Krımda Rusiyaya məxsus hərbi qayıq vurulub
Kiyev, 6 may, AZƏRTAC
Ukrayna Müdafiə Nazirliyinin Baş Kəşfiyyat İdarəsi Krımda Rusiya ordusuna məxsus yüksəksürətli hərbi qayığı vurub. Hücum üçün “Magura V5” dəniz dronundan istifadə edilib.
AZƏRTAC xəbər verir ki, bu barədə yerli mediaya xüsusi xidmət orqanlarındakı mənbələrdən məlumat verilib. Rusiya hərbi qayığının mayın 6-na keçən gecə Uzkaya körfəzində vurulduğu bildirilir.
Qeyd olunur ki, uğurlu əməliyyatın arxasında Müdafiə Nazirliyinin Baş Kəşfiyyat İdarəsi dayanıb. Kəşfiyyat “Magura V5” dronunun rus ordusunun yüksəksürətli qayığını məhv etdiyini təsdiqləyib.
“Ukraynanın hücumlarının qorxusu işğalçıları Qara dəniz donanmasının iri gəmilərini yarımadadan uzaqda gizlətməyə məcbur edir. Odur ki, Krım ərazi sularında sürətli manevr edə bilən hərbi gəmilərdən istifadə olunur”, - deyə məlumatda bildirilir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
