RƏSMİ XRONİKA
BAKIDA AZƏRBAYCAN GƏNCLƏRİNİN IV FORUMUNUN YEKUN TOPLANTISI KEÇİRİLMİŞDİR
AZƏRBAYCAN PREZİDENTİ İLHAM ƏLİYEV TOPLANTIDA İŞTİRAK ETMİŞDİR
Xalqımızın ümummilli lideri, müstəqil Azərbaycanın memarı və qurucusu Heydər Əliyevin Sərəncamı ilə 1996-cı il fevralın 2-də Respublika gənclərinin ilk forumu keçirilmişdir. Ötən müddətdə ölkəmizin həyatında çox böyük müsbət dəyişikliklər baş vermiş, mühüm uğurlar qazanılmışdır. Bunların əldə olunmasında gənclərin də böyük rolu var. Eyni zamanda bu müddətdə gənclərə dövlət səviyyəsində diqqət və qayğı da artmışdır.
Ulu öndər Heydər Əliyev Azərbaycanın sağlam gəncliyini müasir dünyanın əldə etdiyi nailiyyətlər səviyyəsinə qaldırmağı, ölkəmizdə müstəqil, demokratik, hüquqi, sivilizasiyalı dövlət quruculuğu işinə cəlb etməyi mühüm vəzifə kimi irəli sürmüşdür. Dahi rəhbər həmişə vurğulamışdır ki, gənclərimizin əsas vəzifəsi özlərini ölkəmizin inkişafına həsr etməkdən, Azərbaycanın yaşamasına, müstəqilliyin əbədiliyinə həsr etməkdən ibarət olmalıdır.
Azərbaycan gənclərinin IV Forumunun oktyabrın 14-də Heydər Əliyev adına Sarayda keçirilən yekun toplantısı respublika gənclərinin ulu öndərin vəsiyyətlərinə sadiqliyini bir daha nümayiş etdirdi.
Toplantıdan əvvəl iştirakçılar - respublikanın bütün şəhər və rayonlarından Bakıya gəlmiş nümayəndələr Heydər Əliyev adına Sarayın qarşısındakı parkda xalqımızın ümummilli liderinin abidəsi önünə gül dəstələri düzdülər, Azərbaycanın dahi oğlunun xatirəsini ehtiramla andılar.
Sarayın foyesində müasir Azərbaycan gənclərinin fəaliyyətini əks etdirən fotosərgi təşkil olunmuşdu.
Salonda ümummilli lider Heydər Əliyevin “Azərbaycanın gələcəyini möhkəm əllərdə saxlaya bilən, Azərbaycanı daim bütün xətalardan qoruya bilən, Azərbaycanın dövlət müstəqilliyini, demokratik dövlətini qoruya bilən gəncliyi var” sözləri yazılmış transparant diqqəti cəlb edirdi.
Azərbaycan Prezidenti İlham Əliyev toplantıda iştirak etmək üçün saraya gəldi. Salona toplaşanlar dövlətimizin başçısını gurultulu və sürəkli alqışlarla qarşıladılar.
2005-ci ilin aprel ayından başlayaraq dörd mərhələdə keçirilən Azərbaycan gənclərinin IV forumu həmin gün öz işini yekunlaşdırırdı. III forumdan ötən dövr Azərbaycanın əsaslı iqtisadi inkişaf və siyasi yüksəliş mərhələsi olmuşdur. Bu müddət ərzində respublikamızın Prezidenti İlham Əliyev tərəfindən daxili ictimai-siyasi sabitliyin qorunması, ölkənin iqtisadi qüdrətinin artırılması və xalqın həyat səviyyəsinin yüksəldilməsi, beynəlxalq aləmdə Azərbaycanın mövqeyinin möhkəmləndirilməsi istiqamətində çoxsaylı tədbirlər həyata keçirilmiş, əhalinin həyat səviyyəsinin daha da yaxşılaşdırılmasına xidmət edən fərmanlar, sərəncamlar imzalanmış, dövlət proqramları təsdiq olunmuşdur.
Azərbaycan gənclərinin IV Forumunun yekun toplantısı açıq elan olundu. Ölkəmizin dövlət himni əzəmətlə səsləndi.
Sonra Gənclər, idman və turizm naziri ƏBÜLFƏZ QARAYEV ötən forumdan indiyədək görülən işlər barədə məruzə etdi. O, ümummilli lider Heydər Əliyevin Azərbaycan gəncliyinə böyük diqqət və qayğısını xatırlatdı, 1996-cı il fevralın 2-də Azərbaycan Gənclərinin I Forumunun ümummilli lider Heydər Əliyevin Sərəncamına əsasən keçirildiyini bildirərək dedi:
- Müstəqil Azərbaycan gənclərinin 1996-cı il fevralın 2-də ulu öndərimizin təşəbbüsü və müvafiq Sərəncamı ilə keçirilmiş I Forumunda dövlət orqanlarının, gənclər təşkilatlarının və hər bir gəncin qarşısında duran vəzifələr müəyyənləşdirilmiş, gənc nəslin hərtərəfli inkişafı, problemlərin həlli sahəsində təsirli tədbirlərin görülməsi əsas vəzifə kimi irəli sürülmüşdür. Beləliklə, dövlətin gənclərlə bağlı həyata keçirdiyi siyasətə təkan verilmişdir.
1997-ci ildə Gənclər Gününün təsis edilməsi, 1999-cu ildə gənclərin II Forumunun keçirilməsi, “Dövlət gənclər siyasəti haqqında” Fərmanın imzalanması, “Gənclər siyasəti haqqında” Qanunun qəbul edilməsi və digər tədbirlər bir daha göstərir ki, ulu öndər Heydər Əliyev Azərbaycanda müasir gənclər siyasətinin əsasını qoymuşdur.
Nazir həmin dövrdən başlayaraq, Azərbaycanda gənclər hərəkatının geniş vüsət aldığını, bu sahədəki işlərin və dövlət gənclər siyasətinin Prezident İlham Əliyevin rəhbərliyi ilə yeni mərhələdə daha da inkişaf etdirildiyini diqqətə çatdırdı. Əbülfəz Qarayev işsizliyin aradan qaldırılması, ölkəmizdə turizmin inkişaf etdirilməsi, tələbələrlə iş, hərbi xidmət və digər sahələrdə görülən tədbirləri təhlil etdi.
Natiq uşaqlarla işin yüksək səviyyədə qurulduğunu vurğulayaraq, Heydər Əliyev Fondunun prezidenti, YUNESKO-nun xoşməramlı səfiri Mehriban xanım Əliyevanın bu sahədəki humanist fəaliyyətindən bəhs etdi.
Məruzədə Ermənistan-Azərbaycan, Dağlıq Qarabağ münaqişəsi nəticəsində gənclərimizin və uşaqlarımızın düşdüyü ağır vəziyyət, bu problemin aradan qaldırılmasında ölkə rəhbərliyinin həyata keçirdiyi tədbirlər barədə də danışıldı.
Nazir daha sonra dedi:
- Bu gün ölkəmizin ərazi bütövlüyünün bərpa olunması, vətəndaş cəmiyyətinin qurulması proseslərində və ictimai-siyasi həyatda gənclərin fəal iştirakı gözə çarpmaqdadır. Bu, gənclərin bir daha öz qüvvəsinə inanmasını və gənc vətəndaşların ölkəmizin Prezidentinin apardığı daxili və xarici siyasətin yalnız müşahidəçiləri olmaq istəmədiklərini sübut edir. Mən əminəm ki, gənclərimiz ulu öndərimizin siyasi xəttini bundan sonra da müdafiə edərək, möhtərəm Prezidentimiz cənab İlham Əliyevin ətrafında daha möhkəm birləşəcək, müstəqil, hüquqi, demokratik Azərbaycan dövlətçiliyinin möhkəmləndirilməsində, sosial-iqtisadi inkişafında, ölkəmizin ərazi bütövlüyünün təmin olunması və qorunmasında yaxından iştirak edəcək, müstəqilliyimizin əleyhinə çıxan bütün qüvvələrə qarşı birgə mübarizə aparacaqlar.
Forumun gedişi zamanı xalqımızın ümummilli lideri Heydər Əliyevin Azərbaycan gəncliyinə, gənclər hərəkatının inkişafına, uşaqlara, onların sağlam böyüməsinə diqqət və qayğısından bəhs edən film nümayiş etdirildi. Filmdə müasir Azərbaycanın qurucusu, ulu öndər Heydər Əliyevin respublika gənclərinin forumlarında, müxtəlif tədbirlərdə söylədiyi müdrik kəlamları səsləndirildi:
“Bütün Azərbaycan gənclərinə öz sevgimi, məhəbbətimi bildirirəm. Əmin ola bilərsiniz ki, mən bütün dövlət orqanlarının gənclərə qayğısının artırılmasını təmin edəcəyəm. Sizə gələcək həyatınızda yeni uğurlar arzulayıram. Azərbaycanın gənclərinə xoşbəxt gələcək arzulayıram.
Yaşasın Azərbaycanın gəncləri!
Yaşasın yenilməz, bölünməz, müstəqil Azərbaycan Respublikası!..
Biz XXI əsrə doğru gedirik. XXI əsr gənclərin əsridir. XXI əsr Azərbaycanda gənclərin müstəqil dövləti qurub yaratmaq və inkişaf etdirmək dövrüdür. Əziz gənclər, siz Azərbaycanın XXI əsrinin qurucularısınız. Sizə bu yolda uğurlar olsun, eşq olsun!..
Əziz balalar, uşaqlar, gənclər, siz Azərbaycanın gələcəyisiniz. Müstəqil Azərbaycanın gələcək illərinin qurucularısınız. Xalqımız, millətimiz sizə böyük ümidlər bəsləyir...
Torpaqlarımız azad olacaq, ordumuz inkişaf edəcək, respublikamızın iqtisadiyyatı inkişaf edəcək və yaxın illərdə Azərbaycan böyük inkişaf yoluna qədəm qoyacaqdır. Buna əmin ola bilərsiniz...
Azərbaycanı, Azərbaycan dövlətini yaşatmaq üçün, Azərbaycan dövlətini inkişaf etdirmək üçün hazır olun!..
İndi artıq tam qətiyyətlə demək olar ki, Azərbaycan gəncləri təşkilatlanıb, Azərbaycan gəncləri birləşib, Azərbaycan gəncləri cəmiyyətdə öz yerini tutub və Azərbaycan gəncləri müstəqil Azərbaycanın inkişaf etməsi üçün lazımi işlər görürlər...
Hər bir Azərbaycan gənci öz həyat yolunu müstəqil Azərbaycan Respublikasının gələcək yolu kimi qəbul etməlidir...
Sizi, bütün Azərbaycan gənclərini, Azərbaycanın gələcəyini mən əmin etmək istəyirəm ki, biz Azərbaycanın dövlət müstəqilliyini, Azərbaycan xalqının milli azadlığını daim qoruyacağıq və onu əbədi edəcəyik...”
Prezident İLHAM ƏLİYEVİN “Müasir Azərbaycanı gücləndirəcəyik, zənginləşdirəcəyik, hərtərəfli inkişaf etdirəcəyik və sənin yolunla yeni qələbələrə doğru gedəcəyik” sözləri isə ulu öndərin siyasi xəttinin varisliyinin bir daha təsdiqi kimi səsləndi.
Sonra Respublika Gənclər Təşkilatları Milli Şurasının Məclis sədri SEVİNC MƏSİYEVA çıxış edərək, təşkilatın yaranması, formalaşması və fəaliyyəti barədə ətraflı məlumat verdi. Bildirdi ki, Milli Şurada təmsil olunan gənclər təşkilatları Azərbaycan gəncliyinin hərtərəfli inkişafı istiqamətində köməyini əsirgəmir. Sevinc Məsiyeva Şuranın fəaliyyətinin müxtəlif sahələrini təhlil etdi və bir sıra məqamları forum iştirakçılarının diqqətinə çatdıraraq dedi:
- Azərbaycan gəncliyinin potensialına böyük önəm verən, gənclərin qayğıları, problemləri və narahatlıqları ilə daim maraqlanan, onların istək və arzularını reallaşdırmaları üçün əlverişli mühit yaradan dayağımız var. Bu dayaq Prezidentimiz İlham Əliyevdir. Cənab Prezident, Sizə Azərbaycan gənclərinin, Azərbaycan Respublikası Gənclər Təşkilatları Milli Şurası ətrafında birləşən gənclər təşkilatlarının dərin ehtiramını bildirir və Azərbaycanımızın sağlam və xoşbəxt gələcəyi naminə gördüyünüz işlərdə davamlı uğurlar diləyirik. Gənclər hər zaman Sizin ətrafınızda böyük qüvvə kimi birləşməyə hazırdır. Möhtərəm Prezident, biz Sizinlə birlikdə olmaqdan qürur duyuruq.
X X X
Azərbaycan Prezidenti İlham Əliyev Forumda geniş nitq söylədi.
X X X
Forumun Təşkilat Komitəsinin sədri İntiqam Babayev toplantının yekun sənədlərində nəzərdə tutulan müddəalar barədə məlumat verdi. Yekun toplantısında Azərbaycan Gənclərinin IV Forumunun Qətnaməsi və respublika gənclərinə Müraciət qəbul edildi.
Bununla da IV Forumun yekun toplantısı başa çatdı.