MƏDƏNİYYƏT
Azərbaycan Turizm və Menecment Universiteti ilə Auditorlar Palatası arasında əməkdaşlığa dair saziş imzalanıb
Bakı, 17 mart, Elvira Məmmədova, AZƏRTAC
Martın 17-də Azərbaycan Turizm və Menecment Universitetində (ATMU) Auditorlar Palatasının nümayəndələri ilə görüş keçirilib.
AZƏRTAC xəbər verir ki, tədbirdə ATMU-nun rektoru, tarix elmləri doktoru, professor Cəfər Cəfərov bildirib ki, görüş auditin və təhsil prosesinin inkişafı istiqamətində qarşılıqlı münasibətlərin daha da möhkəmləndirilməsi məqsədi ilə keçirilir.
Rektor qeyd edib ki, iki qurum arasında bağlanacaq sazişin məqsədi Azərbaycanda maliyyə, mühasibat uçotu, audit və turizm sahəsində dünyanın qabaqcıl ölkələrinin təcrübəsini ümumiləşdirmək, ölkənin gələcək inkişafı naminə daha peşəkar mütəxəssis yetişdirməkdir. Bu sənəd kadr hazırlığı, təlim və tədris prosesinin təşkilini, elmi-tədqiqat işlərinin aparılmasını, maddi-texniki bazanın möhkəmləndirilməsini əhatə edir.
Diqqətə çatdırılıb ki, əməkdaşlığın məqsədi təhsilin inkişafı, Azərbaycanda dövlət təşkilatları, peşəkar qurumlar və biznes strukturları ilə təhsilin maraqlarının uzlaşdırılması, rəqabət qabiliyyətli milli kadrların yetişdirilməsi üçün yeni tərəfdaşlıq mühitinin formalaşdırılması, dünya elmi nailiyyətlərinin idarəetmənin və sahibkarlığın inkişafına yönəldilməsi, sahibkarlıq subyektlərinin maarifləndirilməsinə kömək etməkdir. Artıq ATMU-nun tələbələrinin Palata və ona üzv təşkilatlarda sahə təcrübəsi keçmələri üçün şəraitin yaradılması, tələbə və müəllimlərin Palata tərəfindən təşkil olunan təlim və seminarlarda iştirakının təmini və digər məsələlər barədə razılıq əldə edilib.
Auditorlar Palatasının sədri, iqtisad elmləri doktoru, professor Vahid Novruzov iki qurum arasında auditor inkişafı istiqamətində münasibətlərin daha da möhkəmləndirilməsinin vacibliyini vurğulayıb. Sədr bildirib ki, rəhbərlik etdiyi qurumun məqsəd və vəzifələri dövlətin auditor xidmətinin tənzimləməsini təşkil etmək, bu sahədəki normativ-hüquqi aktları, ölkədə auditor xidmətinin inkişafına və təkmilləşdirilməsinə yönəldilmiş tədbirlər sistemini işləyib hazırlamaq, dövlətin təsərrüfat subyektlərinin və auditorların maraqlarını qorumaq, sonuncuların qanunvericilik və normativ aktlardan irəli gələn tələbləri yerinə yetirib-yetirmədiklərinə nəzarət etməkdir.
Qeyd edilib ki, Auditorlar Palatası və ATMU arasında əməkdaşlıq sazişi bağlandıqdan sonra tərəflər ölkədə auditor xidmətinin dövlət tənzimlənməsinin və inkişafının təşkilini təmin etməklə sahibkarlığın rəqabətqabiliyyətliliyinin gücləndirilməsində, peşəkar milli kadrların hazırlığı sahəsində ictimai sifarişin formalaşdırılması prosesində Palatanın fəallığının artırılması və təkmilləşdirilməsində, universitetin “Karyera mərkəzi”nin, maliyyə, mühasibat uçotu və audit sahəsində tələbə konsaltinq xidmətinə metodoloji yardım və digər sahələrdə əməkdaşlıq edəcəklər.
Sonra ATMU ilə Auditorlar Palatası arasında əməkdaşlığa dair saziş imzalanıb.
Sənədi C.Cəfərov və V.Novruzov imzalayıblar.
Tədbir çərçivəsində “Azərbaycanda audit fəaliyyəti və bu sahədə kadr hazırlığına tələblər” mövzusunda ilk birgə seminar keçirilib, fikir mübadiləsi aparılıb, birgə fəaliyyət istiqamətləri müəyyənləşdirilib.