Beynəlmiləlçi və vətənpərvər
Moskva, 30 oktyabr (AZƏRTAC). Həmvətənimiz, Rusiyanın əməkdar inşaatçısı Əlizaman Rəhimov bu günlərdə 55 yaşını qeyd edir.
Moskva vilayətində tanınmış həmyerlimiz, “Günay” istehsalat-kommersiya firması MMC-nin baş direktoru Ə.Rəhimov bu əlamətdar hadisə ilə əlaqədar Rusiyanın bir sıra rəsmi şəxslərindən, habelə Moskva yaxınlığındakı Domodedovo şəhərinin adi sakinlərindən təbrik məktubları alır.
Əlizaman Rəhimovun rəhbərlik etdiyi tikinti şirkəti təkcə bir mikrorayonda yeni mənzillər tikməyi deyil, həm də bu mikrorayonun sakinlərinin daha rahat həyat şəraitini təmin etməyi öz qarşısına məqsəd qoymuşdur.
Azərbaycanın Rusiyadakı fövqəladə və səlahiyyətli səfiri Polad Bülbüloğlu təbrik məktubunda yazır: “Rusiyada mənim həmvətənlərimin bir neçə nəsli yaşayır. Onlar bu ölkənin ictimai həyatına uğurla inteqrasiya etmişlər. Belələrindən biri də Əlizaman Rəhimovdur. Domodedovo şəhərinin və Moskva vilayətinin əhalisinin mənzil və sosial-məişət şəraitinin yaxşılaşdırılmasına yönəlmiş bir sıra müasir tikinti layihələrinin və ideyalarının təşəbbüsçüsü kimi çıxış etmiş Əlizaman Rəhimov rahat mənzillər, müasir xəstəxanalar, kitabxanalar, məktəblər, uşaq bağçaları, idman və oyun meydançaları tikilib istifadəyə verildiyinə görə minlərlə insandan təşəkkür almışdır.
Səfir Böyük Vətən müharibəsi veteranlarına göstərilən qayğı mövzusuna toxunaraq qeyd etmişdir ki, həmvətənimizin geniş əhatəli xeyriyyəçilik fəaliyyəti çoxlarının təşəkkürünə səbəb olmuşdur. Azərbaycanın Rusiyadakı səfiri əmin olduğunu bildirmişdir ki, Əlizaman Rəhimovun öz işinə vicdanlı münasibəti və onun peşəkar keyfiyyətləri bundan sonra da, o cümlədən Moskva vilayəti Domodedovo şəhər dairəsinə “Yedinaya Rossiya” partiyasının deputatı qismində uğurlu fəaliyyət göstərəcəkdir.
Moskva vilayət hökumətinin payçılıq qaydasında mənzil tikintisi, köhnəlmiş və qəza vəziyyətində olan mənzillər üzrə naziri Aleksandr Koqan, Domodedovo şəhər dairəsinin başçısı Leonid Kovalevski, Domodedovo şəhər dairəsi administrasiyasının rəhbəri Dmitri Qorodetski, Domodedovo şəhər dairəsi administrasiyası rəhbərinin müavini Marina Vedernikova və başqalarının adından yubilyara ünvanlanmış təbrik məktublarında qeyd edilir ki, köhnəlmiş evlərin yerləşdiyi ərazilərin abad və müasir mikrorayonlara çevrilməsinə, Domodedovo ailələrinin gözəl mənzillərə köçməsinə görə minlərlə Domodedovo sakini sizə ürəkdən “sağ ol” deyirlər.
Məktublarda belə sətirlər də var: “Sizə xas olan real beynəlmiləlçilik və vətənpərvərlik, haqlı olaraq, şəhər dairəsində və regionda sizə nüfuz qazandırmışdır.”
Xatırladaq ki, büdcə maliyyələşdirilməsi ayrılmadan vətəndaşların köhnəlmiş mənzil fondundan köçürülməsi proqramına uyğun olaraq, Domodedovoda intensiv tikinti işləri aparılır. Əlizaman Rəhimovun baş direktor olduğu “Günay” tikinti şirkəti Domodedovo şəhər dairəsinin rəhbərliyi ilə birlikdə bu şəhəri Moskva vilayətinin ən gözəl yaşayış məntəqələrindən birinə çevirməyi qarşısına məqsəd qoymuşdur. Hazırda “Günay” firması şəhər dairəsində sakinlərin köhnə mənzil fondundan məqsədyönlü şəkildə köçürülməsi ilə məşğul olan yeganə təşkilatdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
