Azərbaycan regionda sülhün və sabitliyin təmin olunmasında mühüm rol oynayır - ŞƏRH
Bakı, 16 oktyabr, AZƏRTAC
Azərbaycan regionda sülhün və təhlükəsizliyin qorunması, dövlətlər arasında etimadın möhkəmləndirilməsi və əməkdaşlıq imkanlarının genişləndirilməsi istiqamətində ardıcıl siyasət həyata keçirir. Ölkənin xarici siyasətində milli maraqların qorunması ilə yanaşı, regional sabitliyin təmin edilməsi, qarşılıqlı hörmətə əsaslanan münasibətlərin inkişafı və iqtisadi əlaqələrin genişləndirilməsi mühüm yer tutur.
Bu fikirləri AZƏRTAC-a açıqlamasında türk siyasi ekspert Mehmet Seven bildirib.
Onun sözlərinə görə, Cənubi Qafqaz regionunda davamlı sülhün təmin olunması yalnız siyasi bəyanatlarla deyil, konkret addımlar, qarşılıqlı etimad və uzunmüddətli əməkdaşlıq vasitəsilə mümkündür.
“Azərbaycan bu istiqamətdə nümayiş etdirdiyi siyasi iradə və irəli sürdüyü təşəbbüslərlə regional proseslərdə mühüm rol oynayır. Azərbaycanın sülh gündəliyinin əsas istiqamətlərindən biri regionda uzunmüddətli sabitliyin yaradılması, dövlətlərin suverenliyinə və ərazi bütövlüyünə hörmət prinsiplərinin qorunmasıdır. Bu prinsiplər beynəlxalq münasibətlər sistemində etibarlı əməkdaşlığın və təhlükəsizliyin əsas şərtlərindən hesab olunur. Cənubi Qafqazda sülhün möhkəmlənməsi region ölkələri üçün yeni iqtisadi imkanlar yarada, nəqliyyat-kommunikasiya əlaqələrinin inkişafına təkan verə və beynəlxalq ticarət marşrutlarının səmərəliliyini artıra bilər. Azərbaycanın əlverişli coğrafi mövqeyi, nəqliyyat infrastrukturu və enerji sahəsindəki imkanları bu prosesdə ölkənin əhəmiyyətini daha da artırır”, - deyə Mehmet Seven vurğulayıb.
Siyasi ekspertin fikrincə, enerji təhlükəsizliyi və nəqliyyat bağlantılarının inkişafı da regional sülhün möhkəmləndirilməsində mühüm amillərdir: “Ölkələr arasında iqtisadi qarşılıqlı asılılığın və ortaq maraqların artması sabitliyin qorunmasına, dialoqun genişlənməsinə və münaqişə risklərinin azaldılmasına şərait yarada bilər. Azərbaycanın Türkiyə ilə strateji müttəfiqliyi də regionda sülhün, təhlükəsizliyin və əməkdaşlığın gücləndirilməsi baxımından xüsusi əhəmiyyət daşıyır. Azərbaycan-Türkiyə münasibətləri siyasi, iqtisadi, enerji və nəqliyyat sahələrini əhatə etməklə yanaşı, regional problemlərin dialoq və qarşılıqlı anlaşma yolu ilə həllinə də mühüm töhfə verir”.
Mehmet Sevenin qənaətinə görə, Cənubi Qafqazda dayanıqlı sülhün formalaşması üçün bütün tərəflərin konstruktiv mövqe nümayiş etdirməsi, beynəlxalq hüququn prinsiplərinə hörmət etməsi və əməkdaşlığa üstünlük verməsi vacibdir. Xarici qüvvələrin regiondakı gərginliyi artıran addımlarından çəkinməsi, dövlətlər arasında etimadın gücləndirilməsi və iqtisadi əməkdaşlığın təşviqi də bu baxımdan mühüm əhəmiyyət kəsb edir.
Ekspert sonda qeyd edib ki, Azərbaycanın sülhə, sabitliyə və regional əməkdaşlığa yönəlmiş siyasəti Cənubi Qafqazın gələcək inkişafı üçün mühüm imkanlar yaradır. Bu imkanlardan səmərəli istifadə olunması regionun beynəlxalq nəqliyyat və ticarət sistemində mövqeyini gücləndirməklə yanaşı, xalqların rifahına və təhlükəsizliyinə də müsbət təsir göstərə bilər.
Bölmənin digər xəbərləri
