Milli birlik, ideoloji təhlükəsizlik və inkişaf - Qaxda qarşıda duran hədəflər müzakirə olunub
Qax, 16 oktyabr, AZƏRTAC
Qaxda Prezident, Yeni Azərbaycan Partiyasının (YAP) Sədri İlham Əliyevin partiyanın VIII Qurultayındakı nitqindən irəli gələn vəzifələr müzakirə edilib.
AZƏRTAC-ın bölgə müxbiri xəbər verir ki, bu münasibətlə keçirilən müşavirədə Prezident İlham Əliyevin qurultayda müəyyən etdiyi prioritetlər, yeni tarixi mərhələdə Azərbaycanın qarşısında duran vəzifələr, milli maraqların qorunması, ideoloji təhlükəsizliyin təmin edilməsi və cəmiyyətin dövlətçilik ətrafında birliyinin möhkəmləndirilməsi məsələləri ilə bağlı fikir mübadiləsi aparılıb.
Qax Rayon İcra Hakimiyyətinin başçısı Elvin Paşayev çıxış edərək bildirib ki, Prezident İlham Əliyevin YAP-ın VIII Qurultayında səsləndirdiyi fikirlər ölkəmizin gələcək inkişaf istiqamətlərinin müəyyənləşdirilməsi, milli maraqların qorunması və müasir çağırışlara uyğun fəaliyyətin təşkili baxımından mühüm əhəmiyyət daşıyır. O qeyd edib ki, müasir dövrdə ideoloji təhlükəsizliyin təmin olunması, milli-mənəvi dəyərlərin qorunması və informasiya təhdidlərinə qarşı maarifləndirmə işinin gücləndirilməsi xüsusi aktuallıq kəsb edir. Bu istiqamətdə əsas diqqət gənclərin vətənpərvərlik ruhunda tərbiyəsinə, dövlətçilik düşüncəsinin formalaşdırılmasına və informasiya savadlılığının artırılmasına yönəldilməlidir.
Vurğulanıb ki, Qax rayonunda da bu istiqamətdə fəaliyyət sistemli və əlaqələndirilmiş şəkildə qurulmalıdır. Aidiyyəti qurumlar qarşıya qoyulan vəzifələrin icrasına məsuliyyətlə yanaşmalı, keçirilən tədbirlərin formal xarakter daşımamasına, konkret nəticələrə və ictimai faydaya xidmət etməsinə diqqət yetirməlidirlər.
Təhsil sektorunun müdiri Babək Heydərov çıxışında gənclərin milli ruhda, Vətənə və dövlətə bağlılıq, tarixi irsə hörmət və vətəndaş məsuliyyəti prinsipləri əsasında yetişdirilməsinin önəmini vurğulayıb.
Dövlət Aqrar İnkişaf Mərkəzinin rəhbəri vəzifələrini müvəqqəti icra edən Musa Abidov çıxışında kənd təsərrüfatının inkişafının, kənd əhalisinin rifahının yüksəldilməsinin, bölgələrin iqtisadi potensialından səmərəli istifadənin önəmindən danışıb. Qeyd edib ki, ölkənin dayanıqlı inkişafı üçün hər bir sahədə dövlət proqramlarının məqsədyönlü icrası və yerli imkanların düzgün qiymətləndirilməsi vacibdir.
Şəhid həyat yoldaşı Məryəm Dursunova çıxışında Vətən uğrunda canından keçmiş qəhrəmanların xatirəsinin yaşadılmasının, şəhid ailələrinə və qazilərə göstərilən dövlət qayğısının, milli birliyin və vətənpərvərlik ruhunun qorunmasının əhəmiyyətini vurğulayıb. O, şəhidlərin müqəddəs əmanətinə sədaqətin, gənc nəslin Vətənə məhəbbət və dövlətə bağlılıq ruhunda yetişdirilməsinin hər bir vətəndaşın mənəvi məsuliyyəti olduğunu bildirib.
Vətən müharibəsi qazisi Rahib Bayramov çıxışında Azərbaycanın ərazi bütövlüyünün və suverenliyinin bərpasının xalqın birliyinin, dövlətin gücünün və Vətənə sədaqətin nümunəsi olduğunu deyib.
Rayon Ağsaqqallar Şurasının üzvü, həkim-cərrah Vahid Məsimov çıxışında cəmiyyətin mənəvi bütövlüyünün qorunmasında ağsaqqalların, ziyalıların və səhiyyə işçilərinin rolunu diqqətə çatdırıb. O, milli-mənəvi dəyərlərin yaşadılmasının, nəsillər arasında mənəvi bağlılığın gücləndirilməsinin, sağlam ictimai mühitin formalaşdırılmasının və gənclərin zərərli ideoloji təsirlərdən qorunmasının vacibliyini qeyd edib.
Müşavirədə Prezident İlham Əliyevin qurultayda səsləndirdiyi fikirlərdən irəli gələn ideoloji maarifləndirmənin müasir çağırışlara uyğun qurulmasının və bu istiqamətdə dövlət qurumları, təhsil müəssisələri, ictimaiyyət nümayəndələri və vətəndaş cəmiyyəti arasında əlaqələndirilmiş fəaliyyətin təmin olunmasının xüsusi əhəmiyyət daşıdığı bildirilib.
Qeyd olunub ki, dövlətçilik ənənələrinin davamlılığı, milli birliyin möhkəmliyi və Azərbaycanın gələcək inkişafı hər bir vətəndaşın məsuliyyətli mövqeyindən və ümumi məqsədlər naminə birgə fəaliyyətindən asılıdır.
Müxbir - Rasim İslamoğlu
Bölmənin digər xəbərləri
