Efiopiyada Tiqray bölgəsinə altı aylıq keçid administrasiyası yaradılıb
Bakı, 16 oktyabr, AZƏRTAC
Efiopiyanın Baş naziri Abiy Əhməd cümə günü ölkənin şimalında yerləşən Tiqray bölgəsində altı ay müddətinə keçid administrasiyasının yaradıldığını elan edib.
AZƏRTAC “əl-Ərəbiyyə” telekanalına istinadla xəbər verir ki, yeni administrasiyanın əsas vəzifəsi bölgədə siyasi sabitliyi təmin etmək, azad və ədalətli seçkilərin keçirilməsi üçün şərait yaratmaqdır.
Qeyd edək ki, son həftələrdə Tiqrayda federal qüvvələrlə əvvəllər bölgəni idarə edən Tiqray Xalq Azadlıq Cəbhəsi arasında döyüşlər baş verib. Sentyabrın sonunda mərkəzi hökumət tərəfindən tanınmayan təşkilat hakimiyyəti devirmək məqsədilə silahlı qruplarla ittifaq qurub.
Hərbi əməliyyatlar zamanı Tiqray Xalq Azadlıq Cəbhəsinin qüvvələri, xüsusilə qonşu Afar bölgəsində irəlilədikdən sonra geri çəkilməyə məcbur olub və bölgənin əsas şəhərlərinə nəzarəti itirib. Oktyabrın 3-də isə qüvvələr regionun paytaxtı Mekeleni döyüşsüz tərk edib.
Efiopiya hökumətinin bəyanatında vurğulanıb ki, yeni administrasiyanın yaradılması Tiqray əhalisinin sülh şəraitində yaşamasına, özünüidarə hüququnun təmin edilməsinə və bölgənin inkişaf imkanlarından yararlanmasına xidmət etməlidir.
Bölmənin digər xəbərləri
