Tbilisi, 12 iyun (AZƏRTAC). Tbilisidə Avropa Şurasının Gənclər Siyasəti Departamenti və Gürcüstan İdman, Gənclərlə iş Nazirliyinin dəstəyi ilə Avropa və Cənubi Qafqaz ölkələri gənclərinin sosial rifahı, həyat şəraitinin yaxşılaşdırılması və s. sahələrə dair simpozium keçirilmişdir.

Simpoziumda Azərbaycan 5 nəfərlik nümayəndə heyəti ilə təmsil olunmuşdur.

Beynəlxalq tədbirin iştirakçısı, “Aran” Humanitar Regional İnkişaf İctimai Birliyinin layihə əlaqələndiricisi Vüsal Zeynalov demişdir ki, simpoziumda gənclərlə iş, məşğulluq və digər sahələrdə Avropada mövcud olan təcrübə, həmçinin bu istiqamətdə Cənubi Qafqaz ölkələrində həyata keçirilən işlər barədə fikir mübadiləsi aparılmışdır. Tədbir Avropada gənclərlə iş sahəsində əldə olunmuş dəyərlərin təbliği baxımından mühüm əhəmiyyət kəsb edir. Simpoziumda Cənubi Qafqaz və Avropanın və 35 ölkəsindən 100 nəfərədək gənc iştirak etmişdir.

V.Zeynalov qeyd etmişdir ki, simpoziumda günün birinci yarısı ümumi məsələlər, yəni Avropa Şurasına daxil olan ölkələrdə gənclər siyasətinin müəyyənləşdirilməsinə dair qanunvericilik və müsbət təcrübənin öyrənilməsi kimi məsələlər müzakirə olunur, günün ikinci hissəsində isə işçi qrupları işi davam etdirirlər. İşçi qruplarında sosial rifah və məşğulluq sahəsi ilə bağlı məsələlərin müzakirəsinə geniş yer verilir, müsbət təcrübələr öyrənilir, gələcək əməkdaşlıq yolları müəyyənləşdirilir, təhsilin müsbət meylləri, bu sahədə həyata keçirilən islahatlara nəzər salınır.

Simpoziumun Cənubi Qafqaz ölkələrinin Avropa dəyərlərinə inteqrasiyası baxımından gənclərin əlaqələrinin və əməkdaşlığının daha da möhkəmləndirilməsi istiqamətində mühüm əhəmiyyəti də vurğulanmalıdır. Qeyd edim ki, bizim gürcülərlə əlaqələrimiz yüksək səviyyədədir, bunu avropalı iştirakçılar da gördülər. O, demişdir ki, Ermənistanın ölkəmizə qarşı işğalçılıq siyasəti ilə əlaqədar aramızda elə münasibət qurmaq mümkün deyildir. İşçi qrupunda məsələ müzakirə olunarkən biz öz mövqeyimizi bildirdik və Ermənistanın Azərbaycan torpaqlarını işğal etdiyini, bunun nəticəsində bir milyondan çox soydaşımızın doğma yurd-yuvasından qaçqın düşdüyünü, onların sırasında çoxlu sayda gənclərin ağır qaçqınlıq həyatı yaşadığını iştirakçıların nəzərinə çatdırdıq. Təəssüf ki, həmişə olduğu kimi, bu dəfə də Avropa strukturları işin məğzinə varmamış, ikili standartlar burada da özünü göstərmiş, belə məsələlərin simpoziumdan kənar müzakirəyə çıxarılması məsləhət görülmüşdür.

V.Zeynalov demişdir ki, son illər ölkəmizdə hər sahədə olduğu kimi, gənclərin sosial həyatının, məşğulluğunun yaxşılaşdırılması sahəsində də böyük inkişaf vardır. Gənclər Azərbaycanın həm seçkili, həm də dövlət orqanlarında kifayət qədər təmsil olunmuş, ona dövlət qayğısı ilbəil artmaqdadır. Biz bütün bunlar barədə həmkarlarımıza ətraflı məlumat verdik.

Bakı Dövlət Universitetinin tələbəsi Aynur Salmanova simpoziumun gələcəkdə gənclər siyasətinin daha yüksək səviyyədə təşkilinə şərait yaratmaq və təcrübə mübadiləsi aparmaq baxımından səmərəli olduğunu diqqətə çatdırmışdır.

Simpozimun təşkilatçısı Viktoriya Karpatska məqsədin təmsilçi dövlətlərin nümayəndələrinin öz ölkələrində həyata keçirilən gənclik siyasəti və onun təkmilləşdirilməsi barədə təcrübə mübadiləsi aparmaq, onların daha səmərəli əməkdaşlığına şərait yaratmaqdan ibarət olduğunu bildirmişdir. O qeyd etmişdir ki, simpoziumda Azərbaycan nümayəndələri əlbir şəkildə, çox fəal iştirak etmişlər.

İslam Əliyev

AZƏRTAC-ın xüsusi müxbiri

Tbilisi