Bakı, 21 iyul (AZƏRTAC, M.Əlioğlu, Z.Həsənov). Xəbər verdiyimiz kimi, iyulun 20-də Bakıda qadınlar arasında WTA “Baku Cup-2014” Beynəlxalq turniri başlayıb.

AZƏRTAC xəbər verir ki, Bakı Tennis Akademiyasının 4 kortunda keçirilən yarışda əsas setkada 32 yüksək reytinqli tennisçi mübarizə aparır.

“WTA Tour”un rəhbərliyi ilə keçirilən “Baku Cup” turnirinin bu ilki mükafat fondu 250 min ABŞ dollarıdır.

İyulun 21-də turnirin ikinci gününün oyunları keçirilib.

İlk matçında gürcüstanlı Sofiya Şapatavanın turnirdən çəkilməsinə görə texniki qələbə ilə 2-ci tura yüksələn ukraynalı Katerina Bondarenko bu gün turnirdə ilk matçına çıxıb. Mərkəzi kortda Serbiya təmsilçisi Yovana Yakşiç ilə qarşılaşan Katerina Bondarenko hər iki seti 6:3 hesabı ilə qalib bitirib və əsas mərhələyə (main draw) yüksələcək 6 tennisçidən biri olub.

Dördüncü kortda digər serbiyalı tennisçi Vesna Dolonts Alla Kudryavtsevanı (Rusiya) 6:2 və 6:3 hesabı ilə bitən setlərlə 2:0 məğlub etməyi bacarıb. V.Dolonts da K.Bondarenko kimi əsas mərhələdə iştirak etmək hüququ əldə edib.

İlk oyunlarını qələbə ilə başa vuran ukraynalı Olqa Savçuk və rusiyalı Kseniya Pervak 1-ci kortda üz-üzə gəliblər. Qalib tay-breykdə müəyyənləşib. Ukraynalı tennisçi matçı 2:1 hesablı əzmkar qələbə ilə bitirib. Bununla da O.Savçuk əsas mərhələyə (main draw) vəsiqə qazanan 3-cü tennisçi olub.

Özbəkistan idmançısı Niqina Abduraimova ikinci turda 3-cü kortda belaruslu Aliaksandra Şaşnoviç ilə qarşılaşıb. A.Şaşnoviç ilk turda azərbaycanlı tennisçi Züleyxa Səfərova üzərində qələbə qazanaraq ikinci tura yüksəlmişdi.

Özbəkistanlı tennisçi oyundan 2:1 hesablı qələbə ilə ayrılıb.

İki qələbə ilə seçmə mərhələni (qualfying) uğurla başa vuran Niqina Abduraimova üçüncü tura yüksəlib və əsas mərhələyə (main draw) vəsiqə əldə edib.

“Baku Cup 2014”də seçmə mərhələ (qualfying) yarışlarını uğurla başa vuran son iki tennisçi monteneqrolu Danka Koviniç və yaponiyalı Misa Equçi olub. Danka Koviniç rusiyalı Aleksandra Panova üzərində 2:1 hesabı ilə qələbə qazanıb. Bu oyunla paralel keçirilən matçda isə Misa Equçi (Yaponiya) fransalı Amandin Hesseni 2:0 hesabı ilə məğlub edib.

Bununla da Katerina Bondarenko, Olqa Savçuk, Vesna Dolonts və Niqina Abduraimovadan sonra Danka Koviniç və Misa Equçi də əsas mərhələyə (3-cü tur) vəsiqə qazanıblar.

Turnirin ikinci günündə seçmə mərhələnin (qulafying) 6 oyunu ilə yanaşı, əsas mərhələnin (main draw) də oyunları keçirilib.

Bu mərhələnin ilk matçı Bakı Tennis Akademiyasının mərkəzi kortunda baş tutub. Rumıniyalı Aleksandra Kadantsu ilə isveçrəli Ştefani Föqele arasındakı oyunun qalibi 1 saat 24 dəqiqə ərzində müəyyənləşib. Dünya reytinqində 72-ci olan 24 yaşlı Ş.Föqele reytinqdə 131-ci olan A.Kadantsu ilə görüşdə üstün oyun nümayiş etdirib və matçdan 2:0 hesablı qələbə ilə ayrılıb. İsveçrəli tennisçi bu qələbə sayəsində turnirin 4-cü turuna (1/8 final) yüksəlib.

Üçüncü kortda keçirilən digər matçda polşalı Ursula Radvanska ilə belçikalı Alison Van Uytvank qarşılaşıblar. Dünya reytinqində 117-ci yerdə olan U.Radvanska reytinqdə 86-cı olan güclü rəqibini ilk setdə 6:1 hesabı ilə məğlub edib. İkinci setin başlanğıcında isə Alison Van Uytvank oyundan çəkildiyi üçün matç yarımçıq dayandırılıb və U.Radvanska texniki qələbə qazanıb. Bununla da polşalı tennisçi 4-cü tura (1/8 final) vəsiqə qazanıb.

“Baku Cup 2014”ün üçüncü turunun daha bir oyununda isə 2012-ci ildə Bakıda keçirilən turnirin qalibi, dünya reytinqində 40-cı pillədə yer alan serbiyalı Boyana Yovanovski reytinqdə 83-cü olan avstriyalı Patrisiya Mayr-Axlaytner ilə qarşılaşıb. Əvvəldən axıradək gərgin mübarizə şəraitində keçən matçın qalibi 2 saat ərzində müəyyənləşib.

“Baku Cup 2012”nin qalibi oyundan 2:0 hesablı qələbə ilə ayrılıb və növbəti mərhələyə keçib.

“Baku Cup 2014”də cütlüklərin (doubles) yarışına da start verilib.

Cütlüklərin ilk matçında 17 yaşlı azərbaycanlı tennisçi Nəzrin Cəfərova 19 yaşlı gürcüstanlı komanda yoldaşı Tamari Çalaqanidze ilə Oleksandra Koraşvili (Ukrayna) -Tereza Martinkova (Çexiya) cütlüyünə qarşı oynayıb. Hər iki seti 6:0 hesablı qələbə ilə bitirən O.Koraşvili -T. Martinkova cütlüyü matçdan 2:0 qalib ayrılıb.

Qeyd edək ki, Nəzrin Cəfərova təklərin yarışında (singles) isə ilk matçına iyulun 22-də çıxacaq. Onun rəqibi slovakiyalı Cana Çepelova olacaq.

“Baku Cup 2014” turnirinin əsas mərhələsinin də üç oyunu keçirilib.

Polşalı Katarzina Piter çexiyalı Kristina Plişkova ilə qələbə uğrunda 2 saat 18 dəqiqə ərzində gərgin mübarizə aparıb. Katarzina Piter matçdan 2:1 hesablı qələbə ilə ayrılıb.

Növbəti mərhələyə yüksələn Katarzina Piter 1/8 finalda “Baku Cup 2012”nin qalibi olmuş serbiyalı Boyana Yovanovski ilə qarşılaşacaq.

Fransalı Paulin Parmentiyer isə rumıniyalı Aleksandra Dulqeru ilə münasibətlərinə aydınlıq gətirib. Dünya reytinqində 95-ci olan P.Parmentiyer 96-cı yerdə qərarlaşan rəqibi üzərində 2:0 hesablı qələbə qazanıb və 1/8 finala yüksəlib.

Günün son matçı isə israilli Şayar Peyer ilə avstriyalı Yvonne Meysburger arasında olub. “Baku Cup 2013”ün finalçısı olmuş dünya reytinqinin 90 nömrəli tennisçisi Ş.Peyer reytinqdə 60-cı pillədə qərarlaşmış güclü rəqibini 2:0 hesabı ilə məğlub edib.

Xatırladaq ki, 2011-ci ildən başlayaraq hər il keçirilən “Baku Cup” turnirləri müddətində Vera Zvonaryova, Anastasiya Pavlyuçenkova, Aravan Rezai, Boyana Yovanovski, Elina Svitolina kimi tennis ulduzları ölkəmizin qonağı olublar.

Turnirə iyulun 27-də yekun vurulacaq. Final oyunu isə iyulun 27-də 3 min tamaşaçı tutumuna malik mərkəzi kortda keçiriləcək.