İQTİSADİYYAT
Azərbaycan hökuməti ilə AİB “Azərbaycan: Ölkə üzrə Diaqnostik Tədqiqat” təhlilinin ilkin müzakirəsini aparıblar
Bakı, 21 noyabr, AZƏRTAC
Noyabrın 21-də Bakıda Azərbaycan Respublikası hökuməti və Asiya İnkişaf Bankının (AİB) nümayəndə heyətləri arasında “Azərbaycan: Ölkə üzrə Diaqnostik Tədqiqat (Country Diagnostic Study - CDS)” təhlilinin ilkin müzakirəsi aparılıb.
Maliyyə Nazirliyinin mətbuat xidmətindən AZƏRTAC-a bildirilib ki, AİB-in Bilik İdarəetməsi və Dayanıqlı İnkişaf üzrə vitse-prezidenti Bambang Susantononun rəhbərlik etdiyi nümayəndə heyətinin və Azərbaycan Respublikası Prezidentinin Administrasiyası, Nazirlər Kabineti, Maliyyə, İqtisadiyyat, Əmək və Əhalinin Sosial Müdafiəsi, Kənd Təsərrüfatı, Energetika nazirliklərinin, Mərkəzi Bankın, Dövlət Neft Fondunun, Maliyyə Bazarlarına Nəzarət və Hesablama palatalarının, Dövlət Gömrük, Dövlət Statistika komitələrinin rəhbər şəxslərinin iştirakı ilə keçirilən görüşdə bank tərəfindən “Azərbaycan: Ölkə üzrə Diaqnostik Tədqiqat” sənədinin təqdimatı keçirilib.
“Azərbaycan: Ölkə üzrə Diaqnostik Tədqiqat”ı hökumət tərəfdaşlarının müzakirələri və şərhləri nəzərə alınmaqla, inklüziv artım və iqtisadi şaxələndirmə üçün maneə və məhdudiyyətlərin müəyyənləşdirilərək təhlil edilməsini özündə ehtiva edir.
Çıxış edənlər AİB-in bu kimi təhlillərlə Azərbaycan Respublikasının iqtisadi inkişafına verdiyi töhfəni yüksək qiymətləndirərək aidiyyəti üzrə rəy və təkliflərini Bankın nümayəndə heyətinin diqqətinə çatdırıblar.
AİB-in nümayəndə heyəti isə, öz növbəsində, inklüziv artım və iqtisadi şaxələndirmə üçün müəyyən olunmuş maneə və məhdudiyyətlərin daha dərindən təhlil edilərək onların aradan qaldırılması istiqamətində atılacaq addımların müəyyənləşdirilməsi istiqamətində fikir və təkliflərini veriblər.
Bu gün, həmçinin Maliyyə naziri Samir Şərifovla Azərbaycan Respublikası hökuməti ilə aparılan müzakirələrdə iştirak etmək üçün ölkəmizə səfər edən AİB-in vitse-prezidenti Bambang Susantono arasında ikitərəfli görüş keçirilib. Görüşdə Azərbaycan ilə AİB arasında əməkdaşlığın hazırkı vəziyyəti və gələcək istiqamətləri, o cümlədən birgə həyata keçirilən layihələrinin icra vəziyyəti müzakirə olunub. Xüsusilə, AİB-in apardığı tədqiqatlarla və bu gün keçirilmiş təqdimatla Azərbaycanda iqtisadiyyatın şaxələndirilməsi istiqamətində aparılan ardıcıl islahatlara verdiyi töhfə yüksək qiymətləndirilib.
1966-cı ildə təsis edilən Asiya İnkişaf Bankının əsas məqsədi üzv ölkələrin iqtisadi inkişafına dəstək olmaqla yoxsulluğun aradan qaldırılması və əhalinin həyat səviyyəsinin yaxşılaşdırılmasına yardım etməkdir. AİB-ə 48-i regional və 19-u qeyri-regional olmaqla, 67 ölkə üzvdür. Bankın baş ofisi Filippinin paytaxtı Manilada yerləşir.