrinin genişləndirilməsi” mövzusunda konfrans keçirilmişdir.
AZƏRTAC xəbər verir ki, tədbirdə İqtisadi İnkişaf Nazirliyinin, Almaniya Federativ Respublikasının İqtisadiyyat və Texnologiyalar Nazirliyinin, Almaniyanın Beynəlxalq Əməkdaşlıq Agentliyinin (GİZ) nümayəndələri, eləcə də 2009-2012-ci illərdə Almaniyada ixtisasartırma kursu keçmiş sahibkar və menecerlər iştirak etmişlər.
İqtisadi İnkişaf Nazirliyi Aparatının rəhbəri Samir Vəliyev Azərbaycan və Almaniya arasında müxtəlif sahələrdə, o cümlədən iqtisadi sahədə əlaqələrin inkişaf etdiyini vurğulamışdır. Bildirilmişdir ki, Azərbaycan Respublikasının İqtisadi İnkişaf Nazirliyi və Almaniyanın Federal İqtisadiyyat və Texnologiyalar Nazirliyi arasında imzalanmış “Əməkdaşlıq haqqında Anlaşma Memorandumu”na uyğun olaraq, 2009-cu ildən başlayaraq Bakı Biznes Tədris Mərkəzi Almaniyanın GİZ təşkilatı ilə birlikdə “Azərbaycan Respublikasında biznesin idarə edilməsi sahəsində kadrların ixtisasının artırılması üzrə Almaniya-Azərbaycan ikitərəfli Proqramı”nı həyata keçirir. Proqram çərçivəsində iqtisadiyyatın müxtəlif sahələrində fəaliyyət göstərən sahibkar və gənc menecerlər Almaniyanın müvafiq tədris mərkəzlərində və müəssisələrində “İqtisadi kooperasiya” üzrə 1 aylıq ödənişsiz ixtisasartırma kursu keçir, beynəlxalq təcrübəyə yiyələnir, işgüzar əlaqələr yaradırlar.
Samir Vəliyev proqramın davam etdirilməsinin Azərbaycan gənclərinin menecment sahəsində beynəlxalq təcrübəyə yiyələnməsi, iş adamları arasında əməkdaşlığın genişlənməsi baxımından əhəmiyyətli olduğunu bildirmişdir.
Almaniyanın Federal İqtisadiyyat və Texnologiyalar Nazirliyinin Avropa siyasəti departamentinin direktor müavini Andreas Oberşteller, İqtisadi İnkişaf Nazirliyinin sahibkarlığın inkişafı siyasəti şöbəsinin müdir müavini Elçin İbrahimov, Bakı Biznes Tədris Mərkəzinin direktoru Akif Fərruxov, GİZ-in layihələr üzrə rəhbəri Ronald Şults və başqaları çıxış edərək “Azərbaycan Respublikasında biznesin idarə olunması sahəsində kadrların ixtisasının artırılması üzrə Almaniya-Azərbaycan ikitərəfli Proqramı” və ixtisasartırma kurslarının uğurlu nəticəsi barədə məlumat vermişlər.
Qeyd edilmişdir ki, proqram icra olunduğu müddət ərzində iqtisadiyyatın müxtəlif sahələrində fəaliyyət göstərən 138 sahibkar və gənc menecer Almaniyanın Karl Dyusberq, Baden-Vüttenberq və digər tədris mərkəzlərində təlim, Berlin, Bonn və s. şəhərlərindəki müəssisələrdə təcrübə keçmişlər. İqtisadi İnkişaf Nazirliyinin Bakı Biznes Tədris Mərkəzi namizədlərin seçilməsi və proqramda iştirakını təmin etmişdir.
Konfransda ixtisasartırma kursunda iştirak etmiş menecerlərin çıxışları və təqdimatları dinlənilmiş, Proqram çərçivəsində Almaniyanın müvafiq şirkətləri ilə yaradılmış yeni işgüzar əlaqələr və imzalanmış biznes müqavilələri barədə məlumat verilmişdir.
Tədbir çərçivəsində Almaniya Federativ Respublikasının Federal İqtisadiyyat və Texnologiyalar Nazirliyi ilə Azərbaycan Respublikasının İqtisadi İnkişaf Nazirliyi arasında biznesin idarə olunması sahəsində kadrların ixtisasının artırılması üzrə əməkdaşlıq haqqında Anlaşma Memorandumu imzalanmışdır. Sənədi Azərbaycan tərəfdən iqtisadi inkişaf nazirinin müavini Niyazi Səfərov, Almaniya tərəfdən isə Almaniyanın Federal İqtisadiyyat və Texnologiyalar Nazirliyinin Avropa siyasəti departamentinin direktor müavini Andreas Oberşteller imzalamışlar.
2009-cu ildə imzalanmış müvafiq sənədin davamı olan Anlaşma Memorandumuna əsasən, Azərbaycanın özəl sektorunda biznesin idarə olunması sahəsində fəaliyyət göstərən kadrlar növbəti üç ildə də Almaniyada tədris və təcrübə keçmək imkanı qazanacaqlar.
Almaniya tərəfindən Proqramın icrası Almaniya Beynəlxalq Əməkdaşlıq Cəmiyyətinə (GİZ), Azərbaycan tərəfindən isə İqtisadi İnkişaf Nazirliyinin Bakı Biznes Tədris Mərkəzinə həvalə edilmişdir. İxtisasartırma kursları zamanı Almaniyada qalmaq xərclərini və təhsil haqqının ödənilməsini Almaniya tərəfi öz öhdəsinə götürəcəkdir.