Bakı, 21 aprel (AZƏRTAC). Qaradağ rayonunda cari ilin birinci rübündə idarə, müəssisə və təşkilatlarda görülmüş işlərin yekunları və qarşıda duran vəzifələrin müzakirəsi ilə bağlı geniş iclas keçirilmişdir.

İştirakçılar əvvəlcə Lökbatan qəsəbəsində Heydər Əliyevin adına parkda ulu öndərin abidəsi önünə gül dəstələri düzmüş, xatirəsini ehtiramla yad etmişlər.

İclası açan Qaradağ Rayon İcra Hakimiyyətinin başçısı Süleyman Mikayılov aprelin 12-də Prezident İlham Əliyevin sədrliyi ilə Nazirlər Kabinetinin 2011-ci ilin birinci rübünün sosial-iqtisadi inkişafının yekunlarına həsr olunmuş iclasında dövlətimizin başçısının nitqindən irəli gələn vəzifələri diqqətə çatdırmışdır.

İcra hakimiyyəti başçısının birinci müavini Hikmət Abbasov hesabat məruzəsi ilə çıxış etmişdir. Bildirilmişdir ki, hesabat dövründə Qaradağ rayonunda 98 milyon 738,1 min manatlıq və ya keçən ilin müvafiq dövrü ilə müqayisədə 13,6 faiz çox sənaye məhsulu istehsal edilmişdir. Qeyri-dövlət müəssisələri tərəfindən 33 milyon 141,3 min manatlıq sənaye məhsulu buraxılmışdır. Rayon iqtisadiyyatının aparıcı sahəsini təşkil edən neft və qaz sənayesi müəssisələrində 112,3 min ton xam neft, 93,5 milyon kubmetr təbii qaz hasil olunmuş, 213,4 min ton sement istehsal olunmuşdur.

Cari ilin birinci rübündə rayonun sosial-iqtisadi sahələrinin inkişafına 40 milyon 625,1 min manat investisiya qoyulmuş, bu da keçən ilin müvafiq dövrünə nisbətən 44,9 faiz çoxdur. İstifadə edilmiş investisiyaların 13 milyon 800,9 min manatı tikinti-quraşdırma işlərinə sərf edilmişdir ki, bu da 2010-cu ilin müvafiq dövrü ilə müqayisədə iki dəfə artıqdır.

Hesabat dövründə nəqliyyat sektorunda 3 milyon 999,4 min manatlıq, rabitə sahəsində isə 322,1 min manatlıq xidmətlər göstərilmişdir. Bundan əlavə, əhaliyə 290 milyon 608,2 min manatlıq istehlak malları satılmış və pullu xidmətlər göstərilmişdir. Pərakəndə əmtəə dövriyyəsi keçən ilin müvafiq dövrü ilə müqayisədə 1,2 faiz artaraq 270 milyon 145,7 min manata, pullu xidmətlərin həcmi isə 10,8 faiz artaraq 20 milyon 462,5 min manata çatmışdır.

Təqdirəlayiq haldır ki, əmtəə dövriyyəsinin 99,9 faizi, pullu xidmətlərin 87,8 faizi özəl bölmə tərəfindən həyata keçirilmişdir.

Qeyd edilmişdir ki, bu ilin birinci rübündə rayonda orta əmək haqqı keçən ilin müvafiq dövrünə nisbətən 24,6 faiz artaraq 597,4 manata çatmışdır. Yanvar-mart ayları ərzində 1936 ailənin hər birinə ayda orta hesabla 105 manat məbləğində ünvanlı sosial yardım verilmişdir. Hesabat dövründə 292 yeni iş yeri açılmışdır.

Rayonun elektrik enerjisi və suya olan tələbatının ödənilməsi, məişət tullantılarının yığılması üzrə bir sıra işlər görülmüş, 14 min 200 müxtəlif növ ağac və bəzək kolları əkilmişdir.

Hesabat dövründə rayonun qəsəbələrində genişmiqyaslı quruculuq, abadlıq və yaşıllaşdırma işlərinin həyata keçirilməsi rayon icra hakimiyyətinin fəaliyyətinin prioritet istiqamətini təşkil etmişdir. Təhsil, səhiyyə, mədəni-maarif müəssisələrinin təmiri və maddi-texniki bazalarının möhkəmləndirilməsi istiqamətlərində xeyli iş görülmüşdür.

İclasda çıxış edən idarə, müəssisə, təşkilat rəhbərləri və s. cari ilin birinci rübündə həyata keçirilmiş uğurlu işlərlə yanaşı, yol verilmiş nöqsanları da ətraflı təhlil etmiş, mövcud problemlərlə bağlı təkliflərini bildirmişlər.

Sonda Azərbaycan Prezidenti İlham Əliyevə müraciət qəbul olunmuşdur.

İclasda Milli Məclisin deputatı Ağalar Vəliyev iştirak etmişdir.