REGİONLAR
Bakıda kənd təsərrüfatı məhsullarının növbəti satış yarmarkaları keçirilmişdir
Bakı, 2 fevral (AZƏRTAC). Fevralın 2-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Paytaxt əhalisinin kənd təsərrüfatı məhsullarına tələbatını ödəmək məqsədilə keçirilən yarmarkalara mövsümə uyğun olaraq əsasən meyvə-tərəvəz məhsulları çıxarılmışdır.
“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdir.
Burada şəhər sakinlərinə Sabirabad, Gədəbəy, Hacıqabul və digər rayonlardan gətirilmiş 14,95 ton məhsul, o cümlədən 1,2 ton ət, 0,3 ton ağartı, 3 ton tərəvəz, 3 ton kartof, 5,5 ton meyvə, 0,3 ton taxıl məhsulları və s. təklif olunurdu.
Kənd Təsərrüfatı Nazirliyinin nümayəndəsi Rövşən Əliyev dedi ki, yarmarkadakı qiymətlər bazarlarla müqayisədə 20-25 faiz ucuzdur. Qoyun ətinin kiloqramı 6 manata, mal əti 5 manat 50 qəpiyə, soğan 25-30, kartof 40-60 qəpiyə və s. satılır.
Kənd Təsərrüfatı Nazirliyinin nümayəndəsi Fəxrət Eminov məlumat verdi ki, Yasamal rayonunda, Bakı Rabitə və Nəqliyyat Kollecinin həyətində təşkil edilmiş yarmarkada nümunəvi səliqə-sahman, fermerlərə və digər torpaq mülkiyyətçilərinə, eyni zamanda, buraya bazarlıq etməyə gələn paytaxt sakinlərinə əlverişli şəraitin yaradılması bu əraziyə təhkim olunmuş Salyan, Qusar, Astara, Şabranın, bundan əlavə, Gədəbəy, Quba və Göyçay rayonlarının fermerləri və torpaq mülkiyyətçilərini satışa daha çox məhsul çıxarmağa sövq etmişdir. Bunun nəticəsidir ki, onlar Yeni ilin üçüncü həftəsinin şənbə günündə yarmarkaya 73,1 ton meyvə-tərəvəz, mal və qoyun əti, balıq, ağartı və digər məhsullar gətirmişlər.
Burada satışa çıxarılan məhsulların əksəriyyətini mövsümi tərəvəz, o cümlədən yerkökü, çuğundur, kələm, soğan, kartof, xiyar, pomidor, göyərti, həmçinin meyvələrdən alma, armud və s. təşkil edir. Yarmarkada mövsümə uyğun məhsullardan olan balqabaq, nar, heyva, naringi, portağal və digər meyvə-tərəvəzlər daha çoxdur. Məhsullar bazarlardakından 25-30 faiz ucuz satılır.
Bütün məhsulların sanitar-gigiyenik vəziyyəti Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən diqqətlə yoxlanılır.
Yarmarkada nəzarət tərəzisi qoyulmuş, lövhələrdə qiymətlərin bazardakılarla müqayisəsi göstərilmişdir.
Şənbə günü Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Masallı və digər rayonlardan 14 tondan çox müxtəlif çeşidli kənd təsərrüfatı məhsulları gətirilmişdir.
Kənd Təsərrüfatı Nazirliyinin nümayəndəsi Məmməd Həziyev bildirdi ki, yarmarkalarda məhsulların keyfiyyəti ciddi surətdə yoxlanılmış, xüsusilə ət və süd məhsulları baytar müayinəsindən keçirilmişdir.
Yarmarkada təklif edilən məhsulların keyfiyyətli və bazarlardakından 25-30 faiz ucuz olması qəsəbə sakinləri tərəfindən razılıqla qarşılanır.
Şənbə günü Suraxanı rayonu ərazisində təşkil olunmuş yarmarkalarda - “Günəş” ticarət mərkəzində (15,9 ton) və “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisində (1,7 ton) satışa Şəki, Samux, Quba, Biləsuvar, Cəlilabad və Ağsu rayonlarından gətirilmiş ümumilikdə 17,6 ton məhsul çıxarılmışdır.
Kənd Təsərrüfatı Nazirliyinin nümayəndəsi Mustafa Rüstəmov bildirdi ki, hər iki yarmarkada mövsümə uyğun meyvələrdən nar, heyva, xurma, həmçinin alma, armud, tərəvəzlərdən pomidor, xiyar, soğan, kartof və digər məhsulların, xüsusilə ağartı məhsullarının alıcıları çoxluq təşkil edir. Qiymətlər bazarlarla müqayisədə 25-30 faiz ucuzdur. Məhsulların keyfiyyəti ciddi surətdə yoxlanılır, ət və süd məhsulları baytar müayinəsindən keçirilir.
Xətai rayonunda, “Bakı” kinoteatrının yaxınlığındakı yarmarkaya Salyan, Biləsuvar, Qax, Şəmkir, Qəbələ, Kürdəmir, Quba, Astara, Daşkəsən rayonlarından 203 ton meyvə-tərəvəz, ət və süd məhsulları gətirilmişdir.
Kənd Təsərrüfatı Nazirliyinin nümayəndəsi Oqtay Hüseynov məlumat verdi ki, yarmarkada məhsullar bazarlardakından 20-25 faiz ucuz qiymətə satılır. Eyni zamanda, məhsulların keyfiyyətinə və qiymətinə ciddi nəzarət olunur. Ət və süd məhsulları baytarlıq nəzarəti tərəfindən yoxlanıldıqdan sonra satışa çıxarılır.
Yarmarkada şəhər sakinlərinə mal ətinin kiloqramı 5 manata, qoyun əti 5 manat 50 qəpiyə, kartof 25-60, soğan 20-25, kələm 30-35 qəpiyə, alma 30 qəpik - 1 manata, xiyar və pomidor 1 manat 20 - 1 manat 30 qəpiyə, naringi 1 manat 20 qəpiyə, portağal 1 manat 30 qəpik- 1 manat 40 qəpiyə, yumurtanın bir ədədi 7-9 qəpiyə təklif olunur.
Alıcılar yarmarkada yaradılan şəraitdən və məhsul bolluğundan razıdırlar.
Kənd Təsərrüfatı Nazirliyinin nümayəndəsi Savalan Seyfəddinov bildirdi ki, şənbə günü Nərimanov rayonundakı Ə.Əliyev küçəsində təşkil olunmuş yarmarkaya Xaçmaz, Tərtər, İmişli, Salyan rayonlarından 36 ton kənd təsərrüfatı məhsulları və Goradil broyler fabrikindən 4 min ədəd yumurta gətirilmişdir.
Yarmarkada ilk baxışdan bir səliqə-sahman, bolluq və canlanma gözə çarpır, çeşidlərin bolluğu hiss olunurdu. Alıcılara mövsümə uyğun olaraq daha çox meyvə-tərəvəzlər və digər məhsullar, o cümlədən balqabaq, kartof, soğan, pomidor, xiyar, kələm, yerkökü, çuğundur ət, ağartı, göyərti və s. kənd nemətləri təklif edilirdi.
Paytaxt sakinləri yarmarkadakı meyvə-tərəvəz, göyərti və ağartı məhsullarının təzə və keyfiyyətli, eyni zamanda, bazarlardakından 25-30 faiz ucuz qiymətə olmasından razılıq edirdilər.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
Şənbə günü fermerlər və digər torpaq mülkiyyətçiləri Binəqədi rayonu, 6 nömrəli Bakı Texniki Peşə Liseyinin qarşısındakı yarmarkaya satış üçün alma, nar, kartof, çuğundur, yerkökü, kələm və digər çeşiddə meyvə-tərəvəzlər, ağartı və başqa məhsullar çıxarmışdılar. Şəhər sakinləri Goranboy, Ağstafa, Bərdə, Siyəzən və digər rayonlardan gətirilmiş həmin məhsulları bazardakından 20-30 faiz ucuz qiymətlərə ala bilirdilər.
Kənd Təsərrüfatı Nazirliyinin nümayəndəsi Qadir Həsənovun verdiyi məlumata görə, yarmarkaya 26, 2 ton məhsul gətirilmişdir.