Bandunqdan Bakıya: Qoşulmama Hərəkatı mürəkkəb və dəyişkən qlobal kontekstdə
Bakı, 16 may, AZƏRTAC
Mayın 16-da Beynəlxalq Münasibətlərin Təhlili Mərkəzinin təşkilatçılığı ilə "Bandunqdan Bakıya qədər: Qoşulmama Hərəkatı mürəkkəb və dəyişkən qlobal kontekstdə" adlı konfrans keçirilib.
AZƏRTAC xəbər verir ki, konfransda çıxış edən Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev Azərbaycanın Qoşulmama Hərəkatında fəallığı ilə seçildiyini deyib. Bildirilib ki, Soyuq müharibədən sonra Qoşulmama Hərəkatının aktuallığı özünü göstərməkdədir. Azərbaycan Qoşulmama Hərəkatına sədrliyi dövründə bir sıra vacib təşəbbüslərlə çıxış edib. Ölkə rəhbərliyi tərəfindən bu istiqamətdə bir sıra vacib addımlar atılıb. Azərbaycanın sədrliyi dövründə Qoşulmama Hərəkatında bəzi institutlaşma prosesinə başlanılıb.
Təşkilatın əsas fəaliyyət istiqamətlərindən birinin beynəlxalq təşkilatların və BMT-nin fəaliyyətini, ölkələrin ərazi bütövlüyünü dəstəkləmək olduğunu söyləyən F.Şəfiyev qeyd edib: “Biz praktiki cəhətdən də gördük ki, BMT-nin Təhlükəsizlik Şurasında Azərbaycana qarşı Fransa tərəfdən müəyyən cəhdlər var idi. Məhz Qoşulmama Hərəkatının üzvləri bunun qarşısını aldı".
Links Avropa Şirkətinin direktoru Dennis Sammut çıxışında qeyd edib ki, Azərbaycan Qoşulmama Hərəkatına çox həssas dönəmdə sədrlik edib. Belə həssas dövrdə Azərbaycanın liderliyi çox önəmlidir. Biz Azərbaycandakı həmkarlarımızla əməkdaşlıq edirik və oktyabrda Haaqada bir tədbir keçiriləcək. Qoşulmama Hərəkatının üzvlərinin Avropa üçün mühüm əhəmiyyəti var. Bu Hərəkat fəaliyyətə üç ölkə ilə başlayıb və getdikcə üzvlərinin sayı artıb.
Daha sonra Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyevin moderatorluğu ilə "Qlobal təhlükəsizlik və iqtisadi çağırışlar: Qoşulmama Hərəkatının rolu" adlı ilk panel iclası keçirilib.
Paneldə çıxış edən Misir Xarici İşlər Şurasının sədri Məhəmməd Abdel Hay Əl-Orabi deyib ki, bu gün dünyamız bir çox problemlərlə üz-üzədir. Qeyd olunub ki, sabitlik və inkişaf üçün ölkələr bir-biri ilə təcrübələrini bölüşməlidir. Vurğulanıb ki, Qoşulmama Hərəkatının əsas sirlərindən biri də uğurlu hekayələri paylaşmaqdır və bu gün buna çox ehtiyac var.
Beynəlxalq Münasibətlərin Təhlili Mərkəzinin İdarə Heyətinin üzvü Esmira Cəfərova diqqətə çatdırıb ki, bəzi problemlərin həlli çox çətindir. Qoşulmama Hərəkatı kimi təşkilatlar eyni fikirli insanları bir araya gətirir. Bandunq Prinsipləri burada vacib amildir. Qoşulmama Hərəkatının dünyada hansı töhfələri verə biləcəyi bu gün əsas müzakirə mövzusudur.
Türkmənistan Xarici İşlər Nazirliyinin Beynəlxalq Münasibətlər İnstitutunun Strateji Araşdırmalar Mərkəzinin direktoru Şiri Şiriyev bildirib ki, Qoşulmama Hərəkatı dünyada ən böyük beynəlxalq strukturlardan biridir və planetin əhalisinin təxminən 55 faizi bu quruma üzv ölkələrdə yaşayır. Bu dövlətlər dünya neft ehtiyatlarının 75 faizindən, qaz ehtiyatının isə 50 faizindən çoxuna, nəhəng insan potensialına və zəngin təbii ehtiyatlara sahibdir.
“Türkmənistan 1995-ci ildə Qoşulmama Hərəkatının tamhüquqlu üzvü olub. Türkmənistan dövlətinin son illər ərzində irəli sürdüyü və Birləşmiş Millətlər Təşkilatının simasında dünya birliyinin geniş dəstəyini qazanmış bir sıra beynəlxalq təşəbbüslər buna sübutdur. Neytral Türkmənistan Qoşulmama Hərəkatı kimi münaqişəli vəziyyətlərin yalnız siyasi-diplomatik, danışıqlar yolu və vasitələri ilə həllinə tərəfdardır”, - deyə o əlavə edib.
Konfrans "Qoşulmama Hərəkatını qlobal aktor kimi gücləndirmək: institusionallaşma və digər təşəbbüslər" və “Qoşulmama Hərəkatının konseptual məsələləri və gələcəyi” mövzularında panel iclasları ilə davam edib.
Bölmənin digər xəbərləri
