BDU Özbəkistanın 9 universiteti ilə əməkdaşlığa başlayır
Bakı, 16 oktyabr, AZƏRTAC
Bakı Dövlət Universiteti (BDU) ilə Özbəkistanın doqquz ali təhsil müəssisəsi arasında əməkdaşlıq sənədləri imzalanıb. Sənədlər təhsil, elmi-tədqiqat və akademik mübadilə sahələrində əlaqələrin genişləndirilməsini nəzərdə tutur.
Universitetdən AZƏRTAC-a bildirilib ki, memorandumlar Xankəndi şəhərində Qarabağ Universitetinin ev sahibliyi ilə keçirilən Azərbaycan-Özbəkistan ali təhsil müəssisələrinin II Rektorlar Forumu çərçivəsində imzalanıb. Sənədlər Özbəkistanın Cizzax Politexnik İnstitutu, Buxara Dövlət Pedaqoji Universiteti, Əndican Dövlət Pedaqoji Universiteti, Nizami Gəncəvi adına Özbəkistan Milli Pedaqoji Universiteti, Səmərqənd Dövlət Pedaqoji İnstitutu, Daşkənd Dövlət Nəqliyyat Universiteti, Termez Dövlət Mühəndislik və Aqrotexnologiyalar Universiteti və Gülüstan Dövlət Universiteti ilə əməkdaşlığı əhatə edir.
Memorandumlar çərçivəsində professor-müəllim heyətinin, əməkdaşların və tələbələrin mübadiləsi, birgə elmi-tədqiqat və təhsil proqramlarının həyata keçirilməsi nəzərdə tutulur. Həmçinin elmi konfransların, simpoziumların və qısamüddətli kursların təşkili, tədris və inzibati sahələrdə innovativ təcrübələrin, elmi-metodik nəşrlərin mübadiləsi, eləcə də ətraf mühitin idarə olunması sahəsində birgə tədbirlərin keçirilməsi planlaşdırılır.
Forum çərçivəsində BDU ilə Fərqanə Dövlət Universiteti arasında 2026-2027-ci tədris ili üzrə təhsil və elmi əməkdaşlığın inkişafına dair birgə Fəaliyyət Planı da imzalanıb. Fəaliyyət Planına əsasən, tələbə və əməkdaş mübadiləsinin təşkili, birgə mühazirələrin keçirilməsi, tədris proqramlarının müqayisəsi və ikili diplom proqramlarının yaradılması imkanlarının araşdırılması nəzərdə tutulur. Bununla yanaşı, birgə elmi tədqiqatların aparılması, elmi məqalələrin hazırlanması və beynəlxalq qrant layihələrində iştirakın təşviqi planlaşdırılır. Əməkdaşlığın səmərəli təşkili məqsədilə müntəzəm onlayn görüşlərin və birgə mədəni tədbirlərin keçirilməsi də nəzərdə tutulub.
Forum çərçivəsində BDU-nun rektoru Elçin Babayev “Bilikdən təsirə: universitet–sənaye əməkdaşlığının və innovasiya tərəfdaşlığının gücləndirilməsi” mövzusunda panel müzakirəsində iştirak edib. Müzakirələrdə universitetlərlə sənaye sektoru arasında əməkdaşlığın genişləndirilməsi, elmi tədqiqatların praktiki nəticələrə çevrilməsi və innovasiya potensialının gücləndirilməsi məsələləri diqqət mərkəzində olub.
Bölmənin digər xəbərləri
