İQTİSADİYYAT
Bakıda kənd təsərrüfatı məhsullarının növbəti satış yarmarkaları keçirilmişdir
Bakı, 7 iyul (AZƏRTAC). İyulun 7-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Paytaxt əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara mövsümə uyğun olaraq əsasən meyvə-tərəvəz məhsulları çıxarılmışdır.
“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdi.
Burada şəhər sakinlərinə Sabirabad, Gədəbəy, Hacıqabul və digər rayonlardan gətirilmiş 20,96 ton məhsul, o cümlədən 1,2 ton ət, 0,3 ton ağartı, 8 ton tərəvəz, 3,5 ton kartof, 5,2 ton meyvə, 0,2 ton taxıl məhsulları, 0,06 ton bal, min ədəd yumurta təklif olunurdu.
Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazardakından 20-25 faiz ucuzdur. Qoyun ətinin kiloqramı 6 manata, mal əti 5 manata, soğan 25-30, kartof 40-50, yerkökü 50-70, yumurtanın biri 8 qəpiyə və s. satılır.
Kənd Təsərrüfatı Nazirliyinin nümayəndəsi Fəxrət Eminov məlumat verdi ki, Yasamal rayonunda, Bakı Rabitə və Nəqliyyat Kollecinin həyətində təşkil edilmiş yarmarkaya bu əraziyə təhkim olunmuş Salyan, Qusar, Astara, Şabran rayonlarının, bundan əlavə, Gədəbəy və Göyçay rayonlarının fermerləri və torpaq mülkiyyətçiləri 88,5 ton meyvə-tərəvəz, ət, ağartı və digər məhsullar gətirmişlər.
Yarmarkada nümunəvi səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlıq etməyə gələn paytaxt sakinlərinə əlverişli şəraitin yaradılması diqqəti daha çox cəlb edirdi. Yarmarkada nəzarət tərəzisi qoyulmuş, lövhələrdə qiymətlərin bazardakılarla müqayisəsi göstərilmişdir.
Yarmarkada satışa çıxarılan məhsulların əksəriyyətini xiyar, pomidor, bibər, badımcan, yerkökü, çuğundur, kələm, soğan, kartof, göyərti, həmçinin meyvələrdən alma, armud və s. təşkil edir. Yarmarkada mövsümə uyğun məhsullardan olan lobya, alça, gavalı, şaftalı, çiyələk, gilas, tut, ərik və digər meyvə-tərəvəzlərin alıcıları daha çoxdur. Məhsullar bazarlardakından 20-25 faiz ucuz satılır. Bütün məhsulların sanitar-gigiyenik vəziyyəti Kənd Təsərrüfatı Nazirliyi yayında Dövlət Fitosanitar Nəzarəti Xidməti tərəfindən diqqətlə yoxlanılır.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 19 tondan çox müxtəlif çeşidli kənd təsərrüfatı məhsulları gətirilmişdir.
Yarmarkada təklif edilən məhsulların keyfiyyətli və bazardakından 25-30 faiz ucuz olması qəsəbə sakinləri tərəfindən razılıqla qarşılanmışdır.
Yarmarkada ərik, alça, gilas, xiyar, pomidor, lobya, badımcan və digər məhsullar təklif edilirdi.
Sakinlər yarmarkaların davamlı təşkilindən, məhsulların ucuz və keyfiyyətli olmasından məmnunluqla danışırdılar.
Kənd Təsərrüfatı Nazirliyinin nümayəndəsi Məmməd Həziyev bildirdi ki, fermerlərə və şəxsi təsərrüfat sahiblərinə satışa daha çox zəruri məhsul çıxarmaları üçün hər cür imkan yaradılmışdır.
Şənbə günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (25,4 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (2,9 ton) satışa Kürdəmir, Samux, Quba, Biləsuvar, Cəlilabad və Lənkəran rayonlarından gətirilmiş ümumilikdə 28,3 ton məhsul çıxarılmışdır.
Kənd Təsərrüfatı Nazirliyinin nümayəndəsi Mustafa Rüstəmovun verdiyi məlumata görə, hər iki yarmarkada mövsümə uyğun meyvələrdən ərik, çiyələk, alça, gavalı, gilas, tut, şaftalı, həmçinin alma, armud, naringi, tərəvəzlərdən pomidor, xiyar, soğan, kartof, badımcan, bibər, lobya və digər məhsulların, xüsusilə yay fəsli ilə əlaqədar göyərti və ağartı məhsullarının alıcıları çoxluq təşkil edir. Bazarlarla müqayisədə qiymətlər 25-30 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Xətai rayonunda, “Bakı” kinoteatrının yaxınlığındakı yarmarkaya Salyan, Biləsuvar, Qəbələ, Qax, Şəmkir, Kürdəmir, Quba və Astara rayonlarından 184 ton meyvə-tərəvəz, ət və süd məhsulları gətirilmişdir.
Kənd Təsərrüfatı Nazirliyinin nümayəndəsi Oqtay Hüseynov məlumat verdi ki, yarmarkada məhsullar bazarlardakından 20-30 faiz ucuz qiymətə satılır.
Yarmarkada şəhər sakinlərinə sərfəli qiymətə kartof, soğan, xiyar, pomidor, kələm, lobya, ərik, gilas, albalı, bibər, göyərti, şaftalı, alma, badımcan və digər məhsullar təklif olunur.
Kənd Təsərrüfatı Nazirliyinin nümayəndəsi Savalan Seyfəddinov bildirdi ki, şənbə günü Nərimanov rayonundakı Ə.Əliyev küçəsində təşkil olunmuş yarmarkaya Xaçmaz, Tərtər, İmişli, Salyan rayonlarından 36,5 ton kənd təsərrüfatı məhsulları və Giləzi broyler fabrikindən 12 min ədəd yumurta gətirilmişdir.
Paytaxt sakinləri burada ərik, gilas, alça, alma, armud, şaftalını, bostan məhsullarını, o cümlədən qarpızı, yemişi növbə ilə alırdılar. Onlar konservləşdirmək və qışa tədarük etmək üçün aldıqları məhsulların keyfiyyətindən və qiymətindən razılıq edirdilər. Bununla yanaşı, sakinlər həmişə olduğu kimi, bu dəfə də ət, süd məhsulları, yumurta, göyərti və kartof, soğan, pomidor, xiyar, kələm, yerkökü, çuğundur və s. kənd nemətlərini də həvəslə alırdılar. Onların dediklərinə görə, yarmarkadakı meyvə-tərəvəzin, göyərti və ağartı məhsullarının təzə və keyfiyyətli, eyni zamanda, bazarlardakından 25-35 faiz ucuz qiymətə olması çox sərfəlidir.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
Şənbə günü Binəqədi rayonu, 6 nömrəli Bakı Texniki Peşə Liseyinin qarşısındakı yarmarkada bol məhsul nəzərə çarpırdı. Ağstafa, Siyəzən, Bərdə. Goranboy rayonlarının fermerləri və digər torpaq mülkiyyətçiləri gətirdikləri pomidoru, əriyi, yerkökünü, badımcanı, kələmi, kartofu, lobyanı və digər meyvə-tərəvəzləri, bostan məhsullarını alıcılara bazardakından 20-30 faiz ucuz qiymətlərə təklif edirdilər.
Kənd Təsərrüfatı Nazirliyinin nümayəndəsi Qadir Həsənov bildirdi ki, yarmarkaya 23 ton məhsul çıxarılmışdır.