Bakı, 9 fevral (AZƏRTAC). Çində ay təqviminə görə qeyd edilən Yeni il bayramı bu il fevralın 9-na təsadüf edir. Bu bayramı çinlilər “Çuncye” adlandırırlar. Qədim dövrlərdən Çində “Çuncye” bayramı baharın başlamasından xəbər vermiş və əhalini kənd təsərrüfatı işlərinə çağırmışdır. Hər bir çinlinin həyatında xüsusi yer tutan bu bayram zamanı kütləvi xalq şənlikləri keçirilir, atəşfəşanlıq olur.

Çin Yeni ili bir çox ənənələri və duaları ilə də zəngindir. İnsanlar Yeni ilə bir ay əvvəldən hazırlaşır, hədiyyələr alır, bayramın rəmzlərini əks etdirən suvenirlər hazırlayırlar. Evlər, küçə və meydanlar, parklar kağızdan hazırlanmış qırmızı fanarlarla bəzədilir, qapı və pəncərələr qırmızı rənglə boyadılır. Bayram günü qırmızı geyinmək də növbəti ildə uğurlara yol açır. Yeni il şənlikləri 15 gün davam edir və həmin müddətdə süfrəyə qoyulan hər bir yeməyin öz mənası vardır. Bu günlər evlərdə əsasən dəniz məhsulları, müxtəlif şirniyyatlar yeyilir. Adətə görə, bayram süfrəsində boş yer olmamalıdır. Bayram axşamı fişənglər atılır. Qədim inanclara görə, bununla pis ruhlar qovulur, əvəzində hər bir evdə xoşbəxtlik və əmin-amanlıq yaranır.

AZƏRTAC xəbər verir ki, fevralın 9-da Bakı Dövlət Universitetinin nəzdindəki Konfutsi İnstitutunun təşkilatçılığı ilə Xəzər Universitetində Çin Xalq Respublikasının Yeni ilinə həsr olunmuş bayram tədbiri keçirilmişdir.

Tədbirdə çıxış edən Bakı Dövlət Universitetinin prorektoru, professor Adil Kazımzadə Azərbaycan-Çin münasibətlərinin qədim tarixi köklərə malik olduğunu bildirmişdir. Vurğulamışdır ki, diplomatik əlaqələrin əsası ulu öndər Heydər Əliyevin 1994-cü ildə Çinə səfəri ilə başlamış, Prezident İlham Əliyevin dost ölkəyə səfərləri ilə daha da dərinləşmişdir.

Prorektor bildirmişdir ki, BDU-nin nəzdində Konfutsi İnstitutunun yaradılması bu dostluğun əyani nümunəsidir. O, bu institutun iki ölkə xalqlarının dostluq əlaqələrinin möhkəmlənməsinə və əməkdaşlığın dərinləşməsinə təkan verəcəyinə inamını ifadə etmişdir. Bildirmişdir ki, Konfutsi İnstitutunun paytaxtdakı ali təhsil müəssisələrində filiallarının yaradılması nəzərdə tutulur.

Çin Xalq Respublikasının Azərbaycandakı səfiri Xun Tsyuin 2012-ci ildə ölkəsinin əldə etdiyi uğurlardan danışmışdır. İki ölkə arasında dostluq əlaqələrinin möhkəmləndiyini bildirən səfir Çin dilinin və mədəniyyətinin yayılmasında Konfutsi İnstitutunun rolundan da söz açmışdır. Demişdir ki, Çin dilinin öyrənilməsi, Çin ilə daha yaxın tanışlıq və iki tərəf arasında mədəni mübadilə əməkdaşlığının həyata keçirilməsi baxımından bu institut böyük xidmətlər göstərir.

Səfir Xun Tsyuin Azərbaycan gənclərinin Çin dilinə böyük maraq göstərmələrindən məmnunluğunu da ifadə etmişdir.

Xəzər Universitetinin təsisçisi, direktorlar və qəyyumlar şurasının sədri Hamlet İsaxanlı və Azərbaycan Respublikasının Prezidenti yanında Dövlət İdarəçilik Akademiyasının professoru Lalə Əhmədova da bayram təbriklərini çatdırmış, Azərbaycan-Çin əlaqələrinin möhkəmlənməsində təhsilin rolundan danışmışlar.

Sonra BDU-nun nəzdindəki Konfutsi İnstitutunun müəllim və tələbələrinə hədiyyələr təqdim olunmuşdur.

Rəsmi hissə başa çatdıqdan sonra musiqili əyləncəli proqram başlamışdır.

BDU-nun nəzdindəki Konfutsi İnstitutunun tələbələri Çinin xalq mahnılarını ifa etmiş, şeirlər söyləmiş, bu ölkənin milli geyimlərini nümayiş etdirmişlər. Eyni zamanda, tələbələr Azərbaycanın milli rəqslərini də ifa etmişlər.