REGİONLAR
Bakıda kənd təsərrüfatı məhsullarının növbəti satış yarmarkaları
Bakı, 14 fevral, AZƏRTAC
Fevralın 14-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilib. Paytaxt əhalisinin kənd təsərrüfatı məhsullarına tələbatını ödəmək məqsədilə təşkil edilən yarmarkalara mövsümə uyğun meyvə-tərəvəz və digər məhsullar çıxarılıb.
“Təzə bazar” MMC-nin həyətindəki yarmarkada alıcılara Sabirabad, Gədəbəy, Hacıqabul və digər rayonlardan gətirilmiş 10,45 ton məhsul, o cümlədən 0,4 ton ət, 0,1 ton ağartı, 3 ton tərəvəz, 3 ton meyvə və s. təklif olunurdu.
Kənd Təsərrüfatı Nazirliyinin nümayəndəsi Səfəralı Nəsirov dedi ki, yarmarkadakı qiymətlər bazarlardakından 20-25 faiz ucuzdur. Yarmarkada badımcan 1 manat 50 qəpiyə - 2 manata, kartof 70-90, soğan 35-45 qəpiyə təklif edilir. Burada, həmçinin qoyun ətinin kiloqramı 5 manat 50 qəpiyə, mal əti 5 manata, yumurtanın 1 ədədi 7-8 qəpiyə satılır.
Şənbə günü Yasamal rayonunda, Bakı Rabitə və Nəqliyyat Kollecinin həyətində təşkil edilən yarmarkaya bu əraziyə təhkim olunmuş Salyan, Qusar, Astara, Şabran, bundan əlavə Sabirabad, Quba, Göyçay, Gədəbəy, Kürdəmir, Bərdə, Xaçmaz rayonlarının fermerləri və torpaq mülkiyyətçiləri tərəfindən 139,4 ton meyvə-tərəvəz, bostan məhsulları, mal və qoyun əti, ağartı, göyərti və digər kənd nemətləri çıxarılmışdı.
Kənd Təsərrüfatı Nazirliyinin nümayəndəsi Fəxrət Eminov məlumat verdi ki, yarmarkada mövsümə uyğun bütün növ kənd təsərrüfatı məhsulları vardır. Buradakı məhsullar bazarlardakından 25-30 faiz ucuz satılır.
Yarmarkaya daxil olan məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılır.
Yarmarkada nəzarət tərəzisi qoyulub, bütün məhsulların bazarlarla müqayisəli qiymətləri göstərilib.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 18,3 ton kənd təsərrüfatı məhsulları çıxarılıb.
Yarmarkada alıcılara kartof, soğan, kələm, bibər, badımcan, yerkökü, çuğundur, alma, qoz, fındıq, alma, armud, heyva, nar və sitrus meyvələri təklif edilirdi.
Yarmarkada kələmini 50-60 qəpiyə təklif edən Ağdaşlı Musa Babayev deyir ki, bir neçə ildir pay torpağında yetişdirdiyi məhsulu burada satır. Yaradılmış şəraitə görə o, digər bazarlara deyil, məhz buraya üz tutur. Onun sözlərinə görə, son 2 ayda burada 1, 5 tona yaxın kələm satıb.
Kənd Təsərrüfatı Nazirliyinin nümayəndəsi Məmməd Həziyev bildirdi ki, yarmarkada məhsulların keyfiyyəti ciddi surətdə yoxlanılıb, xüsusilə ət və süd məhsulları baytar müayinəsindən keçirilib.
Qəsəbə sakinləri təklif edilən məhsulları həvəslə alırdılar.
Suraxanı rayonu ərazisində təşkil olunmuş yarmarkalarda-“Günəş” ticarət mərkəzində (13,3 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (1,8
ton) satışa Samux, Quba, Biləsuvar, Cəlilabad və Ağsu rayonlarından, ümumilikdə, 15,1 ton məhsul çıxarılıb.
Kənd Təsərrüfatı Nazirliyinin nümayəndəsi Mustafa Rüstəmov bildirdi ki, hər iki yarmarkada mövsümi kənd nemətlərindən göyərti, kartof, soğan, badımcan, kələm, alma, armud, nar, heyva, xurma, balqabaq və digər məhsulların alıcıları çoxluq təşkil edir. Qiymətlər bazarlarla müqayisədə 25-30 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Şənbə günü Xətai rayonunda, “Bakı” kinoteatrının yaxınlığındakı yarmarkaya Kürdəmir, Salyan, Biləsuvar, Qax, Şəmkir, Qəbələ, Quba, Astara, Daşkəsən rayonlarından 311 ton meyvə-tərəvəz, ət və süd məhsulları gətirilmişdi.
Kənd Təsərrüfatı Nazirliyinin nümayəndəsi İsmayıl Sərdarlı məlumat verdi ki, yarmarkada məhsulların qiymətləri bazarlardakından 20-25 faiz ucuzdur. Eyni zamanda, məhsulların keyfiyyətinə və qiymətinə ciddi nəzarət olunur.
Yarmarkada qoyun ətinin kiloqramı 5 manat - 5 manat 50 qəpik, mal əti 4 manat 50 qəpik - 5 manata, quş əti 2 manat 20 qəpik - 4 manata, pendir 3 manat - 4 manat 50 qəpiyə, üzüm 2 manat - 2 manat 50 qəpiyə, pomidor 90 qəpik - 2 manata, heyva 60 qəpik - 1 manata, armud 1-2 manata, naringi 70 qəpik - 1 manat 20 qəpiyə, nar 1 manat -1 manat 80 qəpiyə, yerkökü 50 - 90 qəpiyə, xiyar 1 manat 10 qəpik- 2 manata, çuğundur 40-80, alma - 40-2 manata, kartof 70-90, soğan 45 qəpik - 1 manata, kələm 50-70, balqabaq - 50-70 qəpiyə, yumurtanın biri isə 6-10 qəpiyə təklif olunur.
Şəhər sakinləri yarmarkada yaradılan şəraitdən və məhsul bolluğundan razıdırlar.
Kənd Təsərrüfatı Nazirliyinin nümayəndəsi Savalan Seyfəddinov bildirdi ki, şənbə günü Nərimanov rayonunda, metronun “Gənclik” stansiyasının yaxınlığındakı yarmarkaya Xaçmaz, Tərtər, İmişli, Salyan, Tovuz, Neftçala, Oğuz rayonlarından 38 ton kənd təsərrüfatı məhsulları, Giləzi broyler fabrikindən 5 min ədəd yumurta gətirilib.
Yarmarkada ilk baxışdan canlanma, bolluq və qızğın alış-veriş gözə çarpır, çeşidlərin müxtəlifliyi hiss olunurdu. Alıcılara mövsümə uyğun tərəvəzlərdən pomidor, xiyar, kələm, kartof, soğan, yerkökü, çuğundur, meyvələrdən alma, armud, heyva, nar, naringi, portağal, həmçinin ağartı, göyərti və s. kənd nemətləri təklif edilirdi.
Paytaxt sakinləri yarmarkadakı meyvə-tərəvəz, göyərti və ağartı məhsullarının təzə və keyfiyyətli, eyni zamanda, bazarlardakından 25-30 faiz ucuz qiymətə olmasından razılıq edirdilər.
Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya bol məhsul çıxarılıb. Şəhər sakinləri burada bazarlıq etməyə maraq göstərirdilər. Goranboy, Ağstafa, Bərdə, Siyəzən və digər rayonlardan gəlmiş fermerlər meyvə-tərəvəzləri, süd və bostan məhsullarını bazardakından 20-30 faiz ucuz qiymətlərə satırdılar.
Yarmarkada yerkökünün kiloqramı 60-70, kələm 40-60, kartof 40-90, soğan 30-40, çuğundur 50-60, pomidor 1 manat- 1 manat 40, alma 20-50 qəpiyə təklif olunurdu.
Məhsullar həm də keyfiyyəti ilə diqqəti cəlb edirdi.
Kənd Təsərrüfatı Nazirliyinin nümayəndəsi Qadir Həsənovun verdiyi məlumata görə, yarmarkaya 25,2 ton meyvə-tərəvəz, ağartı və bostan məhsulları gətirilib.