SİYASƏT
Azərbaycan-Türkiyə münasibətləri iki qardaş ölkənin dünya birliyində də çox mühüm yer tutmasına zəmin yaradır – QHT sədri
Bakı, 30 aprel, AZƏRTAC
Azərbaycan-Türkiyə münasibətləri milli-etnik kimliyə və bu kimliyin dərk edildiyi doğmalıq hisslərinə köklənib. Xalqlarımızın eyni soykökə, dilə, dinə, mədəniyyətə və bir çox digər bağlara malik olması bu iki ölkəni həmişə bir-birinə doğma edib. Heç bir qüvvə Azərbaycan ilə Türkiyə arasındakı dərin bağları qopara bilməz.
Bu sözləri AZƏRTAC-a açıqlamasında Cəmiyyətin İnkişafı Mərkəzi İctimai Birliyinin sədri Əhməd Abbasbəyli söyləyib.
Tarixi köklərə və qardaşlığa söykənən Azərbaycan-Türkiyə əlaqələrinin Prezident İlham Əliyev və Prezident Rəcəb Tayyib Ərdoğanın böyük səyləri ilə siyasi, iqtisadi-ticari, humanitar, hərbi və digər sahələrdə çox uğurla inkişaf etməkdə olduğunu bildirən QHT sədri deyib: "Müasir dövrdə Azərbaycanın etibarlı strateji tərəfdaşı olan Türkiyə ilə münasibətlərin möhkəmləndirilərək daha da genişləndirilməsi Azərbaycan dövlətinin xarici siyasətinin çox mühüm tərkib hissəsidir. İki dövlətin rəhbərlərinin müntəzəm xarakter almış qarşılıqlı səfərləri ölkələrimiz arasında bütün sahələrdə əməkdaşlığın inkişafında əhəmiyyətli rol oynamaqda və müsbət nəticələr verməkdədir. Uzun illər ərzində Azərbaycanla Türkiyə arasında xarici siyasətlə bağlı 400-ə yaxın sənəd-saziş, müqavilə, memorandum, protokol, bəyannamə, razılaşma imzalanıb. Xüsusilə son illər ölkələrimiz arasında əldə olunan yeni razılaşmalar, imzalanan müqavilələr, sənədlər, o cümlədən Şuşa Bəyannaməsi bir daha xalqlarımız arasındakı dostluq, qardaşlıq münasibətlərinin daha da möhkəmlənməsindən, onun sarsılmazlığından xəbər verir".
Onun sözlərinə görə, Azərbaycanla Türkiyə arasında əlaqələrin mövcud səviyyəsi təkcə bu iki qardaş dövlətin mənafeyinə xidmət etmir, həm də regional və beynəlxalq sülhə və rifaha, sabitliyin bərqərar olmasına mühüm töhfə verir. Şübhəsiz ki, məhz bu unikal münasibətlər iki qardaş ölkənin dünya birliyində də çox əhəmiyyətli yer tutmasına, mövqelərinin möhkəmlənməsinə daha əsaslı zəmin yaradır.