“Azİz” HAMINI DƏVƏT EDİR
Bu yaxınlarda yaradılmış “Azİz” (Azərbaycan-İsrail) Ümumisrail Assosiasiyasının təşkilatçıları qurumu inzibati-coğrafi prinsip üzrə şərti olaraq üç bölməyə - şimal, mərkəz və cənub bölmələrinə ayırmışlar. Assosiasiyanın prezidenti, Knessetin deputatı Yosef Şaqal bu günlərdə etiraf etmişdir ki, hazırda cənub bölməsi və onun idarə heyəti çox fəal işləyir.
Bəlkə də, bu, ilk növbədə, onunla bağlıdır ki, bölməyə tanınmış jurnalist, sənədli film ustası, “REKA” radiosunun müxbiri Nina Yarovaya başçılıq edir. Yaşının 80-ni ötməsinə baxmayaraq, onun həmfikirləri bir araya gətirib qrup təşkil etmək, insanları ruhlandırıb ardınca aparmaq bacarığı gənclərə əsl nümunə ola bilər. Azərbaycanın Dövlət mükafatı laureatı Nina Yarovayanın adı 50 ildən çox bundan əvvəl Azərbaycan televiziyasını yaradan jurnalistlər sırasındadır. Heydər Əliyevin hələ doğma Naxçıvana zəfərlə qayıdışından əvvəl ədalətsiz və haqsız yerə təqib olunduğu günlərdə, demək olar, olduqca məxfi şəraitdə “Əziz Heydər Əliyeviç” filmi (rejissor Yalçın Əfəndiyev) məhz onun ssenarisi əsasında çəkilmişdi.
“Azİz”in cənub bölməsinə rəhbərliyə başlayan Nina Yarovaya dərhal işə girişdi. İdarə heyətinin planları kifayət qədər iddialı idi. “Teatron Byeer-Şeva”nın yaradıcı özəyini bakılıların təşkil etdiyi rus truppasının ifasında Nadejda Ptuşkinanın pyesinə quruluş verməsi onun ilk sanballı işi oldu.
... Gənclər sarayına giriş İsrailin və Azərbaycanın dövlət bayraqları ilə bəzədilmişdi. Foyedə isə əksəriyyəti keçmiş bakılılardan ibarət olan (əgər ümumiyyətlə onların barəsində “keçmiş” sözünü demək olarsa) geyinib-kecinmiş, şən əhval-ruhiyyəli tamaşaçılar gəzişirdilər.
Bu yaxınlarda Bakıya səfərdən qayıtmış Yosef Şaqal tamaşadan əvvəl salondakılara təbrik sözləri ilə müraciət etdi. Yeri gəlmişkən, o, bu səfərdə İsrail Baş nazirinin müavini, strateji məsələlər naziri Aviqdor Libermanı müşayiət etmişdir. Knessetin deputatı bildirdi ki, ilk növbədə, Azərbaycan Prezidenti İlham Əliyevlə və digər rəhbər işçilərlə ölkələrimiz üçün böyük əhəmiyyət daşıyan görüşlər keçirildi.
Y.Şaqal dedi ki, nümayəndə heyətini əsl bakısayağı səmimiyyət və qonaqpərvərliklə qəbul etdilər, Azərbaycan torpağında keçirilən görüşlər hamıda unudulmaz təəssürat doğurdu. Bu səfər ikitərəfli münasibətlərin bundan sonra da uğurlu inkişafının, İsrailin və Azərbaycanın müxtəlif sahələrdə səmərəli əməkdaşlığının etibarlı əsasını qoydu. Bunun üçün artıq konkret planlar, ən başlıcası isə, bu əməkdaşlığı inkişaf etdirmək, əlaqələri hər iki xalqın rifahı naminə dərinləşdirmək arzusu və niyyəti vardır.
...“Anormal qadın” əsərinin ilk tamaşası ilyarım əvvəl olmuşdu. Lakin bu tamaşanı əvvəllər görənlər belə, həmin gecə özləri üçün yeni çalarlar, yeni motivlər kəşf etdilər. Yalnız iki aktyorun saatyarım ərzində çıxış etdiyi pyesdə, əslində, kişi və qadın arasında ilk baxışda ağlasığmaz həyat dramı oynanıldı. Kədərli qadın tənhalığının, böyük şəhərdə gözlənilmədən bir-birini tapmış və labüd itki ilə qarşılaşmış insanların kəşməkəşli məhəbbət hekayətinin məharətli, həssas səhnə təcəssümü həm rejissor, həm də aktyorlar üçün olduqca çətin sınaq idi.
Lakin yaradıcı kollektiv bu vəzifənin öhdəsindən böyük məharətlə gəldi. Yaxın keçmişdə Azərbaycan Dövlət Rus Dram Teatrının aktrisası olan Yevgeniya Şarova həmişəki kimi gözəl oynayırdı. Onun qəhrəmanının gəncliyində keçirdiyi sarsıntıdan yaralanmış könlü nəinki bu ağrı-acıya davam gətirə bilmiş, həm də saflığını, qürurunu və yüksək insani keyfiyyətlərini qoruyub saxlaya bilmişdir. Y.Şarova, əslində, səhnədə oynamır, o qəhrəmanın sıxıntılarını bütün varlığı ilə yaşayır, onun harayını çox təsirli tərzdə tamaşaçılara çatdırırdı.
Kişi rolunun ifaçısı, Sevastopol teatrının keçmiş aktyoru Dmitri Suser də öz yaradıcılığında xeyli irəliləmişdir. O, qadın gücü və qəlb çırpıntıları qarşısında aciz qalan varlı, güclü, özünə güvənən insanın mənəvi iflasını tamaşaçılara inandırıcı şəkildə çatdıra bildi.
Rejissor Aydın Əlizadə tamaşanı elə hazırlamış, ona elə güclü emosional və mənəvi ruh vermişdi ki, aramsız dialoqa və hadisələrin zahiri statikasına baxmayaraq, tamaşaçılar bu səhnə əsərini nəfəs dərmədən izlədilər və aktyorları gurultulu alqışlarla mükafatlandırdılar.
Cənub bölməsinin idarə heyəti bir sıra digər tədbirlər keçirməyi, o cümlədən Azərbaycan mətbəxi festivalı təşkil etməyi planlaşdırır.
Bölmənin digər xəbərləri
