Dekabrın 29-da Vergilər Nazirliyinin Xüsusi Rejimli Vergi Xidməti Departamentində Azərbaycanda sahibkarlığın inkişafında mühüm mərhələ olan “bir pəncərə” sisteminin təqdimat mərasimi olmuşdur.

Azərbaycan Prezidenti İlham Əliyev mərasimdə iştirak etmişdir.

Dövlətimizin başçısı əvvəlcə departamentin binasında xalqımızın ümummilli lideri Heydər Əliyevin büstü önünə gül dəstəsi qoydu.

“Bir pəncərə” sisteminin tətbiqi proseduru ilə tanış olan Prezident İlham Əliyevə məlumat verildi. Vergilər naziri Fazil Məmmədov bildirdi ki, dövlət başçısının “Azərbaycan Respublikasında sahibkarlığın inkişafı ilə bağlı bəzi tədbirlər haqqında” 2007-ci il 30 aprel tarixli Fərmanı və “Sahibkarlıq fəaliyyəti subyektlərinin fəaliyyətinin “bir pəncərə” prinsipi üzrə təşkilinin təmin edilməsi tədbirləri haqqında” 2007-ci il 25 oktyabr tarixli Sərəncamına uyğun olaraq, elektron hökumətin əsas elementlərindən olan "bir pəncərə" sistemi məlumatların bir mərkəzdə cəmləşdirilməsini, vergi qeydiyyatı da daxil olmaqla, bütün inzibati qeydiyyatların tamamilə sinxronlaşdırılmasını nəzərdə tutur. İş adamlarının mərkəzi sistemlə avtomatik, on-layn və davamlı əlaqəsi yaranır. Faktik olaraq, bu, lisenziyaların mərkəzləşdirilmiş qaydada və elektron şəkildə təqdim edilməsi deməkdir. Bu zaman, qeydiyyat prosedurlarının sayı azalır və vaxt itkisinin qarşısı alınır. Qeydiyyatın “bir pəncərə” prinsipi üzrə aparılması sahibkarlıq sektoruna marağın güclənməsinə və biznesin inkişafına təkan vermişdir. Digər tərəfdən, “bir pəncərə” sisteminin tətbiqi investisiya mühitini daha da yaxşılaşdıracaq, sahibkarların dövlət qurumlarından asılılığını azaldacaq, uzunmüddətli qeydiyyat prosedurları ləğv olunacaq və sadələşdiriləcəkdir. Bu isə son nəticədə sahibkarın cəmi bir neçə gündə qeydiyyata alınmasına və fəaliyyətə başlamasına imkan verəcəkdir.

Bu, sərəncamda nəzərdə tutulduğu kimi, ölkədə sahibkarlığın inkişafının sürətləndirilməsi, biznes mühitinin əlverişliliyinin daha da artırılması və biznesə başlama prosedurlarının sadələşdirilməsi üçün zəruri tədbirlərin görülməsi məqsədi ilə yeni ildən tətbiq olunacaqdır.

Prezident İlham Əliyev təqdim edilən ərizə üzrə kommersiya hüquqi şəxsin qeydiyyatı prosesinin yekun mərhələsi ilə tanış oldu. Dövlətimizin başçısının iştirakı ilə kommersiya hüquqi şəxsi dövlət qeydiyyatına alındı. O da bildirildi ki, burada bütün məlumat kitabçaları qoyulub, elektron məlumat terminalları da sahibkarlara xidmət edir. Sistem vasitəsilə şəffaflıq tam təmin edilib və tətbiq olunan təcrübəyə görə, ölkəmiz Şərqi Avropa ölkələrini qabaqlayır.

İndiyədək hökumət lisenziya verən qurumların sayının azaldılması ilə əlaqədar tədbirlər görsə də, qeydiyyat məsələsində problemlər hələ də qalırdı. Sahibkarlar fəaliyyətə başlamaq üçün 15 prosedur üzrə sənəd toplamalı, həmin sənədləri əldə etmək üçün vergilər, kənd təsərrüfatı, əmək və əhalinin sosial müdafiəsi nazirliklərindən, Dövlət Statistika Komitəsindən, Sosial Müdafiə Fondundan və digər dövlət qurumlarından keçməli idilər. Bu isə ən azı 150 gün vaxt aparırdı. Hətta işə başlamaq üzün sahibkarlar 1 il gözləməyə məcbur idilər. “Bir pəncərə ” sisteminin tətbiqindən sonra biznesini qeydiyyatdan keçirmək istəyən sahibkar, əvvəllər olduğu kimi 72 deyil, 3 gün gözləyəcək və tələb olunan prosedurların sayı 15-dən 5-ə qədər azaldılacaqdır. Sahibkarlar sənədlərini yalnız bir dövlət orqanına - Vergilər Nazirliyinə təqdim etməklə qeydiyyatdan keçəcəklər. Bundan başqa, sənədlərin elektron sistemlə təqdim edilməsi də tətbiq olunacaqdır.

Sonra respublikanın bölgələrində fəaliyyət göstərən ərazi vergi orqanları ilə canlı bağlantı yaradıldı. Naxçıvan Muxtar Respublikası, Sumqayıt və Gəncə üzrə məruzələr dinlənildi.

Prezident İlham Əliyev bayramlar münasibətilə ərazi vergi orqanlarının əməkdaşlarını təbrik edərək dedi:

-Mən sizi qarşıdan gələn Dünya azərbaycanlılarının həmrəyliyi günü və Yeni il münasibətilə təbrik edirəm. Çox şadam ki, yeni il ərəfəsində Azərbaycanda belə gözəl mərkəzlər yaradılıb, fəaliyyətə başlayır və sahibkarlara gözəl xidmət göstərəcəkdir. Bu, yenilikdir, müasirlikdir, gələcəyə doğru böyük addımdır. Əminəm ki, bu sistem tam şəkildə işə düşəndən sonra Azərbaycanda sahibkarlıqla məşğul olmaq istəyənlərin sayı daha da artacaqdır. Artıq bütün bürokratik əngəllər aradan qaldırıldı, ən sadələşdirilmiş sistem tətbiq edilir. “Bir pəncərə” sistemi dünyada ən mütərəqqi praktikadır. Əminəm ki, həm şəffaflıq təmin olunacaq, həm də sahibkarlıqla məşğul olmaq istəyənlər üçün daha yaxşı şərait yaradılacaq və bu sistemin işə düşməsindən sonra Azərbaycanda bütövlükdə iqtisadi inkişaf daha da yüksək sürətlə davam etdiriləcəkdir.

Azərbaycanda bütün sahələrdə ən müasir praktika tətbiq olunmalıdır. Biz bəzi hallarda dünyada ən gözəl təcrübəni götürüb istifadə edirik, bəzi hallarda isə inkişaf etmiş bir neçə ölkədən bir addım qabaqdayıq. Azərbaycan, bax, bu cür inkişaf etməlidir. İndi mən bütün regionlarda olan şəraiti, təchiz edilmiş bütün müasir avadanlıqları görürəm. Əminəm ki, bütün regionlarda insanlara, sahibkarlara çox gözəl xidmət göstəriləcəkdir. Sağ olun.

X X X

Sonra dövlətimizin başçısı bu ilin dekabrın 29-na olan vergi daxilolmalarına nəzər saldı, daha bir hüquqi şəxsin qeydiyyatı prosesini izlədi.

Prezident İlham Əliyevə Vergilər Nazirliyinin “195” telefon xidməti barədə də məlumat verildi. Bildirildi ki, bu telefon xidməti vergi ödəyicilərinin müraciətlərinin cavab verilməsi, vergi qanunvericiliyinə dair Azərbaycan, rus və ingilis dillərində operativ informasiya almaları üçündür. Hər gün saat 18.00-dan sonra xidmət avtomatik rejimə keçir.

Daha sonra dövlətimizin başçısı “bir pəncərə” sisteminin tətbiqi və avtomatlaşdırılmış vergi sistemi ilə tanış oldu, bununla bağlı filmə baxdı.

Prezident İlham Əliyevə 2007-ci ildə ölkədə həyata keçirilən vergi siyasəti barədə məlumat verildi. Vurğulandı ki, bu il xəzinəyə daxilolmalarda 47 faiz artım olmuşdur. Nazirliyin 300-dən çox nəzarət mexanizmi yaradılmışdır. Bəyannamə tərtibi üçün vaxt 952 saatdan 250 saata endirilmişdir. Əlavə dəyər vergisi ödəyicilərinin 90 faizi vergi əməliyyatlarını internet vasitəsilə həyata keçirməyə başlamışdır. Bu il əlavə dəyər vergisi üzrə daxilolmalar 584 min manatdan çox olmuş, gələn isə 980 min manata çatacaqdır. Borclu vergi ödəyicilərinin sayı azalmış, elektron arxiv yaradılmış, vertikal nəzarət gücləndirilmiş, vergi nəzarətində insan amili minimuma endirilmişdir. Digər dövlət orqanları ilə inteqrasiya sürətlənmişdir.

Prezident İlham Əliyev dedi ki, qısa müddət ərzində görülən işlər bir daha təsdiqləyir ki, mənim qərarım düzgün qərar idi. Mən “bir pəncərə” sistemini məhz Vergilər Nazirliyinə tapşırmışam. Siz də bunu çox yaxşı icra etmisiniz. Tam şəffaflıq, rahatlıq, sahibkarlığın inkişafı üçün, nəzarətin gücləndirilməsi üçün çox böyük işlər görülübdür.