Bakı, 25 may (AZƏRTAC). Bu gün paytaxt Bakıda yeni infrastrukturlar sırasında yeraltı avtomobil dayanacaqlarının geniş şəbəkəsi də diqqəti cəlb edir. Bütün meqapolislərə xas olan nəqliyyat sıxlığının aradan qaldırılmasında önəmli rol oynayacaq belə layihələrdən biri də paytaxtın Azadlıq meydanında həyata keçirilir. Bakının baş meydanında yaradılan ikimərtəbəli yeraltı avtomobil dayanacağının inşasına 2011-ci ilin sentyabrında başlanmışdır. Artıq obyektdə tamamlama işləri görülür. Ümumilikdə 8 giriş-çıxışı olan yeraltı dayanacaq 1500-dən çox avtomobil üçün nəzərdə tutulmuşdur.

Çoxlu sayda nazirliklərin, komitələrin, mehmanxanaların, həmçinin dəniz vağzalının, ticarət obyektlərinin və Dənizkənarı Milli Parkın bu ərazidə yerləşməsi nəqliyyat vasitələrinin sıxlığına, tıxacların yaranmasına səbəb olur ki, bu da piyadalar üçün təhlükə yaradır. Buna görə də yeraltı dayanacaq bu ərazidə problemin həllində müsbət rol oynayacaqdır.

Obyektdə ağır zəhmət tələb edən işlər artıq arxada qalmışdır. İnşaatçılar yeraltı kompleksdə havalandırma sisteminin avadanlığını quraşdırır, döşəmədə izolə işlərini görür, giriş-çıxışlarda tamamlama işlərini icra edirdilər. Növbə yeni başladığından iş icraçısı Famil Hidayətovu böyük bir ərazini əhatə edən ikimərtəbəli kompleksdə axtarıb tapmaq heç də asan olmadı. İş icraçısı ikinci mərtəbədə havalandırma sisteminin avadanlığını quraşdıran çilingərlərə işçi layihə üzrə tapşırıq verirdi. F.Hidayətov dedi ki, hazırda dayanacaqda havalandırma, siqnalizasiya sistemləri quraşdırılır, döşəmə və dizayn işləri yerinə yetirilir. Bu, böyük layihədir və onun vaxtında reallaşdırmaq üçün 200-300 fəhlə 2-3 növbəli rejimdə işləyib. Hazırda isə iş yekunlaşmaq üzrə olduğundan onların sayı təxminən 150 nəfərdir.

Ərazini gəzərkən dayanacağın hər mərtəbəsində avtomobillərlə yanaşı, piyadalar üçün də ayrıca yolun olması diqqətimizi çəkdi. F.Hidayətov dedi ki, dayanacağa avtomobillərin daxil olması üçün nəzərdə tutulmuş alt və üst mərtəbəyə aparan iki yolun girişi Hökumət Evinin sağ tərəfindədir. Buradan dayanacağa daxil olan avtomobillər digər tərəfdən çıxacaqdır. Ümumiyyətlə, avtomobil giriş-çıxışlarının yanında paralel olaraq piyadalar üçün də yol salınmışdır. Buradakı bütün qurğular ən yüksək standartlara uyğundur. Sürücülər avtomobillərinin təhlükəsizliyinə də tam əmin ola bilərlər. Çünki yeraltı dayanacaqda bütün proseslərə müşahidə kameraları vasitəsilə nəzarət ediləcəkdir.

Həmsöhbətimiz bu yeraltı dayanacaqda 1500-dən çox avtomobilin saxlanılmasının mümkün olduğunu vurğulayaraq bildirdi ki, belə bir kompleksin şəhərimizin mərkəzində yaradılması çox vacibdir. Dənizkənarı Milli Parkın yenidən qurulması və müasirləşdirilməsi paytaxt sakinlərinin və şəhərimizin qonaqlarının bu istirahət guşəsinə marağını artırmışdır. Burada keçirilən maraqlı tədbirləri izləmək və istirahət etmək üçün avtomobillərlə gələnlərin sayının çoxalması ərazidə tıxaclara səbəb olur və piyadalar üçün təhlükə yaradırdı. Yeraltı avtomobil dayanacağı bu problemi aradan qaldırmağa kömək edəcəkdir. Eyni zamanda, dayanacaq yoldakı tıxacın qarşısını alacaq və avtomobillərin yolun kənarında saxlanılmasına da son qoyacaqdır.

Azadlıq meydanının hərbi parad keçirilməsi üçün də tam hazır olduğunu deyən F.Hidayətov bildirdi ki, avtomobil yolu istifadəyə verilərkən sınaq işləri görülmüşdür. Sınaq işlərini dövlət sifarişi ilə “Azərkörpü” Səhmdar Cəmiyyəti aparmışdır. Bu yeraltı dayanacağın üstündən ağır hərbi texnika keçərkən örtük piltələrində norma üzrə gərilmə 14 millimetr nəzərdə tutulduğu halda, sınaq zamanı nəticə 1,6 millimetr olmuşdur. Bu nəticə bizim işimizə verilən qiymət idi. Burada istifadə edilən beton da yoxlamadan keçirilmişdir. Bütün bunlar bir daha sübut edir ki, Azadlıq meydanı hərbi parada tam hazırdır.

İş icraçısının və inşaatçıların daha çox vaxtını almaq insafdan deyildi. Hiss olunurdu ki, onlar paytaxtın bu vacib infrastrukturunu tezliklə istifadəyə vermək üçün növbə normasını artıqlaması ilə yerinə yetirməyə çalışırdılar...

Ceyhun Rüstəmov

AZƏRTAC-ın müxbiri