Bakı, 15 may, Məhərrəm Əlioğlu, AZƏRTAC

Mayın 15-də “Bakı-2017” IV İslam Həmrəyliyi Oyunlarının atıcılıq yarışlarının üçüncü günü Azərbaycan milli komandası üçün uğurlu olub.

AZƏRTAC xəbər verir ki, Bakı Atıcılıq Mərkəzində keçirilən yarışların üçüncü günündə idmançılarımız 2 qızıl və 1 gümüş medal qazanıblar.

Mayın 15-də qadınların 50 metrdən 3 vəziyyətdə tüfəng ilə atəş, kişilərin 50 metrdən tapança ilə atəş, kişilərin 25 metrdən standart tapança ilə atəş, kişilərin, qadınların dairəvi stend və qarışıq komanda halında səngər stendi yarışları keçirilib.

Azərbaycan idmançısı Ruslan Lunyov IV İslam Həmrəyliyi Oyunlarında üçüncü qızıl medalını qazanıb. İdmançımız kişilər arasında 25 metr məsafədən standart tapança ilə atəşaçma yarışında 573 xal toplayaraq çempion olub.

Gümüş medala 569 xalla Qətər idmançısı Əhməd Zayed Əl Səmari, bürüncə isə 562 xalla Türkiyə atıcısı Özgür Varlık layiq görülüb.

Səngər stendi üzrə qarışıq komanda yarışında Azərbaycan komandası hamıdan üstün olaraq qızıl medala sahib olub. Finalda yığmamıza qızıl medalı 43 xal toplayan Əli Hüseynli və Aydan Camalova qazandırıblar. Komandamız həlledici qarşılaşmada türkiyəli Oğuzxan Tuzun və Nihan Gürer duetindən üstün olub. Üçüncü yeri isə Qətər komandası tutub.

Oyunların atıcılıq yarışında dairəvi stend üzrə mübarizənin qalibi 45 xalla Türkiyə idmançısı Banu Nur Özpak olub. Azərbaycan idmançısı Nurlana Cəfərova finalda məğlub olaraq yarışın gümüş medalını qazanıb. Bürünc medalı isə aktivinə türkiyəli İzel Aydın yazdırıb. İdmançılarımız Püstəxanım Məlikova və Regina Meftahətdinova təsnifat mərhələsində mübarizəni dayandırıblar.

Atıcılıq yarışlarında kişilər arasında 50 metr məsafədən tapança ilə atəş açma üzrə mübarizədə ən yüksək nəticə göstərən (223 xal) türkiyəli Yusuf Dikec qızıl medal qazanıb. İkinci yerə 220,8 xal toplayan omanlı İsmail Ələbri, üçüncü yerə isə 200,9 xalla İran idmançısı Məhəmməd Əhmədi çıxıb. Azərbaycan idmançısı Rəsul Məmmədov yarışı 87 xalla səkkizinci pillədə başa vurub. Digər idmançımız Rəhim Rəhimov təsnifat mərhələsində mübarizəni dayandırıb. Ruslan Lunyov isə yarışa qatılmayıb.

Qadınlar arasında 50 metrdən 3 vəziyyətdə tüfəng ilə atəş yarışında ən yüksək nəticə göstərən iranlı Najmeh Hedmani (454.7 xal) qızıl medal qazanıb. Onun həmyerliləri Elahe Əhmədi ikinci, Mahlaqə Cambozorq isə üçüncü yerə çıxıblar.

Sonra qaliblərin mükafatlandırma mərasimi olub.

Qaliblərə medalları İslam Həmrəyliyi İdmanı Federasiyasının (ISSF) İcraiyyə Komitəsinin üzvü Osman Abu Vadda təqdim edib.

Qeyd edək ki, Azərbaycan yığma komandasına "Bakı-2017" IV İslam Həmrəyliyi Oyunlarında ilk qızıl medalı Ruslan Lunyov qazandırıb. O, kişilər arasında 25 metr məsafədən tapança ilə atəşaçma yarışında hamıdan dəqiq olub. Ötən gün isə Ruslan Lunyov 25 metr məsafədən tapança ilə sürətli atəşaçma yarışında qızıl medala yiyələnib.