AZƏRBAYCAN PREZİDENTİ İLHAM ƏLİYEVİNBƏYANATI
Bu gün NATO-Azərbaycan münasibətlərinin gələcək inkişafında olduqca vacib gündür. Əlaqələrimizin tarixi uzundur. On ildən artıqdır ki, biz sıx əməkdaşlıq layihələri üzərində çalışmışıq. Biz “Sülh naminə tərəfdaşlıq” proqramından başladıq, indi isə, “Fərdi tərəfdaşlığın fəaliyyət planı” ilə məşğuluq. Həmin plan siyasi sistemimizin bütün sahələrini əhatə edir. Müdafiə, iqtisadi və siyasi sahələrdə aparılan islahatların hamısı bir-biri ilə bağlıdır. Xəzərin neft və qaz yataqlarının əhəmiyyətini, onların enerji təhlükəsizliyi və ümumiyyətlə, regional təhlükəsizlik üçün vacibliyini nəzərə alsaq, təbii ki, bütün bunlar əlaqələrimizə yenilik gətirir.
Əlaqələrimizin müsbət və çox yaxşı tarixi var. Bu gün isə, həmin münasibətlərin, demək olar ki, yeni mərhələsi başlayır. Baş katiblə bizim ikitərəfli münasibətlər, regional təhlükəsizlik və inkişaf məsələləri haqqında çox əhatəli və geniş müzakirələrimiz oldu. Eyni zamanda, Şimali Atlantika Şurasında ideyalarımız, planlarımız barədə uzun və çox açıq, səmimi söhbətimiz oldu. Əvvəlki nailiyyətlərimizi nəzərdən keçirdik və gələcək əməkdaşlıq üçün çox möhkəm əsaslar qoyuldu. Azərbaycan qonşuluqda daha təhlükəsiz mühitin yaradılmasında oynadığı mühüm rolunu davam etdirəcəkdir. Biz Kosovo ilə Əfqanıstanda sülhməramlı əməliyyatlarda iştirakımızı davam etdirəcəyik. Hesab edirəm ki, bu, bizim gənc, lakin NATO-nun əsil və etibarlı tərəfdaşı olmaq üçün öz potensialını artıran ölkəmiz üçün çox vacibdir.
İqtisadi və siyasi islahatlar, cəmiyyətin demokratikləşməsi, sosial və müdafiə islahatları hamısı bir-biri ilə bağlıdır. Bütün bunlar güclü iqtisadi və siyasi sistemə malik olan ölkənin formalaşmasına, eləcə də dostlarımız və müttəfiqlərimizlə möhkəm əlaqələrin inkişafına imkan yaradacaqdır.
Sonra jurnalistlərin suallarına cavab verildi.
ASSOŞİEYTED PRESS agentliyi: Cənab baş katib, mən bilmək istərdim, apardığınız danışıqlarda enerji təhlükəsizliyi nə dərəcədə müzakirə olundu? Bilirəm ki, dünən enerji məsələlərinə dair məsul komissar Pyebalqsla bu məsələ ilə bağlı görüş keçirilibdir.
YAAP DE HOOP SXEFFER: Təbii ki, söhbətlərimiz mühüm rol oynayır. Xüsusən də nəzərə almalıyıq ki, keçmişdə enerji təhlükəsizliyi sahəsində işləmiş cənab Prezident bu məsələ üzrə ekspertdir. Azərbaycan bu sahədə çox mühüm ölkədir, yəni bundan sonra neft və qaz təchizatı sahəsində daha böyük rol oynamağa başlayacaqdır. Çünki, bildiyiniz kimi, neft hasilatı həm cənab Prezidentin, həm də ekspertlərin dediyi kimi, gözəçarpan dərəcədə artacaqdır.
Fikrim ondan ibarətdir ki, enerji təchizatına gəldikdə, NATO bu sahədə aparıcı təşkilat olmasa da, enerji təhlükəsizliyi ilə bağlı müzakirələr təşkilatımız üçün çox vacibdir. Bu məsələlər NATO çərçivəsində nəzərdən keçirilir. Həmin məsələlər dünən komissar Pyebalqs ilə də qeyri-formal qaydada müzakirə edildi. Əgər Siz Azərbaycana və regiona nəzər salsanız, aydın şəkildə görərsiniz ki, enerji təchizatı və boru kəmərlərinin çəkilməsi enerji təhlükəsizliyində mühüm rol oynayır.
Mən bir daha deyirəm ki, bu məsələlər NATO-nun birbaşa səlahiyyətinə aid deyil, təşkilatımız bu sahədə aparıcı rol oynamır və oynamayacaqdır. Lakin enerji təhlükəsizliyinə dair müzakirələrin siyasi və geosiyasi tərəfləri bizim üçün maraqlıdır. Biz və səfirlər bu fürsətdən istifadə edərək, həmin məsələləri Prezident Əliyev ilə geniş şəkildə müzakirə etdik.
FƏRİD İSKƏNDƏROV (“Space” televiziyası, Azərbaycan): Sualım cənab Sxefferədir. Cənubi Qafqaz regionundakı münaqişələrin həllinə NATO hansı konkret töhfə verə bilər? Sağ olun.
YAAP DE HOOP SXEFFER: NATO birbaşa iştirakçı və vasitəçi deyil, lakin region ölkələri ilə yaxşı münasibətləri var. Bizim Azərbaycanla çox yaxşı əlaqələrimiz var. Bu gün Prezident Əliyevlə biz bunu vurğuladıq. Ermənistan da NATO-nun tərəfdaşıdır. Bu yaxınlarda biz Gürcüstanla intensiv dialoq mərhələsinə başlamışıq. Təbii ki, NATO-nun tutduğu əsas mövqe region ölkələrinin ərazi bütövlüyünə hörmətlə yanaşmadan ibarətdir. İstər Azərbaycan, Gürcüstan və ya regiondakı hər hansı digər ölkə olsun.
Həmin dialoq çərçivəsində dəfələrlə vurğulamışıq ki, bütün münaqişələr dinc yolla, vasitəçilik əsasında öz həllini tapmalıdır. Təbii ki, biz Dağlıq Qarabağ məsələsini Prezident Əliyev ilə geniş şəkildə müzakirə etdik. O, mənə və səfirlərə həmin dondurulmuş münaqişə ilə bağlı öz fikirlərini söylədi. Bizim hamımız ümid edirik ki, münaqişə vasitəçilərin yardımı ilə sülh danışıqları əsasında nizamlanacaqdır.
Beləliklə, NATO-nu regionda birbaşa iştirakçı kimi dəyərləndirməyin. Çünki NATO Cənubi Osetiya və Abxaziyada birbaşa rol oynamır. Dağlıq Qarabağ məsələsi ilə NATO yox, Minsk qrupu məşğul olur. Lakin biz region ölkələri ilə olan münasibətlərimizdən və tərəfdaşlığımızdan istifadə edirik. Bilirik ki, region həssasdır və bunu nəzərə alaraq, biz bütün elementləri müzakirə etmək məqsədi ilə həmin tərəfdaşlıqdan tam şəkildə istifadə edirik. Bu, NATO-nun regiondakı mühüm tərəfdaşları ilə birgə oynadığı roldur.
Bölmənin digər xəbərləri
