SİYASƏT
“BAKILILAR” DƏVƏT EDİR...
Klub Estoniya parlamentinin deputatları Eldar Əfəndiyev, xanım Yana Krimpe və Azərbaycan Mədəniyyət Mərkəzinin sədri Niyazi Hacıyevin təşəbbüsü ilə yaradılmışdır.
Yana Krimpenin sözlərinə görə, klub mədəniyyət və təhsil sahələrində layihələri həyata keçirmək, Tallinnlə Bakı arasında iqtisadi əlaqələri inkişaf etdirmək məqsədi ilə təşkil olunmuşdur. “Bakılılar” Azərbaycan paytaxtı və onun sakinləri ilə tərəfdaşlıq münasibətlərini inkişaf etdirmək istəyənlərin hamısına müvafiq məlumatlar verməyə hazırdır.
Klubun sədri xanım Krimpeni Bakı ilə uşaqlıq illərinin ən xoş xatirələri bağlayır. O deyir: “Bakı həmişə ən beynəlmiləl şəhərlərdən biri olmuşdur. Odur ki, milliyətindən, dilindən və sosial vəziyyətindən asılı olmayaraq, Estoniyanın hər bir sakini klubun üzvü ola bilər”.
“Bakılılar” klubunun ilk iclası “Sıprus” kafesində keçirilmişdir. Bura təsadüfən seçilməmişdir. Kafedə Azərbaycan mətbəxinin ləziz xörəklərindən dadmaq olar.
İclas iştirakçıları arasında biznesmenlər, Estoniyanın ictimai və siyasi xadimləri, o cümlədən xarici işlər naziri Kristiyna Oyuland, parlamentin deputatı Nelli Privalova, “Respublica” parlament fraksiyasının başçısı Siym -Valmar Kiysler də var idi. Klubun bütün üzvlərinə bu yaxınlarda nəşr edilmiş, “Azərbaycanca-estonca lüğət” hədiyyə verilmişdir.
Niyazi Hacıyev iclasda çıxış edərək bildirmişdir ki, Estoniya-Azərbaycan əlaqələri dərin köklərə malikdir. Hazırda Estoniyada təxminən 120 min azərbaycanlı yaşayır, Bakıdakı Estoniya diasporunun isə 300-ə yaxın üzvü var. Estoniyanın müxtəlif millətlərdən olan təxminən 2500 sakini - estonlar, ruslar, ukraynalılar, yəhudilər əslən Azərbaycandandır və biz bütün həmyerlilərimizi bir yerə toplamaq ümidindəyik. Onun sözlərinə görə, bu, böyük planların başlanğıcıdır. Gələcəkdə birgə ticarət-sənaye palatası yaratmaq da nəzərdə tutulmuşdur.
Klubun təntənəli açılışı mart ayında, Novruz bayramı ərəfəsində keçiriləcəkdir.
Bölmənin digər xəbərləri
